៧. សុនិក្ខិត្តវគ្គោ

១. ចិត្តលតាវិមានវត្ថុ

១១១៤. ‘‘យថា វនំ ចិត្តលតំ បភាសតិ, ឧយ្យានសេដ្ឋំ តិទសានមុត្តមំ;

តថូបមំ តុយ្ហមិទំ វិមានំ, ឱភាសយំ តិដ្ឋតិ អន្តលិក្ខេ.

១១១៥. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១១១៦. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១១៧. ‘‘អហំ មនុស្សេសុ មនុស្សភូតោ, ទលិទ្ទោ អតាណោ កបណោ កម្មករោ អហោសិំ;

ជិណ្ណេ ច មាតាបិតរោ អភារិំ [អភរិំ (សី. ស្យា.)], បិយា ច មេ សីលវន្តោ អហេសុំ;

អន្នញ្ច បានញ្ច បសន្នចិត្តោ, សក្កច្ច ទានំ វិបុលំ អទាសិ.

១១១៨. ‘‘តេន មេតាទិសោ វណ្ណោ…បេ… វណ្ណោ ច មេ សព្ពទិសា បភាសតី’’តិ.

ចិត្តលតាវិមានំ បឋមំ.

២. នន្ទនវិមានវត្ថុ

១១២០. ‘‘យថា វនំ នន្ទនំ [នន្ទនំ ចិត្តលតំ (សី. ស្យា. ក.), នន្ទវនំ (ក.)] បភាសតិ, ឧយ្យានសេដ្ឋំ តិទសានមុត្តមំ;

តថូបមំ តុយ្ហមិទំ វិមានំ, ឱភាសយំ តិដ្ឋតិ អន្តលិក្ខេ.

១១២១. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១១២២. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១២៣. ‘‘អហំ មនុស្សេសុ មនុស្សភូតោ, ទលិទ្ទោ អតាណោ កបណោ កម្មករោ អហោសិំ;

ជិណ្ណេ ច មាតាបិតរោ អភារិំ, បិយា ច មេ សីលវន្តោ អហេសុំ;

អន្នញ្ច បានញ្ច បសន្នចិត្តោ, សក្កច្ច ទានំ វិបុលំ អទាសិំ.

១១២៤. ‘‘តេន មេតាទិសោ វណ្ណោ…បេ… វណ្ណោ ច មេ សព្ពទិសា បភាសតី’’តិ.

នន្ទនវិមានំ ទុតិយំ.

៣. មណិថូណវិមានវត្ថុ

១១២៦. ‘‘ឧច្ចមិទំ មណិថូណំ វិមានំ, សមន្តតោ ទ្វាទស យោជនានិ;

កូដាគារា សត្តសតា ឧឡារា, វេឡុរិយថម្ភា រុចកត្ថតា សុភា.

១១២៧. ‘‘តត្ថច្ឆសិ បិវសិ ខាទសិ ច, ទិព្ពា ច វីណា បវទន្តិ វគ្គុំ;

ទិព្ពា រសា កាមគុណេត្ថ បញ្ច, នារិយោ ច នច្ចន្តិ សុវណ្ណឆន្នា.

១១២៨. ‘‘កេន តេតាទិសោ វណ្ណោ…បេ…វណ្ណោ ច តេ សព្ពទិសា បភាសតី’’តិ.

១១៣០. សោ ទេវបុត្តោ អត្តមនោ…បេ…យស្ស កម្មស្សិទំ ផលំ.

១១៣១. ‘‘អហំ មនុស្សេសុ មនុស្សភូតោ, វិវនេ បថេ សង្កមនំ [ចង្កមនំ (សី.), ចង្កមំ (ស្យា.), សមកំ (ក. សី.)] អកាសិំ;

អារាមរុក្ខានិ ច រោបយិស្សំ, បិយា ច មេ សីលវន្តោ អហេសុំ;

អន្នញ្ច បានញ្ច បសន្នចិត្តោ, សក្កច្ច ទានំ វិបុលំ អទាសិំ.

