៥. ទាមលិសុត្តំ

៨៦. សាវត្ថិនិទានំ. អថ ខោ ទាមលិ ទេវបុត្តោ អភិក្កន្តាយ រត្តិយា អភិក្កន្តវណ្ណោ កេវលកប្បំ ជេតវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតោ ខោ ទាមលិ ទេវបុត្តោ ភគវតោ សន្តិកេ ឥមំ គាថំ អភាសិ –

‘‘ករណីយមេតំ ព្រាហ្មណេន, បធានំ អកិលាសុនា;

កាមានំ វិប្បហានេន, ន តេនាសីសតេ ភវ’’ន្តិ.

‘‘នត្ថិ កិច្ចំ ព្រាហ្មណស្ស (ទាមលីតិ ភគវា),

កតកិច្ចោ ហិ ព្រាហ្មណោ.

‘‘យាវ ន គាធំ លភតិ នទីសុ,

អាយូហតិ សព្ពគត្តេភិ ជន្តុ;

គាធញ្ច លទ្ធាន ថលេ ឋិតោ យោ,

នាយូហតី បារគតោ ហិ សោវ [សោតិ (សី. បី. ក.), ហោតិ (ស្យា. កំ.), សោ (?)].

‘‘ឯសូបមា ទាមលិ ព្រាហ្មណស្ស,

ខីណាសវស្ស និបកស្ស ឈាយិនោ;

បប្បុយ្យ ជាតិមរណស្ស អន្តំ,

នាយូហតី បារគតោ ហិ សោ’’តិ [ហោតីតិ (ស្យា. កំ.)].