១. យោគក្ខេមិសុត្តំ

១០៤. សាវត្ថិនិទានំ. ‘‘យោគក្ខេមិបរិយាយំ វោ, ភិក្ខវេ, ធម្មបរិយាយំ ទេសេស្សាមិ. តំ សុណាថ. កតមោ ច, ភិក្ខវេ, យោគក្ខេមិបរិយាយោ ធម្មបរិយាយោ? សន្តិ, ភិក្ខវេ, ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសំហិតា រជនីយា. តេ តថាគតស្ស បហីនា ឧច្ឆិន្នមូលា តាលាវត្ថុកតា អនភាវង្កតា អាយតិំ អនុប្បាទធម្មា. តេសញ្ច បហានាយ អក្ខាសិ យោគំ, តស្មា តថាគតោ ‘យោគក្ខេមី’តិ វុច្ចតិ…បេ… សន្តិ, ភិក្ខវេ, មនោវិញ្ញេយ្យា ធម្មា ឥដ្ឋា កន្តា មនាបា បិយរូបា កាមូបសំហិតា រជនីយា. តេ តថាគតស្ស បហីនា ឧច្ឆិន្នមូលា តាលាវត្ថុកតា អនភាវង្កតា អាយតិំ អនុប្បាទធម្មា. តេសញ្ច បហានាយ អក្ខាសិ យោគំ, តស្មា តថាគតោ ‘យោគក្ខេមី’តិ វុច្ចតិ. អយំ ខោ, ភិក្ខវេ, យោគក្ខេមិបរិយាយោ ធម្មបរិយាយោ’’តិ. បឋមំ.