១១៣២. ‘‘តេន មេតាទិសោ វណ្ណោ…បេ… វណ្ណោ ច មេ សព្ពទិសា បភាសតី’’តិ.

មណិថូណវិមានំ តតិយំ.

៤. សុវណ្ណវិមានវត្ថុ

១១៣៤. ‘‘សោវណ្ណមយេ បព្ពតស្មិំ, វិមានំ សព្ពតោបភំ;

ហេមជាលបដិច្ឆន្នំ [ហេមជាលកបច្ឆន្នំ (សី.)], កិង្កិណិ [កិង្កណិក (ស្យា. ក.), កិង្កិណិក (បី.)] ជាលកប្បិតំ.

១១៣៥. ‘‘អដ្ឋំសា សុកតា ថម្ភា, សព្ពេ វេឡុរិយាមយា;

ឯកមេកាយ អំសិយា, រតនា សត្ត និម្មិតា.

១១៣៦. ‘‘វេឡុរិយសុវណ្ណស្ស, ផលិកា រូបិយស្ស ច;

មសារគល្លមុត្តាហិ, លោហិតង្គមណីហិ ច.

១១៣៧. ‘‘ចិត្រា មនោរមា ភូមិ, ន តត្ថុទ្ធំសតី រជោ;

គោបាណសីគណា បីតា, កូដំ ធារេន្តិ និម្មិតា.

១១៣៨. ‘‘សោបាណានិ ច ចត្តារិ, និម្មិតា ចតុរោ ទិសា;

នានារតនគព្ភេហិ, អាទិច្ចោវ វិរោចតិ.

១១៣៩. ‘‘វេទិយា ចតស្សោ តត្ថ, វិភត្តា ភាគសោ មិតា;

ទទ្ទល្លមានា អាភន្តិ, សមន្តា ចតុរោ ទិសា.

១១៤០. ‘‘តស្មិំ វិមានេ បវរេ, ទេវបុត្តោ មហប្បភោ;

អតិរោចសិ វណ្ណេន, ឧទយន្តោវ ភាណុមា.

១១៤១. ‘‘ទានស្ស តេ ឥទំ ផលំ, អថោ សីលស្ស វា បន;

អថោ អញ្ជលិកម្មស្ស, តំ មេ អក្ខាហិ បុច្ឆិតោ’’.

១១៤២. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១៤៣. ‘‘អហំ អន្ធកវិន្ទស្មិំ, ពុទ្ធស្សាទិច្ចពន្ធុនោ;

វិហារំ សត្ថុ ការេសិំ, បសន្នោ សេហិ បាណិភិ.

១១៤៤. ‘‘តត្ថ គន្ធញ្ច មាលញ្ច, បច្ចយញ្ច [បច្ចគ្គញ្ច (សី.), បច្ចគ្ឃញ្ច (?)] វិលេបនំ;

វិហារំ សត្ថុ អទាសិំ, វិប្បសន្នេន ចេតសា;

តេន មយ្ហំ ឥទំ លទ្ធំ, វសំ វត្តេមិ នន្ទនេ.

១១៤៥. ‘‘នន្ទនេ ច វនេ [នន្ទនេ បវនេ (សី. ស្យា.)] រម្មេ, នានាទិជគណាយុតេ;

រមាមិ នច្ចគីតេហិ, អច្ឆរាហិ បុរក្ខតោ’’តិ.

សុវណ្ណវិមានំ ចតុត្ថំ.

៥. អម្ពវិមានវត្ថុ

១១៤៦. ‘‘ឧច្ចមិទំ មណិថូណំ វិមានំ, សមន្តតោ ទ្វាទស យោជនានិ;

កូដាគារា សត្តសតា ឧឡារា, វេឡុរិយថម្ភា រុចកត្ថតា សុភា.

