១៣. ចូឡរថវិមានវត្ថុ

៩៨១. ‘‘ទឡ្ហធម្មា និសារស្ស, ធនុំ ឱលុព្ភ តិដ្ឋសិ;

ខត្តិយោ នុសិ រាជញ្ញោ, អទុ លុទ្ទោ វនេចរោ’’តិ [វនាចរោតិ (ស្យា. ក.)].

៩៨២. ‘‘អស្សកាធិបតិស្សាហំ, ភន្តេ បុត្តោ វនេចរោ;

នាមំ មេ ភិក្ខុ តេ ព្រូមិ, សុជាតោ ឥតិ មំ វិទូ [វិទុំ (សី.)].

៩៨៣. ‘‘មិគេ គវេសមានោហំ, ឱគាហន្តោ ព្រហាវនំ;

មិគំ តញ្ចេវ [មិគំ គន្ត្វេវ (ស្យា.), មិគវធញ្ច (ក.)] នាទ្ទក្ខិំ, តញ្ច ទិស្វា ឋិតោ អហ’’ន្តិ.

៩៨៤. ‘‘ស្វាគតំ តេ មហាបុញ្ញ, អថោ តេ អទុរាគតំ;

ឯត្តោ ឧទកមាទាយ, បាទេ បក្ខាលយស្សុ តេ.

៩៨៥. ‘‘ឥទម្បិ បានីយំ សីតំ, អាភតំ គិរិគព្ភរា;

រាជបុត្ត តតោ បិត្វា [បីត្វា (សី. ស្យា.)], សន្ថតស្មិំ ឧបាវិសា’’តិ.

៩៨៦. ‘‘កល្យាណី វត តេ វាចា, សវនីយា មហាមុនិ;

នេលា អត្ថវតី [ចត្ថវតី (សី.)] វគ្គុ, មន្ត្វា [មន្តា (ស្យា. បី. ក.)] អត្ថញ្ច ភាសសិ [ភាសសេ (សី.)].

៩៨៧. ‘‘កា តេ រតិ វនេ វិហរតោ, ឥសិនិសភ វទេហិ បុដ្ឋោ;

តវ វចនបថំ និសាមយិត្វា, អត្ថធម្មបទំ សមាចរេមសេ’’តិ.

៩៨៨. ‘‘អហិំសា សព្ពបាណីនំ, កុមារម្ហាក រុច្ចតិ;

ថេយ្យា ច អតិចារា ច, មជ្ជបានា ច អារតិ.

៩៨៩. ‘‘អារតិ សមចរិយា ច, ពាហុសច្ចំ កតញ្ញុតា;

ទិដ្ឋេវ ធម្មេ បាសំសា, ធម្មា ឯតេ បសំសិយាតិ.

៩៩០. ‘‘សន្តិកេ មរណំ តុយ្ហំ, ឱរំ មាសេហិ បញ្ចហិ;

រាជបុត្ត វិជានាហិ, អត្តានំ បរិមោចយា’’តិ.

៩៩១. ‘‘កតមំ ស្វាហំ ជនបទំ គន្ត្វា, កិំ កម្មំ កិញ្ច បោរិសំ;

កាយ វា បន វិជ្ជាយ, ភវេយ្យំ អជរាមរោ’’តិ.

៩៩២. ‘‘ន វិជ្ជតេ សោ បទេសោ, កម្មំ វិជ្ជា ច បោរិសំ;

យត្ថ គន្ត្វា ភវេ មច្ចោ, រាជបុត្តាជរាមរោ.

៩៩៣. ‘‘មហទ្ធនា មហាភោគា, រដ្ឋវន្តោបិ ខត្តិយា;

បហូតធនធញ្ញាសេ, តេបិ នោ [តេបិ ន (ពហូសុ)] អជរាមរា.

៩៩៤. ‘‘យទិ តេ សុតា អន្ធកវេណ្ឌុបុត្តា [អន្ធកវេណ្ហុបុត្តា (សី.), អណ្ឌកវេណ្ឌបុត្តា (ស្យា. ក.)], សូរា វីរា វិក្កន្តប្បហារិនោ;

តេបិ អាយុក្ខយំ បត្តា, វិទ្ធស្តា សស្សតីសមា.

៩៩៥. ‘‘ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

ឯតេ ចញ្ញេ ច ជាតិយា, តេបិ នោ អជរាមរា.

៩៩៦. ‘‘យេ មន្តំ បរិវត្តេន្តិ, ឆឡង្គំ ព្រហ្មចិន្តិតំ;

ឯតេ ចញ្ញេ ច វិជ្ជាយ, តេបិ នោ អជរាមរា.

៩៩៧. ‘‘ឥសយោ ចាបិ យេ សន្តា, សញ្ញតត្តា តបស្សិនោ;

សរីរំ តេបិ កាលេន, វិជហន្តិ តបស្សិនោ.

៩៩៨. ‘‘ភាវិតត្តាបិ អរហន្តោ, កតកិច្ចា អនាសវា;

និក្ខិបន្តិ ឥមំ ទេហំ, បុញ្ញបាបបរិក្ខយា’’តិ.

