១០. ឃដីការសុត្តំ

៥០. ‘‘អវិហំ ឧបបន្នាសេ, វិមុត្តា សត្ត ភិក្ខវោ;

រាគទោសបរិក្ខីណា, តិណ្ណា លោកេ វិសត្តិក’’ន្តិ.

‘‘កេ ច តេ អតរុំ បង្កំ [សង្គំ (សី. ស្យា.)], មច្ចុធេយ្យំ សុទុត្តរំ;

កេ ហិត្វា មានុសំ ទេហំ, ទិព្ពយោគំ ឧបច្ចគុ’’ន្តិ.

‘‘ឧបកោ បលគណ្ឌោ ច, បុក្កុសាតិ ច តេ តយោ;

ភទ្ទិយោ ខណ្ឌទេវោ ច, ពាហុរគ្គិ ច សិង្គិយោ [ពហុទន្តី ច បិង្គយោ (សី.)];

តេ ហិត្វា មានុសំ ទេហំ, ទិព្ពយោគំ ឧបច្ចគុ’’ន្តិ.

‘‘កុសលី ភាសសី តេសំ, មារបាសប្បហាយិនំ;

កស្ស តេ ធម្មមញ្ញាយ, អច្ឆិទុំ ភវពន្ធន’’ន្តិ.

‘‘ន អញ្ញត្រ ភគវតា, នាញ្ញត្រ តវ សាសនា;

យស្ស តេ ធម្មមញ្ញាយ, អច្ឆិទុំ ភវពន្ធនំ.

‘‘យត្ថ នាមញ្ច រូបញ្ច, អសេសំ ឧបរុជ្ឈតិ;

តំ តេ ធម្មំ ឥធញ្ញាយ, អច្ឆិទុំ ភវពន្ធន’’ន្តិ.

‘‘គម្ភីរំ ភាសសី វាចំ, ទុព្ពិជានំ សុទុព្ពុធំ;

កស្ស ត្វំ ធម្មមញ្ញាយ, វាចំ ភាសសិ ឦទិស’’ន្តិ.

‘‘កុម្ភការោ បុរេ អាសិំ, វេកឡិង្គេ [វេហឡិង្គេ (សី.), វេភឡិង្គេ (ស្យា. កំ.)] ឃដីករោ;

មាតាបេត្តិភរោ អាសិំ, កស្សបស្ស ឧបាសកោ.

‘‘វិរតោ មេថុនា ធម្មា, ព្រហ្មចារី និរាមិសោ;

អហុវា តេ សគាមេយ្យោ, អហុវា តេ បុរេ សខា.

‘‘សោហមេតេ បជានាមិ, វិមុត្តេ សត្ត ភិក្ខវោ;

រាគទោសបរិក្ខីណេ, តិណ្ណេ លោកេ វិសត្តិក’’ន្តិ.

‘‘ឯវមេតំ តទា អាសិ, យថា ភាសសិ ភគ្គវ;

កុម្ភការោ បុរេ អាសិ, វេកឡិង្គេ ឃដីករោ;

មាតាបេត្តិភរោ អាសិ, កស្សបស្ស ឧបាសកោ.

‘‘វិរតោ មេថុនា ធម្មា, ព្រហ្មចារី និរាមិសោ;

អហុវា មេ សគាមេយ្យោ, អហុវា មេ បុរេ សខា’’តិ.

‘‘ឯវមេតំ បុរាណានំ, សហាយានំ អហុ សង្គមោ;

ឧភិន្នំ ភាវិតត្តានំ, សរីរន្តិមធារិន’’ន្តិ.

អាទិត្តវគ្គោ បញ្ចមោ.

តស្សុទ្ទានំ –

អាទិត្តំ កិំទទំ អន្នំ, ឯកមូលអនោមិយំ;

អច្ឆរាវនរោបជេតំ, មច្ឆរេន ឃដីករោតិ.