១១៤៧. ‘‘តត្ថច្ឆសិ បិវសិ ខាទសិ ច, ទិព្ពា ច វីណា បវទន្តិ វគ្គុំ;

ទិព្ពា រសា កាមគុណេត្ថ បញ្ច, នារិយោ ច នច្ចន្តិ សុវណ្ណឆន្នា.

១១៤៨. ‘‘កេន តេតាទិសោ វណ្ណោ…បេ… វណ្ណោ ច តេ សព្ពទិសា បភាសតី’’តិ.

១១៥០. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១៥១. ‘‘គិម្ហានំ បច្ឆិមេ មាសេ, បតបន្តេ [បតាបន្តេ (ស្យា.), បតាបេន្តេ (ក.)] ទិវង្ករេ;

បរេសំ ភតកោ បោសោ, អម្ពារាមមសិញ្ចតិ.

១១៥២. ‘‘អថ តេនាគមា ភិក្ខុ, សារិបុត្តោតិ វិស្សុតោ;

កិលន្តរូបោ កាយេន, អកិលន្តោវ ចេតសា.

១១៥៣. ‘‘តញ្ច ទិស្វាន អាយន្តំ, អវោចំ អម្ពសិញ្ចកោ;

សាធុ តំ [សាធុកំ (ក.)] ភន្តេ ន្ហាបេយ្យំ, យំ មមស្ស សុខាវហំ.

១១៥៤. ‘‘តស្ស មេ អនុកម្បាយ, និក្ខិបិ បត្តចីវរំ;

និសីទិ រុក្ខមូលស្មិំ, ឆាយាយ ឯកចីវរោ.

១១៥៥. ‘‘តញ្ច អច្ឆេន វារិនា, បសន្នមានសោ នរោ;

ន្ហាបយី រុក្ខមូលស្មិំ, ឆាយាយ ឯកចីវរំ.

១១៥៦. ‘‘អម្ពោ ច សិត្តោ សមណោ ច ន្ហាបិតោ, មយា ច បុញ្ញំ បសុតំ អនប្បកំ;

ឥតិ សោ បីតិយា កាយំ, សព្ពំ ផរតិ អត្តនោ.

១១៥៧. ‘‘តទេវ ឯត្តកំ កម្មំ, អកាសិំ តាយ ជាតិយា;

បហាយ មានុសំ ទេហំ, ឧបបន្នោម្ហិ នន្ទនំ.

១១៥៨. ‘‘នន្ទនេ ច វនេ រម្មេ, នានាទិជគណាយុតេ;

រមាមិ នច្ចគីតេហិ, អច្ឆរាហិ បុរក្ខតោ’’តិ.

អម្ពវិមានំ បញ្ចមំ.

៦. គោបាលវិមានវត្ថុ

១១៥៩. ‘‘ទិស្វាន ទេវំ បដិបុច្ឆិ ភិក្ខុ, ឧច្ចេ វិមានម្ហិ ចិរដ្ឋិតិកេ;

អាមុត្តហត្ថាភរណំ យសស្សិំ [អាមុត្តហត្ថាភរណោ យសស្សី (ស្យា. បី. ក.)], ទិព្ពេ វិមានម្ហិ យថាបិ ចន្ទិមា.

១១៦០. ‘‘អលង្កតោ មល្យធរោ [មាលភារី (សី.), មាលធរី (ក.)] សុវត្ថោ, សុកុណ្ឌលី កប្បិតកេសមស្សុ;

អាមុត្តហត្ថាភរណោ យសស្សី, ទិព្ពេ វិមានម្ហិ យថាបិ ចន្ទិមា.

១១៦១. ‘‘ទិព្ពា ច វីណា បវទន្តិ វគ្គុំ, អដ្ឋដ្ឋកា សិក្ខិតា សាធុរូបា;

ទិព្ពា ច កញ្ញា តិទសចរា ឧឡារា, នច្ចន្តិ គាយន្តិ បមោទយន្តិ.

