៨. អនេកវណ្ណវិមានវត្ថុ

១១៩៩. ‘‘អនេកវណ្ណំ ទរសោកនាសនំ, វិមានមារុយ្ហ អនេកចិត្តំ;

បរិវារិតោ អច្ឆរាសង្គណេន, សុនិម្មិតោ ភូតបតីវ មោទសិ.

១២០០. ‘‘សមស្សមោ នត្ថិ កុតោ បនុត្តរោ [ឧត្តរិ (ក.)], យសេន បុញ្ញេន ច ឥទ្ធិយា ច;

សព្ពេ ច ទេវា តិទសគណា សមេច្ច, តំ តំ នមស្សន្តិ សសិំវ ទេវា;

ឥមា ច តេ អច្ឆរាយោ សមន្តតោ, នច្ចន្តិ គាយន្តិ បមោទយន្តិ.

១២០១. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១២០២. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១២០៣. ‘‘អហំ ភទន្តេ អហុវាសិ បុព្ពេ, សុមេធនាមស្ស ជិនស្ស សាវកោ;

បុថុជ្ជនោ អននុពោធោហមស្មិ [អនវពោធោហមស្មិំ (សី.), អននុពោធោហមាសិំ (?)], សោ សត្ត វស្សានិ បរិព្ពជិស្សហំ [បព្ពជិស្សហំ (ស្យា. ក.), បព្ពជិសាហំ (បី.)].

១២០៤. ‘‘សោហំ សុមេធស្ស ជិនស្ស សត្ថុនោ, បរិនិព្ពុតស្សោឃតិណ្ណស្ស តាទិនោ;

រតនុច្ចយំ ហេមជាលេន ឆន្នំ, វន្ទិត្វា ថូបស្មិំ មនំ បសាទយិំ.

១២០៥. ‘‘ន មាសិ ទានំ ន ច មត្ថិ ទាតុំ, បរេ ច ខោ តត្ថ សមាទបេសិំ;

បូជេថ នំ បូជនីយស្ស [បូជនេយ្យស្ស (ស្យា. ក.)] ធាតុំ, ឯវំ កិរ សគ្គមិតោ គមិស្សថ.

១២០៦. ‘‘តទេវ កម្មំ កុសលំ កតំ មយា, សុខញ្ច ទិព្ពំ អនុភោមិ អត្តនា;

មោទាមហំ តិទសគណស្ស មជ្ឈេ, ន តស្ស បុញ្ញស្ស ខយម្បិ អជ្ឈគ’’ន្តិ.

អនេកវណ្ណវិមានំ អដ្ឋមំ.