៧. កណ្ឌកវិមានវត្ថុ

១១៧១. ‘‘បុណ្ណមាសេ យថា ចន្ទោ, នក្ខត្តបរិវារិតោ;

សមន្តា អនុបរិយាតិ, តារកាធិបតី សសី.

១១៧២. ‘‘តថូបមំ ឥទំ ព្យម្ហំ, ទិព្ពំ ទេវបុរម្ហិ ច;

អតិរោចតិ វណ្ណេន, ឧទយន្តោវ រំសិមា.

១១៧៣. ‘‘វេឡុរិយសុវណ្ណស្ស, ផលិកា រូបិយស្ស ច;

មសារគល្លមុត្តាហិ, លោហិតង្គមណីហិ ច.

១១៧៤. ‘‘ចិត្រា មនោរមា ភូមិ, វេឡូរិយស្ស សន្ថតា;

កូដាគារា សុភា រម្មា, បាសាទោ តេ សុមាបិតោ.

១១៧៥. ‘‘រម្មា ច តេ បោក្ខរណី, បុថុលោមនិសេវិតា;

អច្ឆោទកា វិប្បសន្នា, សោវណ្ណវាលុកសន្ថតា.

១១៧៦. ‘‘នានាបទុមសញ្ឆន្នា, បុណ្ឌរីកសមោតតា [សមោត្ថតា (ក.), សមោគតា (ស្យា.)];

សុរភិំ សម្បវាយន្តិ, មនុញ្ញា មាលុតេរិតា.

១១៧៧. ‘‘តស្សា តេ ឧភតោ បស្សេ, វនគុម្ពា សុមាបិតា;

ឧបេតា បុប្ផរុក្ខេហិ, ផលរុក្ខេហិ ចូភយំ.

១១៧៨. ‘‘សោវណ្ណបាទេ បល្លង្កេ, មុទុកេ គោណកត្ថតេ [ចោលសន្ថតេ (សី.)];

និសិន្នំ ទេវរាជំវ, ឧបតិដ្ឋន្តិ អច្ឆរា.

១១៧៩. ‘‘សព្ពាភរណសញ្ឆន្នា, នានាមាលាវិភូសិតា;

រមេន្តិ តំ មហិទ្ធិកំ, វសវត្តីវ មោទសិ.

១១៨០. ‘‘ភេរិសង្ខមុទិង្គាហិ, វីណាហិ បណវេហិ ច;

រមសិ រតិសម្បន្នោ, នច្ចគីតេ សុវាទិតេ.

១១៨១. ‘‘ទិព្ពា តេ វិវិធា រូបា, ទិព្ពា សទ្ទា អថោ រសា;

គន្ធា ច តេ អធិប្បេតា, ផោដ្ឋព្ពា ច មនោរមា.

១១៨២. ‘‘តស្មិំ វិមានេ បវរេ, ទេវបុត្ត មហប្បភោ;

អតិរោចសិ វណ្ណេន, ឧទយន្តោវ ភាណុមា.

១១៨៣. ‘‘ទានស្ស តេ ឥទំ ផលំ, អថោ សីលស្ស វា បន;

អថោ អញ្ជលិកម្មស្ស, តំ មេ អក្ខាហិ បុច្ឆិតោ’’.

១១៨៤. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១៨៥. ‘‘អហំ កបិលវត្ថុស្មិំ, សាកិយានំ បុរុត្តមេ;

សុទ្ធោទនស្ស បុត្តស្ស, កណ្ឌកោ សហជោ អហំ.

១១៨៦. ‘‘យទា សោ អឌ្ឍរត្តាយំ, ពោធាយ មភិនិក្ខមិ;

សោ មំ មុទូហិ បាណីហិ, ជាលិ [ជាល (សី.)] តម្ពនខេហិ ច.

១១៨៧. ‘‘សត្ថិំ អាកោដយិត្វាន, វហ សម្មាតិ ចព្រវិ;

អហំ លោកំ តារយិស្សំ, បត្តោ សម្ពោធិមុត្តមំ.

១១៨៨. ‘‘តំ មេ គិរំ សុណន្តស្ស, ហាសោ មេ វិបុលោ អហុ;

ឧទគ្គចិត្តោ សុមនោ, អភិសីសិំ [អភិសិំសិំ (សី.), អភិសីសិ (បី.)] តទា អហំ.

១១៨៩. ‘‘អភិរូឡ្ហញ្ច មំ ញត្វា, សក្យបុត្តំ មហាយសំ;

ឧទគ្គចិត្តោ មុទិតោ, វហិស្សំ បុរិសុត្តមំ.

១១៩០. ‘‘បរេសំ វិជិតំ គន្ត្វា, ឧគ្គតស្មិំ ទិវាករេ [ទិវង្ករេ (ស្យា. ក.)];

មមំ ឆន្នញ្ច ឱហាយ, អនបេក្ខោ សោ អបក្កមិ.

១១៩១. ‘‘តស្ស តម្ពនខេ បាទេ, ជិវ្ហាយ បរិលេហិសំ;

គច្ឆន្តញ្ច មហាវីរំ, រុទមានោ ឧទិក្ខិសំ.

១១៩២. ‘‘អទស្សនេនហំ តស្ស, សក្យបុត្តស្ស សិរីមតោ;

អលត្ថំ គរុកាពាធំ, ខិប្បំ មេ មរណំ អហុ.

១១៩៣. ‘‘តស្សេវ អានុភាវេន, វិមានំ អាវសាមិទំ;

សព្ពកាមគុណោបេតំ, ទិព្ពំ ទេវបុរម្ហិ ច.

១១៩៤. ‘‘យញ្ច មេ អហុវា ហាសោ, សទ្ទំ សុត្វាន ពោធិយា;

តេនេវ កុសលមូលេន, ផុសិស្សំ អាសវក្ខយំ.

១១៩៥. ‘‘សចេ ហិ ភន្តេ គច្ឆេយ្យាសិ, សត្ថុ ពុទ្ធស្ស សន្តិកេ;

មមាបិ នំ វចនេន, សិរសា វជ្ជាសិ វន្ទនំ.

១១៩៦. ‘‘អហម្បិ ទដ្ឋុំ គច្ឆិស្សំ, ជិនំ អប្បដិបុគ្គលំ;

ទុល្លភំ ទស្សនំ ហោតិ, លោកនាថាន តាទិន’’ន្តិ.

១១៩៧. សោ កតញ្ញូ កតវេទី, សត្ថារំ ឧបសង្កមិ;

សុត្វា គិរំ ចក្ខុមតោ, ធម្មចក្ខុំ វិសោធយិ.

១១៩៨. វិសោធេត្វា ទិដ្ឋិគតំ, វិចិកិច្ឆំ វតានិ ច;

វន្ទិត្វា សត្ថុនោ បាទេ, តត្ថេវន្តរធាយថាតិ [តត្ថេវន្តរធាយតីតិ (ក.)].

កណ្ឌកវិមានំ សត្តមំ.