១០. ពហុធីតរសុត្តំ

១៩៦. ឯកំ សមយំ ភគវា កោសលេសុ វិហរតិ អញ្ញតរស្មិំ វនសណ្ឌេ. តេន ខោ បន សមយេន អញ្ញតរស្ស ភារទ្វាជគោត្តស្ស ព្រាហ្មណស្ស ចតុទ្ទស ពលីពទ្ទា នដ្ឋា ហោន្តិ. អថ ខោ ភារទ្វាជគោត្តោ ព្រាហ្មណោ តេ ពលីពទ្ទេ គវេសន្តោ យេន សោ វនសណ្ឌោ តេនុបសង្កមិ; ឧបសង្កមិត្វា អទ្ទស ភគវន្តំ តស្មិំ វនសណ្ឌេ និសិន្នំ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា. ទិស្វាន យេន ភគវា តេនុបសង្កមិ; ឧបសង្កមិត្វា ភគវតោ សន្តិកេ ឥមា គាថាយោ អភាសិ –

‘‘ន ហិ នូនិមស្ស [នហនូនិមស្ស (សី. ស្យា. កំ.)] សមណស្ស, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាយំ សមណោ សុខី.

‘‘ន ហិ នូនិមស្ស សមណស្ស, តិលាខេត្តស្មិ បាបកា;

ឯកបណ្ណា ទុបណ្ណា [ទ្វិបណ្ណា (សី. បី.)] ច, តេនាយំ សមណោ សុខី.

‘‘ន ហិ នូនិមស្ស សមណស្ស, តុច្ឆកោដ្ឋស្មិ មូសិកា;

ឧស្សោឡ្ហិកាយ នច្ចន្តិ, តេនាយំ សមណោ សុខី.

‘‘ន ហិ នូនិមស្ស សមណស្ស, សន្ថារោ សត្តមាសិកោ;

ឧប្បាដកេហិ សញ្ឆន្នោ, តេនាយំ សមណោ សុខី.

‘‘ន ហិ នូនិមស្ស សមណស្ស, វិធវា សត្ត ធីតរោ;

ឯកបុត្តា ទុបុត្តា [ទ្វិបុត្តា (សី. បី.)] ច, តេនាយំ សមណោ សុខី.

‘‘ន ហិ នូនិមស្ស សមណស្ស, បិង្គលា តិលកាហតា;

សោត្តំ បាទេន ពោធេតិ, តេនាយំ សមណោ សុខី.

‘‘ន ហិ នូនិមស្ស សមណស្ស, បច្ចូសម្ហិ ឥណាយិកា;

ទេថ ទេថាតិ ចោទេន្តិ, តេនាយំ សមណោ សុខី’’តិ.

‘‘ន ហិ មយ្ហំ ព្រាហ្មណ, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, តិលាខេត្តស្មិ បាបកា;

ឯកបណ្ណា ទុបណ្ណា ច, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, តុច្ឆកោដ្ឋស្មិ មូសិកា;

ឧស្សោឡ្ហិកាយ នច្ចន្តិ, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, សន្ថារោ សត្តមាសិកោ;

ឧប្បាដកេហិ សញ្ឆន្នោ, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, វិធវា សត្ត ធីតរោ;

ឯកបុត្តា ទុបុត្តា ច, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, បិង្គលា តិលកាហតា;

សោត្តំ បាទេន ពោធេតិ, តេនាហំ ព្រាហ្មណា សុខី.

‘‘ន ហិ មយ្ហំ ព្រាហ្មណ, បច្ចូសម្ហិ ឥណាយិកា;

ទេថ ទេថាតិ ចោទេន្តិ, តេនាហំ ព្រាហ្មណា សុខី’’តិ.

ឯវំ វុត្តេ, ភារទ្វាជគោត្តោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម, អភិក្កន្តំ, ភោ គោតម! សេយ្យថាបិ, ភោ គោតម, និក្កុជ្ជិតំ វា ឧក្កុជ្ជេយ្យ, បដិច្ឆន្នំ វា វិវរេយ្យ, មូឡ្ហស្ស វា មគ្គំ អាចិក្ខេយ្យ, អន្ធការេ វា តេលបជ្ជោតំ ធារេយ្យ – ចក្ខុមន្តោ រូបានិ ទក្ខន្តីតិ; ឯវមេវ ភោតា គោតមេន អនេកបរិយាយេន ធម្មោ បកាសិតោ. ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច. លភេយ្យាហំ ភោតោ គោតមស្ស សន្តិកេ បព្ពជ្ជំ, លភេយ្យំ ឧបសម្បទ’’ន្តិ.

អលត្ថ ខោ ភារទ្វាជគោត្តោ ព្រាហ្មណោ ភគវតោ សន្តិកេ បព្ពជ្ជំ, អលត្ថ ឧបសម្បទំ. អចិរូបសម្បន្នោ បនាយស្មា ភារទ្វាជោ ឯកោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ – យស្សត្ថាយ កុលបុត្តា សម្មទេវ អគារស្មា អនគារិយំ បព្ពជន្តិ, តទនុត្តរំ – ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហាសិ. ‘‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’’តិ អព្ភញ្ញាសិ. អញ្ញតរោ ច បនាយស្មា ភារទ្វាជោ អរហតំ អហោសីតិ.

អរហន្តវគ្គោ បឋមោ.

តស្សុទ្ទានំ –

ធនញ្ជានី ច អក្កោសំ, អសុរិន្ទំ ពិលង្គិកំ;

អហិំសកំ ជដា ចេវ, សុទ្ធិកញ្ចេវ អគ្គិកា;

សុន្ទរិកំ ពហុធីតរេន ច តេ ទសាតិ.