១១៦២. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១១៦៣. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១៦៤. ‘‘អហំ មនុស្សេសុ មនុស្សភូតោ, សង្គម្ម រក្ខិស្សំ បរេសំ ធេនុយោ;

តតោ ច អាគា សមណោ មមន្តិកេ គាវោ ច មាសេ អគមំសុ ខាទិតុំ.

១១៦៥. ‘‘ទ្វយជ្ជ កិច្ចំ ឧភយញ្ច ការិយំ, ឥច្ចេវហំ [ឥច្ចេវំ (ក.)] ភន្តេ តទា វិចិន្តយិំ;

តតោ ច សញ្ញំ បដិលទ្ធយោនិសោ, ទទាមិ ភន្តេតិ ខិបិំ អនន្តកំ.

១១៦៦. ‘‘សោ មាសខេត្តំ តុរិតោ អវាសរិំ, បុរា អយំ ភញ្ជតិ យស្សិទំ ធនំ;

តតោ ច កណ្ហោ ឧរគោ មហាវិសោ, អឌំសិ បាទេ តុរិតស្ស មេ សតោ.

១១៦៧. ‘‘ស្វាហំ អដ្ដោម្ហិ ទុក្ខេន បីឡិតោ, ភិក្ខុ ច តំ សាមំ មុញ្ចិត្វានន្តកំ [មុញ្ចិត្វ នន្តកំ (សី.), មុញ្ចិត្វា អនន្តកំ (ស្យា.)];

អហាសិ កុម្មាសំ មមានុកម្បយា [មមានុកម្បិយា (បី. ក.), មមានុកម្បាយ (ស្យា.)], តតោ ចុតោ កាលកតោម្ហិ ទេវតា.

១១៦៨. ‘‘តទេវ កម្មំ កុសលំ កតំ មយា, សុខញ្ច កម្មំ អនុភោមិ អត្តនា;

តយា ហិ ភន្តេ អនុកម្បិតោ ភុសំ, កតញ្ញុតាយ អភិបាទយាមិ តំ.

១១៦៩. ‘‘សទេវកេ លោកេ សមារកេ ច, អញ្ញោ មុនិ នត្ថិ តយានុកម្បកោ;

តយា ហិ ភន្តេ អនុកម្បិតោ ភុសំ, កតញ្ញុតាយ អភិវាទយាមិ តំ.

១១៧០. ‘‘ឥមស្មិំ លោកេ បរស្មិំ វា បន, អញ្ញោ មុនី នត្ថិ តយានុកម្បកោ;

តយា ហិ ភន្តេ អនុកម្បិតោ ភុសំ, កតញ្ញុតាយ អភិវាទយាមិ ត’’ន្តិ.

គោបាលវិមានំ ឆដ្ឋំ.

៧. កណ្ឌកវិមានវត្ថុ

១១៧១. ‘‘បុណ្ណមាសេ យថា ចន្ទោ, នក្ខត្តបរិវារិតោ;

សមន្តា អនុបរិយាតិ, តារកាធិបតី សសី.

១១៧២. ‘‘តថូបមំ ឥទំ ព្យម្ហំ, ទិព្ពំ ទេវបុរម្ហិ ច;

អតិរោចតិ វណ្ណេន, ឧទយន្តោវ រំសិមា.

១១៧៣. ‘‘វេឡុរិយសុវណ្ណស្ស, ផលិកា រូបិយស្ស ច;

មសារគល្លមុត្តាហិ, លោហិតង្គមណីហិ ច.

១១៧៤. ‘‘ចិត្រា មនោរមា ភូមិ, វេឡូរិយស្ស សន្ថតា;

កូដាគារា សុភា រម្មា, បាសាទោ តេ សុមាបិតោ.

