៣. សត្តិវគ្គោ

១. សត្តិសុត្តំ

២១. សាវត្ថិនិទានំ. ឯកមន្តំ ឋិតា ខោ សា ទេវតា ភគវតោ សន្តិកេ ឥមំ គាថំ អភាសិ –

‘‘សត្តិយា វិយ ឱមដ្ឋោ, ឌយ្ហមានោវ [ឌយ្ហមានេវ (សព្ពត្ថ)] មត្ថកេ;

កាមរាគប្បហានាយ, សតោ ភិក្ខុ បរិព្ពជេ’’តិ.

‘‘សត្តិយា វិយ ឱមដ្ឋោ, ឌយ្ហមានោវ មត្ថកេ;

សក្កាយទិដ្ឋិប្បហានាយ, សតោ ភិក្ខុ បរិព្ពជេ’’តិ.

២. ផុសតិសុត្តំ

២២. ‘‘នាផុសន្តំ ផុសតិ ច, ផុសន្តញ្ច តតោ ផុសេ;

តស្មា ផុសន្តំ ផុសតិ, អប្បទុដ្ឋបទោសិន’’ន្តិ.

‘‘យោ អប្បទុដ្ឋស្ស នរស្ស ទុស្សតិ,

សុទ្ធស្ស បោសស្ស អនង្គណស្ស;

តមេវ ពាលំ បច្ចេតិ បាបំ,

សុខុមោ រជោ បដិវាតំវ ខិត្តោ’’តិ.

៣. ជដាសុត្តំ

២៣. ‘‘អន្តោ ជដា ពហិ ជដា, ជដាយ ជដិតា បជា;

តំ តំ គោតម បុច្ឆាមិ, កោ ឥមំ វិជដយេ ជដ’’ន្តិ.

‘‘សីលេ បតិដ្ឋាយ នរោ សបញ្ញោ, ចិត្តំ បញ្ញញ្ច ភាវយំ;

អាតាបី និបកោ ភិក្ខុ, សោ ឥមំ វិជដយេ ជដំ.

‘‘យេសំ រាគោ ច ទោសោ ច, អវិជ្ជា ច វិរាជិតា;

ខីណាសវា អរហន្តោ, តេសំ វិជដិតា ជដា.

‘‘យត្ថ នាមញ្ច រូបញ្ច, អសេសំ ឧបរុជ្ឈតិ;

បដិឃំ រូបសញ្ញា ច, ឯត្ថេសា ឆិជ្ជតេ [វិជដេ (ក.)] ជដា’’តិ.

៤. មនោនិវារណសុត្តំ

២៤. ‘‘យតោ យតោ មនោ និវារយេ,

ន ទុក្ខមេតិ នំ តតោ តតោ;

ស សព្ពតោ មនោ និវារយេ,

ស សព្ពតោ ទុក្ខា បមុច្ចតិ’’.

‘‘ន សព្ពតោ មនោ និវារយេ,

ន មនោ សំយតត្តមាគតំ;

យតោ យតោ ច បាបកំ,

តតោ តតោ មនោ និវារយេ’’តិ.

៥. អរហន្តសុត្តំ

២៥. ‘‘យោ ហោតិ ភិក្ខុ អរហំ កតាវី,

ខីណាសវោ អន្តិមទេហធារី;

អហំ វទាមីតិបិ សោ វទេយ្យ,

មមំ វទន្តីតិបិ សោ វទេយ្យា’’តិ.

‘‘យោ ហោតិ ភិក្ខុ អរហំ កតាវី,

ខីណាសវោ អន្តិមទេហធារី;

អហំ វទាមីតិបិ សោ វទេយ្យ,

មមំ វទន្តីតិបិ សោ វទេយ្យ;

លោកេ សមញ្ញំ កុសលោ វិទិត្វា,

វោហារមត្តេន សោ [ស (?)] វោហរេយ្យា’’តិ.

‘‘យោ ហោតិ ភិក្ខុ អរហំ កតាវី,

ខីណាសវោ អន្តិមទេហធារី;

មានំ នុ ខោ សោ ឧបគម្ម ភិក្ខុ,

អហំ វទាមីតិបិ សោ វទេយ្យ;

មមំ វទន្តីតិបិ សោ វទេយ្យា’’តិ.

‘‘បហីនមានស្ស ន សន្តិ គន្ថា,

វិធូបិតា មានគន្ថស្ស សព្ពេ;

ស វីតិវត្តោ មញ្ញតំ [មាននំ (សី.), មញ្ញីតំ (?)] សុមេធោ,

អហំ វទាមីតិបិ សោ វទេយ្យ.

