១១. អរណសុត្តំ

៨១. ‘‘កេសូធ អរណា លោកេ, កេសំ វុសិតំ ន នស្សតិ;

កេធ ឥច្ឆំ បរិជានន្តិ, កេសំ ភោជិស្សិយំ សទា.

‘‘កិំសុ មាតា បិតា ភាតា, វន្ទន្តិ នំ បតិដ្ឋិតំ;

កិំសុ ឥធ ជាតិហីនំ, អភិវាទេន្តិ ខត្តិយា’’តិ.

‘‘សមណីធ អរណា លោកេ, សមណានំ វុសិតំ ន នស្សតិ;

សមណា ឥច្ឆំ បរិជានន្តិ, សមណានំ ភោជិស្សិយំ សទា.

‘‘សមណំ មាតា បិតា ភាតា, វន្ទន្តិ នំ បតិដ្ឋិតំ;

សមណីធ ជាតិហីនំ, អភិវាទេន្តិ ខត្តិយា’’តិ.

ឆេត្វាវគ្គោ អដ្ឋមោ.

តស្សុទ្ទានំ –

ឆេត្វា រថញ្ច ចិត្តញ្ច, វុដ្ឋិ ភីតា នជីរតិ;

ឥស្សរំ កាមំ បាថេយ្យំ, បជ្ជោតោ អរណេន ចាតិ.

ទេវតាសំយុត្តំ សមត្តំ.