១១៧៥. ‘‘រម្មា ច តេ បោក្ខរណី, បុថុលោមនិសេវិតា;

អច្ឆោទកា វិប្បសន្នា, សោវណ្ណវាលុកសន្ថតា.

១១៧៦. ‘‘នានាបទុមសញ្ឆន្នា, បុណ្ឌរីកសមោតតា [សមោត្ថតា (ក.), សមោគតា (ស្យា.)];

សុរភិំ សម្បវាយន្តិ, មនុញ្ញា មាលុតេរិតា.

១១៧៧. ‘‘តស្សា តេ ឧភតោ បស្សេ, វនគុម្ពា សុមាបិតា;

ឧបេតា បុប្ផរុក្ខេហិ, ផលរុក្ខេហិ ចូភយំ.

១១៧៨. ‘‘សោវណ្ណបាទេ បល្លង្កេ, មុទុកេ គោណកត្ថតេ [ចោលសន្ថតេ (សី.)];

និសិន្នំ ទេវរាជំវ, ឧបតិដ្ឋន្តិ អច្ឆរា.

១១៧៩. ‘‘សព្ពាភរណសញ្ឆន្នា, នានាមាលាវិភូសិតា;

រមេន្តិ តំ មហិទ្ធិកំ, វសវត្តីវ មោទសិ.

១១៨០. ‘‘ភេរិសង្ខមុទិង្គាហិ, វីណាហិ បណវេហិ ច;

រមសិ រតិសម្បន្នោ, នច្ចគីតេ សុវាទិតេ.

១១៨១. ‘‘ទិព្ពា តេ វិវិធា រូបា, ទិព្ពា សទ្ទា អថោ រសា;

គន្ធា ច តេ អធិប្បេតា, ផោដ្ឋព្ពា ច មនោរមា.

១១៨២. ‘‘តស្មិំ វិមានេ បវរេ, ទេវបុត្ត មហប្បភោ;

អតិរោចសិ វណ្ណេន, ឧទយន្តោវ ភាណុមា.

១១៨៣. ‘‘ទានស្ស តេ ឥទំ ផលំ, អថោ សីលស្ស វា បន;

អថោ អញ្ជលិកម្មស្ស, តំ មេ អក្ខាហិ បុច្ឆិតោ’’.

១១៨៤. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១៨៥. ‘‘អហំ កបិលវត្ថុស្មិំ, សាកិយានំ បុរុត្តមេ;

សុទ្ធោទនស្ស បុត្តស្ស, កណ្ឌកោ សហជោ អហំ.

១១៨៦. ‘‘យទា សោ អឌ្ឍរត្តាយំ, ពោធាយ មភិនិក្ខមិ;

សោ មំ មុទូហិ បាណីហិ, ជាលិ [ជាល (សី.)] តម្ពនខេហិ ច.

១១៨៧. ‘‘សត្ថិំ អាកោដយិត្វាន, វហ សម្មាតិ ចព្រវិ;

អហំ លោកំ តារយិស្សំ, បត្តោ សម្ពោធិមុត្តមំ.

១១៨៨. ‘‘តំ មេ គិរំ សុណន្តស្ស, ហាសោ មេ វិបុលោ អហុ;

ឧទគ្គចិត្តោ សុមនោ, អភិសីសិំ [អភិសិំសិំ (សី.), អភិសីសិ (បី.)] តទា អហំ.

១១៨៩. ‘‘អភិរូឡ្ហញ្ច មំ ញត្វា, សក្យបុត្តំ មហាយសំ;

ឧទគ្គចិត្តោ មុទិតោ, វហិស្សំ បុរិសុត្តមំ.

១១៩០. ‘‘បរេសំ វិជិតំ គន្ត្វា, ឧគ្គតស្មិំ ទិវាករេ [ទិវង្ករេ (ស្យា. ក.)];

មមំ ឆន្នញ្ច ឱហាយ, អនបេក្ខោ សោ អបក្កមិ.