៦. នជីរតិសុត្តំ

៧៦. ‘‘កិំ ជីរតិ កិំ ន ជីរតិ, កិំសុ ឧប្បថោតិ វុច្ចតិ;

កិំសុ ធម្មានំ បរិបន្ថោ, កិំសុ រត្តិន្ទិវក្ខយោ;

កិំ មលំ ព្រហ្មចរិយស្ស, កិំ សិនានមនោទកំ.

‘‘កតិ លោកស្មិំ ឆិទ្ទានិ, យត្ថ វិត្តំ [ចិត្តំ (សី. ស្យា. កំ. បី.)] ន តិដ្ឋតិ;

ភគវន្តំ បុដ្ឋុមាគម្ម, កថំ ជានេមុ តំ មយ’’ន្តិ.

‘‘រូបំ ជីរតិ មច្ចានំ, នាមគោត្តំ ន ជីរតិ;

រាគោ ឧប្បថោតិ វុច្ចតិ.

‘‘លោភោ ធម្មានំ បរិបន្ថោ, វយោ រត្តិន្ទិវក្ខយោ;

ឥត្ថី មលំ ព្រហ្មចរិយស្ស, ឯត្ថាយំ សជ្ជតេ បជា;

តបោ ច ព្រហ្មចរិយញ្ច, តំ សិនានមនោទកំ.

‘‘ឆ លោកស្មិំ ឆិទ្ទានិ, យត្ថ វិត្តំ ន តិដ្ឋតិ;

អាលស្យញ្ច [អាលស្សញ្ច (សី. បី.)] បមាទោ ច, អនុដ្ឋានំ អសំយមោ;

និទ្ទា តន្ទី [តន្ទិ (សី.)] ច តេ ឆិទ្ទេ, សព្ពសោ តំ វិវជ្ជយេ’’តិ.