៩. សង្កាសនសុត្តំ

១០៨៩. ‘‘‘ឥទំ ទុក្ខំ អរិយសច្ច’ន្តិ ភិក្ខវេ, មយា បញ្ញត្តំ. តត្ថ អបរិមាណា វណ្ណា អបរិមាណា ព្យញ្ជនា អបរិមាណា សង្កាសនា – ‘ឥតិបិទំ ទុក្ខំ អរិយសច្ច’ន្តិ; ឥទំ ទុក្ខសមុទយំ…បេ… ឥទំ ទុក្ខនិរោធំ…បេ… ‘ឥទំ ទុក្ខនិរោធគាមិនី បដិបទា អរិយសច្ច’ន្តិ, ភិក្ខវេ, មយា បញ្ញត្តំ. តត្ថ អបរិមាណា វណ្ណា អបរិមាណា ព្យញ្ជនា អបរិមាណា សង្កាសនា – ‘ឥតិបិទំ ទុក្ខនិរោធគាមិនី បដិបទា អរិយសច្ច’ន្តិ.

‘‘តស្មាតិហ, ភិក្ខវេ, ‘ឥទំ ទុក្ខ’ន្តិ យោគោ ករណីយោ…បេ… ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ. នវមំ.