នមោ តស្ស ភគវតោ អរហតោ សម្មាសម្ពុទ្ធស្ស

ខុទ្ទកនិកាយេ

វិមានវត្ថុបាឡិ

១. ឥត្ថិវិមានំ

១. បីឋវគ្គោ

១. បឋមបីឋវិមានវត្ថុ

១. ‘‘បីឋំ តេ សោវណ្ណមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ [មាល្យធរេ (ស្យា.)] សុវត្ថេ, ឱភាសសិ វិជ្ជុរិវព្ភកូដំ.

២. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

៣. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

៤. សា ទេវតា អត្តមនា, មោគ្គល្លានេន [មោគ្គលានេន (ក.) ឯវមុបរិបិ] បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

៥. ‘‘អហំ មនុស្សេសុ មនុស្សភូតា, អព្ភាគតានាសនកំ អទាសិំ;

អភិវាទយិំ អញ្ជលិកំ អកាសិំ, យថានុភាវញ្ច អទាសិ ទានំ.

៦. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៧. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

បឋមបីឋវិមានំ បឋមំ.

២. ទុតិយបីឋវិមានវត្ថុ

៨. ‘‘បីឋំ តេ វេឡុរិយមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភកូដំ.

៩. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១០. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១១. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

១២. ‘‘អហំ មនុស្សេសុ មនុស្សភូតា, អព្ភាគតានាសនកំ អទាសិំ;

អភិវាទយិំ អញ្ជលិកំ អកាសិំ, យថានុភាវញ្ច អទាសិ ទានំ.

១៣. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

១៤. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

ទុតិយបីឋវិមានំ ទុតិយំ.

៣. តតិយបីឋវិមានវត្ថុ

១៥. ‘‘បីឋំ តេ សោវណ្ណមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភកូដំ.

១៦. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១៧. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១៨. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

១៩. ‘‘អប្បស្ស កម្មស្ស ផលំ មមេទំ [មមេតំ (ក.)], យេនម្ហិ [តេនម្ហិ (ក.)] ឯវំ ជលិតានុភាវា;

អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ.

២០. ‘‘អទ្ទសំ វិរជំ ភិក្ខុំ, វិប្បសន្នមនាវិលំ;

តស្ស អទាសហំ បីឋំ, បសន្នា សេហិ បាណិភិ.

២១. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

២២. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

តតិយបីឋវិមានំ តតិយំ.

៤. ចតុត្ថបីឋវិមានវត្ថុ

២៣. ‘‘បីឋំ តេ វេឡុរិយមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភកូដំ.

២៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

២៥. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

២៦. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

២៧. ‘‘អប្បស្ស កម្មស្ស ផលំ មមេទំ, យេនម្ហិ ឯវំ ជលិតានុភាវា;

អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ.

២៨. ‘‘អទ្ទសំ វិរជំ ភិក្ខុំ, វិប្បសន្នមនាវិលំ;

តស្ស អទាសហំ បីឋំ, បសន្នា សេហិ បាណិភិ.

២៩. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៣០. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

ចតុត្ថបីឋវិមានំ ចតុត្ថំ.

៥. កុញ្ជរវិមានវត្ថុ

៣១. ‘‘កុញ្ជរោ តេ វរារោហោ, នានារតនកប្បនោ;

រុចិរោ ថាមវា ជវសម្បន្នោ, អាកាសម្ហិ សមីហតិ.

៣២. ‘‘បទុមិ បទ្ម [បទុម… (សី. ស្យា.) ឯវមុបរិបិ] បត្តក្ខិ, បទ្មុប្បលជុតិន្ធរោ;

បទ្មចុណ្ណាភិកិណ្ណង្គោ, សោណ្ណបោក្ខរមាលធា [… មាលវា (សី. ស្យា.)].

៣៣. ‘‘បទុមានុសដំ មគ្គំ, បទ្មបត្តវិភូសិតំ.

ឋិតំ វគ្គុមនុគ្ឃាតី, មិតំ គច្ឆតិ វារណោ.

៣៤. ‘‘តស្ស បក្កមមានស្ស, សោណ្ណកំសា រតិស្សរា;

តេសំ សុយ្យតិ និគ្ឃោសោ, តុរិយេ បញ្ចង្គិកេ យថា.

៣៥. ‘‘តស្ស នាគស្ស ខន្ធម្ហិ, សុចិវត្ថា អលង្កតា;

មហន្តំ អច្ឆរាសង្ឃំ, វណ្ណេន អតិរោចសិ.

៣៦. ‘‘ទានស្ស តេ ឥទំ ផលំ, អថោ សីលស្ស វា បន;

អថោ អញ្ជលិកម្មស្ស, តំ មេ អក្ខាហិ បុច្ឆិតា’’តិ;

៣៧. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

៣៨. ‘‘ទិស្វាន គុណសម្បន្នំ, ឈាយិំ ឈានរតំ សតំ;

អទាសិំ បុប្ផាភិកិណ្ណំ, អាសនំ ទុស្សសន្ថតំ.