៩៩៩. ‘‘សុភាសិតា អត្ថវតី, គាថាយោ តេ មហាមុនិ;

និជ្ឈត្តោម្ហិ សុភដ្ឋេន, ត្វញ្ច មេ សរណំ ភវា’’តិ.

១០០០. ‘‘មា មំ ត្វំ សរណំ គច្ឆ, តមេវ សរណំ វជ [ភជ (ក.)];

សក្យបុត្តំ មហាវីរំ, យមហំ សរណំ គតោ’’តិ.

១០០១. ‘‘កតរស្មិំ សោ ជនបទេ, សត្ថា តុម្ហាក មារិស;

អហម្បិ ទដ្ឋុំ គច្ឆិស្សំ, ជិនំ អប្បដិបុគ្គល’’ន្តិ.

១០០២. ‘‘បុរត្ថិមស្មិំ ជនបទេ, ឱក្កាកកុលសម្ភវោ;

តត្ថាសិ បុរិសាជញ្ញោ, សោ ច ខោ បរិនិព្ពុតោ’’តិ.

១០០៣. ‘‘សចេ ហិ ពុទ្ធោ តិដ្ឋេយ្យ, សត្ថា តុម្ហាក មារិស;

យោជនានិ សហស្សានិ, គច្ឆេយ្យំ [គច្ឆេ (ស្យា. បី. ក.)] បយិរុបាសិតុំ.

១០០៤. ‘‘យតោ ច ខោ [យតា ខោ (បី. ក.)] បរិនិព្ពុតោ, សត្ថា តុម្ហាក មារិស;

និព្ពុតម្បិ [បរិនិព្ពុតំ (ស្យា. ក.)] មហាវីរំ, គច្ឆាមិ សរណំ អហំ.

១០០៥. ‘‘ឧបេមិ សរណំ ពុទ្ធំ, ធម្មញ្ចាបិ អនុត្តរំ;

សង្ឃញ្ច នរទេវស្ស, គច្ឆាមិ សរណំ អហំ.

១០០៦. ‘‘បាណាតិបាតា វិរមាមិ ខិប្បំ, លោកេ អទិន្នំ បរិវជ្ជយាមិ;

អមជ្ជបោ នោ ច មុសា ភណាមិ, សកេន ទារេន ច ហោមិ តុដ្ឋោ’’តិ.

១០០៧. ‘‘សហស្សរំសីវ យថា មហប្បភោ, ទិសំ យថា ភាតិ នភេ អនុក្កមំ;

តថាបការោ [តថប្បការោ (សី. ស្យា.)] តវាយំ [តវយំ (សី. បី.)] មហារថោ, សមន្តតោ យោជនសត្តមាយតោ.

១០០៨. ‘‘សុវណ្ណបដ្ដេហិ សមន្តមោត្ថដោ, ឧរស្ស មុត្តាហិ មណីហិ ចិត្តិតោ;

លេខា សុវណ្ណស្ស ច រូបិយស្ស ច, សោភេន្តិ វេឡុរិយមយា សុនិម្មិតា.

១០០៩. ‘‘សីសញ្ចិទំ វេឡុរិយស្ស និម្មិតំ, យុគញ្ចិទំ លោហិតកាយ ចិត្តិតំ;

យុត្តា សុវណ្ណស្ស ច រូបិយស្ស ច, សោភន្តិ អស្សា ច ឥមេ មនោជវា.

១០១០. ‘‘សោ តិដ្ឋសិ ហេមរថេ អធិដ្ឋិតោ, ទេវានមិន្ទោវ សហស្សវាហនោ;

បុច្ឆាមិ តាហំ យសវន្ត កោវិទំ [កោវិទ (ក.)], កថំ តយា លទ្ធោ អយំ ឧឡារោ’’តិ.

១០១១. ‘‘សុជាតោ នាមហំ ភន្តេ, រាជបុត្តោ បុរេ អហុំ;

ត្វញ្ច មំ អនុកម្បាយ, សញ្ញមស្មិំ និវេសយិ.

១០១២. ‘‘ខីណាយុកញ្ច មំ ញត្វា, សរីរំ បាទាសិ សត្ថុនោ;

ឥមំ សុជាត បូជេហិ, តំ តេ អត្ថាយ ហេហិតិ.

១០១៣. ‘‘តាហំ គន្ធេហិ មាលេហិ, បូជយិត្វា សមុយ្យុតោ;

បហាយ មានុសំ ទេហំ, ឧបបន្នោម្ហិ នន្ទនំ.

១០១៤. ‘‘នន្ទនេ ច វនេ [នន្ទនោបវនេ (សី.), នន្ទនេ បវនេ (ស្យា. ក.)] រម្មេ, នានាទិជគណាយុតេ;

រមាមិ នច្ចគីតេហិ, អច្ឆរាហិ បុរក្ខតោ’’តិ.

ចូឡរថវិមានំ តេរសមំ.