១៤. មហារថវិមានវត្ថុ

១០១៥. ‘‘សហស្សយុត្តំ ហយវាហនំ សុភំ, អារុយ្ហិមំ សន្ទនំ នេកចិត្តំ;

ឧយ្យានភូមិំ អភិតោ អនុក្កមំ, បុរិន្ទទោ ភូតបតីវ វាសវោ.

១០១៦. ‘‘សោវណ្ណមយា តេ រថកុព្ពរា ឧភោ, ផលេហិ [ថលេហិ (សី.)] អំសេហិ អតីវ សង្គតា;

សុជាតគុម្ពា នរវីរនិដ្ឋិតា, វិរោចតី បន្នរសេវ ចន្ទោ.

១០១៧. ‘‘សុវណ្ណជាលាវតតោ រថោ អយំ, ពហូហិ នានារតនេហិ ចិត្តិតោ;

សុនន្ទិឃោសោ ច សុភស្សរោ ច, វិរោចតី ចាមរហត្ថពាហុភិ.

១០១៨. ‘‘ឥមា ច នាភ្យោ មនសាភិនិម្មិតា, រថស្ស បាទន្តរមជ្ឈភូសិតា;

ឥមា ច នាភ្យោ សតរាជិចិត្តិតា, សតេរតា វិជ្ជុរិវប្បភាសរេ.

១០១៩. ‘‘អនេកចិត្តាវតតោ រថោ អយំ, បុថូ ច នេមី ច សហស្សរំសិកោ;

តេសំ សរោ សុយ្យតិ [សូយតិ (សី.)] វគ្គុរូបោ, បញ្ចង្គិកំ តុរិយមិវប្បវាទិតំ.

១០២០. ‘‘សិរស្មិំ ចិត្តំ មណិចន្ទកប្បិតំ, សទា វិសុទ្ធំ រុចិរំ បភស្សរំ;

សុវណ្ណរាជីហិ អតីវ សង្គតំ, វេឡុរិយរាជីវ អតីវ សោភតិ.

១០២១. ‘‘ឥមេ ច វាឡី មណិចន្ទកប្បិតា, អារោហកម្ពូ សុជវា ព្រហូបមា.

ព្រហា មហន្តា ពលិនោ មហាជវា, មនោ តវញ្ញាយ តថេវ សិំសរេ [សព្ពរេ (ក.), សប្បរេ (?)].

១០២២. ‘‘ឥមេ ច សព្ពេ សហិតា ចតុក្កមា, មនោ តវញ្ញាយ តថេវ សិំសរេ;

សមំ វហន្តា មុទុកា អនុទ្ធតា, អាមោទមានា តុរគាន [តុរង្គាន (ក.)] មុត្តមា.

១០២៣. ‘‘ធុនន្តិ វគ្គន្តិ បតន្តិ [បវត្តន្តិ (បី. ក.)] ចម្ពរេ, អព្ភុទ្ធុនន្តា សុកតេ បិឡន្ធនេ;

តេសំ សរោ សុយ្យតិ វគ្គុរូបោ, បញ្ចង្គិកំ តុរិយមិវប្បវាទិតំ.

១០២៤. ‘‘រថស្ស ឃោសោ អបិឡន្ធនាន ច, ខុរស្ស នាទោ [នាទី (ស្យា.), នាទិ (បី. ក.)] អភិហិំសនាយ ច;

ឃោសោ សុវគ្គូ សមិតស្ស សុយ្យតិ, គន្ធព្ពតូរិយានិ វិចិត្រសំវនេ.

១០២៥. ‘‘រថេ ឋិតា តា មិគមន្ទលោចនា, អាឡារបម្ហា ហសិតា បិយំវទា;

វេឡុរិយជាលាវតតា តនុច្ឆវា, សទេវ គន្ធព្ពសូរគ្គបូជិតា.

១០២៦. ‘‘តា រត្តរត្តម្ពរបីតវាសសា, វិសាលនេត្តា អភិរត្តលោចនា;

កុលេ សុជាតា សុតនូ សុចិម្ហិតា, រថេ ឋិតា បញ្ជលិកា ឧបដ្ឋិតា.