៣៩. ‘‘ឧបឌ្ឍំ បទ្មមាលាហំ, អាសនស្ស សមន្តតោ;

អព្ភោកិរិស្សំ បត្តេហិ, បសន្នា សេហិ បាណិភិ.

៤០. ‘‘តស្ស កម្មកុសលស្ស [កម្មស្ស កុសលស្ស (សី. បី.)], ឥទំ មេ ឦទិសំ ផលំ;

សក្ការោ គរុការោ ច, ទេវានំ អបចិតា អហំ.

៤១. ‘‘យោ វេ សម្មាវិមុត្តានំ, សន្តានំ ព្រហ្មចារិនំ;

បសន្នោ អាសនំ ទជ្ជា, ឯវំ នន្ទេ យថា អហំ.

៤២. ‘‘តស្មា ហិ អត្តកាមេន [អត្ថកាមេន (ក.)], មហត្តមភិកង្ខតា;

អាសនំ ទាតព្ពំ ហោតិ, សរីរន្តិមធារិន’’ន្តិ.

កុញ្ជរវិមានំ បញ្ចមំ.

៦. បឋមនាវាវិមានវត្ថុ

៤៣. ‘‘សុវណ្ណច្ឆទនំ នាវំ, នារិ អារុយ្ហ តិដ្ឋសិ;

ឱគាហសិ បោក្ខរណិំ, បទ្មំ [បទុមំ (សី. ស្យា.)] ឆិន្ទសិ បាណិនា.

៤៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

៤៥. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

៤៦. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

៤៧. ‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;

ទិស្វាន ភិក្ខូ តសិតេ កិលន្តេ, ឧដ្ឋាយ បាតុំ ឧទកំ អទាសិំ.

៤៨. ‘‘យោ វេ កិលន្តាន បិបាសិតានំ, ឧដ្ឋាយ បាតុំ ឧទកំ ទទាតិ;

សីតោទកា [សីតោទិកា (សី.)] តស្ស ភវន្តិ នជ្ជោ, បហូតមល្យា ពហុបុណ្ឌរីកា.

៤៩. ‘‘តំ អាបគា [តមាបគា (សី. ក.)] អនុបរិយន្តិ សព្ពទា, សីតោទកា វាលុកសន្ថតា នទី;

អម្ពា ច សាលា តិលកា ច ជម្ពុយោ, ឧទ្ទាលកា បាដលិយោ ច ផុល្លា.

៥០. ‘‘តំ ភូមិភាគេហិ ឧបេតរូបំ, វិមានសេដ្ឋំ ភុសសោភមានំ;

តស្សីធ [តស្សេវ (ស្យា.)] កម្មស្ស អយំ វិបាកោ, ឯតាទិសំ បុញ្ញកតា [កតបុញ្ញា (សី.)] លភន្តិ.

៥១. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៥២. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

បឋមនាវាវិមានំ ឆដ្ឋំ.

៧. ទុតិយនាវាវិមានវត្ថុ

៥៣. ‘‘សុវណ្ណច្ឆទនំ នាវំ, នារិ អារុយ្ហ តិដ្ឋសិ;

ឱគាហសិ បោក្ខរណិំ, បទ្មំ ឆិន្ទសិ បាណិនា.

៥៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

៥៥. ‘‘បុច្ឆាមិ តំ ទេវិ មហានុភាវេ, មនុស្សភុតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

៥៦. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

៥៧. ‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;

ទិស្វាន ភិក្ខុំ តសិតំ កិលន្តំ, ឧដ្ឋាយ បាតុំ ឧទកំ អទាសិំ.

៥៨. ‘‘យោ វេ កិលន្តស្ស បិបាសិតស្ស, ឧដ្ឋាយ បាតុំ ឧទកំ ទទាតិ;

សីតោទកា តស្ស ភវន្តិ នជ្ជោ, បហូតមល្យា ពហុបុណ្ឌរីកា.

៥៩. ‘‘តំ អាបគា អនុបរិយន្តិ សព្ពទា, សីតោទកា វាលុកសន្ថតា នទី;

អម្ពា ច សាលា តិលកា ច ជម្ពុយោ, ឧទ្ទាលកា បាដលិយោ ច ផុល្លា.

៦០. ‘‘តំ ភូមិភាគេហិ ឧបេតរូបំ, វិមានសេដ្ឋំ ភុសសោភមានំ;

តស្សីធ កម្មស្ស អយំ វិបាកោ, ឯតាទិសំ បុញ្ញកតា លភន្តិ.

៦១. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៦២. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

ទុតិយនាវាវិមានំ សត្តមំ.

៨. តតិយនាវាវិមានវត្ថុ

៦៣. ‘‘សុវណ្ណច្ឆទនំ នាវំ, នារិ អារុយ្ហ តិដ្ឋសិ;

ឱគាហសិ បោក្ខរណិំ, បទ្មំ ឆិន្ទសិ បាណិនា.

៦៤. ‘‘កូដាគារា និវេសា តេ, វិភត្តា ភាគសោ មិតា;

ទទ្ទល្លមានា [ទទ្ទឡ្ហមានា (ក.)] អាភន្តិ, សមន្តា ចតុរោ ទិសា.

៦៥. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.