៣. រាធអនិច្ចសុត្តំ

៧៦. អថ ខោ អាយស្មា រាធោ…បេ… ឯកមន្តំ និសិន្នោ ខោ អាយស្មា រាធោ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា ឯកោ វូបកដ្ឋោ អប្បមត្តោ អាតាបី បហិតត្តោ វិហរេយ្យ’’ន្តិ. ‘‘យំ ខោ, រាធ, អនិច្ចំ តត្រ តេ ឆន្ទោ បហាតព្ពោ. កិញ្ច, រាធ, អនិច្ចំ តត្រ តេ ឆន្ទោ បហាតព្ពោ? ចក្ខុ អនិច្ចំ, រូបា អនិច្ចា, ចក្ខុវិញ្ញាណំ… ចក្ខុសម្ផស្សោ… យម្បិទំ ចក្ខុសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ អនិច្ចំ. តត្រ តេ ឆន្ទោ បហាតព្ពោ…បេ… ជិវ្ហា… កាយោ… មនោ អនិច្ចោ. តត្រ តេ ឆន្ទោ បហាតព្ពោ. ធម្មា… មនោវិញ្ញាណំ… មនោសម្ផស្សោ… យម្បិទំ មនោសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ អនិច្ចំ. តត្រ តេ ឆន្ទោ បហាតព្ពោ. យំ ខោ, រាធ, អនិច្ចំ តត្រ តេ ឆន្ទោ បហាតព្ពោ’’តិ. តតិយំ.