១០២៧. ‘‘តា កម្ពុកេយូរធរា សុវាសសា, សុមជ្ឈិមា ឩរុថនូបបន្នា;

វដ្ដង្គុលិយោ សុមុខា សុទស្សនា, រថេ ឋិតា បញ្ជលិកា ឧបដ្ឋិតា.

១០២៨. ‘‘អញ្ញា សុវេណី សុសុ មិស្សកេសិយោ, សមំ វិភត្តាហិ បភស្សរាហិ ច;

អនុព្ពតា តា តវ មានសេ រតា, រថេ ឋិតា បញ្ជលិកា ឧបដ្ឋិតា.

១០២៩. ‘‘អាវេឡិនិយោ បទុមុប្បលច្ឆទា, អលង្កតា ចន្ទនសារវាសិតា [វោសិតា (ស្យា.), ភូសិតា (ក.)];

អនុព្ពតា តា តវ មានសេ រតា, រថេ ឋិតា បញ្ជលិកា ឧបដ្ឋិតា.

១០៣០. ‘‘តា មាលិនិយោ បទុមុប្បលច្ឆទា, អលង្កតា ចន្ទនសារវាសិតា;

អនុព្ពតា តា តវ មានសេ រតា, រថេ ឋិតា បញ្ជលិកា ឧបដ្ឋិតា.

១០៣១. ‘‘កណ្ឋេសុ តេ យានិ បិឡន្ធនានិ, ហត្ថេសុ បាទេសុ តថេវ សីសេ;

ឱភាសយន្តី ទស សព្ពសោ ទិសា, អព្ភុទ្ទយំ សារទិកោវ ភាណុមា.

១០៣២. ‘‘វាតស្ស វេគេន ច សម្បកម្បិតា, ភុជេសុ មាលា អបិឡន្ធនានិ ច;

មុញ្ចន្តិ ឃោសំ រូចិរំ សុចិំ សុភំ, សព្ពេហិ វិញ្ញូហិ សុតព្ពរូបំ.

១០៣៣. ‘‘ឧយ្យានភូម្យា ច ទុវទ្ធតោ ឋិតា, រថា ច នាគា តូរិយានិ ច សរោ;

តមេវ ទេវិន្ទ បមោទយន្តិ, វីណា យថា បោក្ខរបត្តពាហុភិ.

១០៣៤. ‘‘ឥមាសុ វីណាសុ ពហូសុ វគ្គូសុ, មនុញ្ញរូបាសុ ហទយេរិតំ បីតិំ [ហទយេរិតំ បតិ (សី.), ហទយេរិតម្បិ តំ (ស្យា.)];

បវជ្ជមានាសុ អតីវ អច្ឆរា, ភមន្តិ កញ្ញា បទុមេសុ សិក្ខិតា.

១០៣៥. ‘‘យទា ច គីតានិ ច វាទិតានិ ច, នច្ចានិ ចិមានិ [ចេមានិ (សី.)] សមេន្តិ ឯកតោ;

អថេត្ថ នច្ចន្តិ អថេត្ថ អច្ឆរា, ឱភាសយន្តី ឧភតោ វរិត្ថិយោ.

១០៣៦. ‘‘សោ មោទសិ តុរិយគណប្បពោធនោ, មហីយមានោ វជិរាវុធោរិវ;

ឥមាសុ វីណាសុ ពហូសុ វគ្គូសុ, មនុញ្ញរូបាសុ ហទយេរិតំ បីតិំ.

១០៣៧. ‘‘កិំ ត្វំ បុរេ កម្មមកាសិ អត្តនា, មនុស្សភូតោ បុរិមាយ ជាតិយា;

ឧបោសថំ កំ វា [ឧបោសថំ កិំ វ (ស្យា.)] តុវំ ឧបាវសិ, កំ [កិំ (ស្យា.)] ធម្មចរិយំ វតមាភិរោចយិ.