‘‘មមំ វទន្តីតិបិ សោ វទេយ្យ;

លោកេ សមញ្ញំ កុសលោ វិទិត្វា;

វោហារមត្តេន សោ វោហរេយ្យា’’តិ.

៦. បជ្ជោតសុត្តំ

២៦. ‘‘កតិ លោកស្មិំ បជ្ជោតា, យេហិ លោកោ បកាសតិ [បភាសតិ (ក. សី.)];

ភគវន្តំ [ភវន្តំ (ក.)] បុដ្ឋុមាគម្ម, កថំ ជានេមុ តំ មយ’’ន្តិ.

‘‘ចត្តារោ លោកេ បជ្ជោតា, បញ្ចមេត្ថ ន វិជ្ជតិ;

ទិវា តបតិ អាទិច្ចោ, រត្តិមាភាតិ ចន្ទិមា.

‘‘អថ អគ្គិ ទិវារត្តិំ, តត្ថ តត្ថ បកាសតិ;

សម្ពុទ្ធោ តបតំ សេដ្ឋោ, ឯសា អាភា អនុត្តរា’’តិ.

៧. សរសុត្តំ

២៧. ‘‘កុតោ សរា និវត្តន្តិ, កត្ថ វដ្ដំ ន វត្តតិ;

កត្ថ នាមញ្ច រូបញ្ច, អសេសំ ឧបរុជ្ឈតី’’តិ.

‘‘យត្ថ អាបោ ច បថវី, តេជោ វាយោ ន គាធតិ;

អតោ សរា និវត្តន្តិ, ឯត្ថ វដ្ដំ ន វត្តតិ;

ឯត្ថ នាមញ្ច រូបញ្ច, អសេសំ ឧបរុជ្ឈតី’’តិ.

៨. មហទ្ធនសុត្តំ

២៨. ‘‘មហទ្ធនា មហាភោគា, រដ្ឋវន្តោបិ ខត្តិយា;

អញ្ញមញ្ញាភិគិជ្ឈន្តិ, កាមេសុ អនលង្កតា.

‘‘តេសុ ឧស្សុក្កជាតេសុ, ភវសោតានុសារិសុ;

កេធ តណ្ហំ [រោធតណ្ហំ (ស្យា. កំ.), គេធតណ្ហំ (ក.)] បជហិំសុ [បវាហិំសុ (ស្យា. កំ. ក.)], កេ លោកស្មិំ អនុស្សុកា’’តិ.

‘‘ហិត្វា អគារំ បព្ពជិតា, ហិត្វា បុត្តំ បសុំ វិយំ;

ហិត្វា រាគញ្ច ទោសញ្ច, អវិជ្ជញ្ច វិរាជិយ;

ខីណាសវា អរហន្តោ, តេ លោកស្មិំ អនុស្សុកា’’តិ.

៩. ចតុចក្កសុត្តំ

២៩. ‘‘ចតុចក្កំ នវទ្វារំ, បុណ្ណំ លោភេន សំយុតំ;

បង្កជាតំ មហាវីរ, កថំ យាត្រា ភវិស្សតី’’តិ.

‘‘ឆេត្វា នទ្ធិំ វរត្តញ្ច, ឥច្ឆា លោភញ្ច បាបកំ;

សមូលំ តណ្ហមព្ពុយ្ហ, ឯវំ យាត្រា ភវិស្សតី’’តិ.

១០. ឯណិជង្ឃសុត្តំ

៣០. ‘‘ឯណិជង្ឃំ កិសំ វីរំ, អប្បាហារំ អលោលុបំ;

សីហំ វេកចរំ នាគំ, កាមេសុ អនបេក្ខិនំ;

ឧបសង្កម្ម បុច្ឆាម, កថំ ទុក្ខា បមុច្ចតី’’តិ.

‘‘បញ្ច កាមគុណា លោកេ, មនោឆដ្ឋា បវេទិតា;

ឯត្ថ ឆន្ទំ វិរាជេត្វា, ឯវំ ទុក្ខា បមុច្ចតី’’តិ.

សត្តិវគ្គោ តតិយោ.

តស្សុទ្ទានំ –

សត្តិយា ផុសតិ ចេវ, ជដា មនោនិវារណា;

អរហន្តេន បជ្ជោតោ, សរា មហទ្ធនេន ច;

ចតុចក្កេន នវមំ, ឯណិជង្ឃេន តេ ទសាតិ.