៦. កាមទសុត្តំ

៨៧. សាវត្ថិនិទានំ. ឯកមន្តំ ឋិតោ ខោ កាមទោ ទេវបុត្តោ ភគវន្តំ ឯតទវោច – ‘‘ទុក្ករំ ភគវា, សុទុក្ករំ ភគវា’’តិ.

‘‘ទុក្ករំ វាបិ ករោន្តិ (កាមទាតិ ភគវា),

សេខា សីលសមាហិតា;

ឋិតត្តា អនគារិយុបេតស្ស,

តុដ្ឋិ ហោតិ សុខាវហា’’តិ.

‘‘ទុល្លភា ភគវា យទិទំ តុដ្ឋី’’តិ.

‘‘ទុល្លភំ វាបិ លភន្តិ (កាមទាតិ ភគវា),

ចិត្តវូបសមេ រតា;

យេសំ ទិវា ច រត្តោ ច,

ភាវនាយ រតោ មនោ’’តិ.

‘‘ទុស្សមាទហំ ភគវា យទិទំ ចិត្ត’’ន្តិ.

‘‘ទុស្សមាទហំ វាបិ សមាទហន្តិ (កាមទាតិ ភគវា),

ឥន្ទ្រិយូបសមេ រតា;

តេ ឆេត្វា មច្ចុនោ ជាលំ,

អរិយា គច្ឆន្តិ កាមទា’’តិ.

‘‘ទុគ្គមោ ភគវា វិសមោ មគ្គោ’’តិ.

‘‘ទុគ្គមេ វិសមេ វាបិ, អរិយា គច្ឆន្តិ កាមទ;

អនរិយា វិសមេ មគ្គេ, បបតន្តិ អវំសិរា;

អរិយានំ សមោ មគ្គោ, អរិយា ហិ វិសមេ សមា’’តិ.