១០៣៨. ‘‘នយីទមប្បស្ស កតស្ស [នយិទំ អប្បស្ស កតស្ស (សី. ស្យា.), សាសេទំ អប្បកតស្ស (ក.)] កម្មុនោ, បុព្ពេ សុចិណ្ណស្ស ឧបោសថស្ស វា;

ឥទ្ធានុភាវោ វិបុលោ អយំ តវ, យំ ទេវសង្ឃំ អភិរោចសេ ភុសំ.

១០៣៩. ‘‘ទានស្ស តេ ឥទំ ផលំ, អថោ សីលស្ស វា បន;

អថោ អញ្ជលិកម្មស្ស, តំ មេ អក្ខាហិ បុច្ឆិតោ’’តិ.

១០៤០. សោ ទេវបុត្តោ អត្តមនោ, មោគ្គល្លានេន បុច្ឆិតោ;

បញ្ហំ បុដ្ឋោ វិយាកាសិ, យស្ស កម្មស្សិទំ ផលន្តិ.

១០៤១. ‘‘ជិតិន្ទ្រិយំ ពុទ្ធមនោមនិក្កមំ, នរុត្តមំ កស្សបមគ្គបុគ្គលំ;

អវាបុរន្តំ អមតស្ស ទ្វារំ, ទេវាតិទេវំ សតបុញ្ញលក្ខណំ.

១០៤២. ‘‘តមទ្ទសំ កុញ្ជរមោឃតិណ្ណំ, សុវណ្ណសិង្គីនទពិម្ពសាទិសំ;

ទិស្វាន តំ ខិប្បមហុំ សុចីមនោ, តមេវ ទិស្វាន សុភាសិតទ្ធជំ.

១០៤៣. ‘‘តមន្នបានំ អថវាបិ ចីវរំ, សុចិំ បណីតំ រសសា ឧបេតំ;

បុប្ផាភិក្កិណម្ហិ សកេ និវេសនេ, បតិដ្ឋបេសិំ ស អសង្គមានសោ.

១០៤៤. ‘‘តមន្នបានេន ច ចីវរេន ច, ខជ្ជេន ភោជ្ជេន ច សាយនេន ច;

សន្តប្បយិត្វា ទ្វិបទានមុត្តមំ, សោ សគ្គសោ ទេវបុរេ រមាមហំ.

១០៤៥.

‘‘ឯតេនុបាយេន ឥមំ និរគ្គឡំ, យញ្ញំ យជិត្វា តិវិធំ វិសុទ្ធំ.

បហាយហំ មានុសកំ សមុស្សយំ, ឥន្ទូបមោ [ឥន្ទស្សមោ (ស្យា. ក.)] ទេវបុរេ រមាមហំ.

១០៤៦. ‘‘អាយុញ្ច វណ្ណញ្ច សុខំ ពលញ្ច, បណីតរូបំ អភិកង្ខតា មុនិ;

អន្នញ្ច បានញ្ច ពហុំ សុសង្ខតំ, បតិដ្ឋបេតព្ពមសង្គមានសេ.

១០៤៧. [កថា. ៧៩៩]‘‘នយិមស្មិំ លោកេ បរស្មិំ [នយិមស្មិំ វា លោកេ បរស្មិំ (កថាវត្ថុ ៧៩៩), នយិមស្មិ លោកេ វ បរស្មិ (?)] វា បន, ពុទ្ធេន សេដ្ឋោ វ សមោ វ វិជ្ជតិ;

អាហុនេយ្យានំ [យមាហុនេយ្យានំ (ក.)] បរមាហុតិំ គតោ, បុញ្ញត្ថិកានំ វិបុលប្ផលេសិន’’ន្តិ.

មហារថវិមានំ ចុទ្ទសមំ.

មហារថវគ្គោ បញ្ចមោ និដ្ឋិតោ.

តស្សុទ្ទានំ –

មណ្ឌូកោ រេវតី ឆត្តោ, កក្កដោ ទ្វារបាលកោ;

ទ្វេ ករណីយា ទ្វេ សូចិ, តយោ នាគា ច ទ្វេ រថា;

បុរិសានំ បឋមោ វគ្គោ បវុច្ចតីតិ.

ភាណវារំ តតិយំ និដ្ឋិតំ.