៥. បឋមនតុម្ហាកំសុត្តំ

១៣៨. ‘‘យំ, ភិក្ខវេ, ន តុម្ហាកំ តំ បជហថ. តំ វោ បហីនំ ហិតាយ សុខាយ ភវិស្សតិ. កិញ្ច, ភិក្ខវេ, ន តុម្ហាកំ? ចក្ខុ, ភិក្ខវេ, ន តុម្ហាកំ; តំ បជហថ. តំ វោ បហីនំ ហិតាយ សុខាយ ភវិស្សតិ…បេ… ជិវ្ហា ន តុម្ហាកំ; តំ បជហថ. សា វោ បហីនា ហិតាយ សុខាយ ភវិស្សតិ…បេ… មនោ ន តុម្ហាកំ; តំ បជហថ. សោ វោ បហីនោ ហិតាយ សុខាយ ភវិស្សតិ. សេយ្យថាបិ, ភិក្ខវេ, យំ ឥមស្មិំ ជេតវនេ តិណកដ្ឋសាខាបលាសំ តំ ជនោ ហរេយ្យ វា ឌហេយ្យ វា យថាបច្ចយំ វា ករេយ្យ, អបិ នុ តុម្ហាកំ ឯវមស្ស – ‘អម្ហេ ជនោ ហរតិ វា ឌហតិ វា យថាបច្ចយំ វា ករោតី’’’តិ? ‘‘នោ ហេតំ, ភន្តេ’’. ‘‘តំ កិស្ស ហេតុ’’? ‘‘ន ហិ នោ ឯតំ, ភន្តេ, អត្តា វា អត្តនិយំ វា’’តិ. ‘‘ឯវមេវ ខោ, ភិក្ខវេ, ចក្ខុ ន តុម្ហាកំ; តំ បជហថ. តំ វោ បហីនំ ហិតាយ សុខាយ ភវិស្សតិ…បេ… ជិវ្ហា ន តុម្ហាកំ; តំ បជហថ. សា វោ បហីនា ហិតាយ សុខាយ ភវិស្សតិ…បេ… មនោ ន តុម្ហាកំ; តំ បជហថ. សោ វោ បហីនោ ហិតាយ សុខាយ ភវិស្សតី’’តិ. បញ្ចមំ.