១២. តតិយនាគវិមានវត្ថុ

៩៧៦. ‘‘កោ នុ ទិព្ពេន យានេន, សព្ពសេតេន ហត្ថិនា;

តុរិយតាឡិតនិគ្ឃោសោ, អន្តលិក្ខេ មហីយតិ.

៩៧៧. ‘‘ទេវតា នុសិ គន្ធព្ពោ, អទុ [អាទុ (សី. ស្យា.)] សក្កោ បុរិន្ទទោ;

អជានន្តា តំ បុច្ឆាម, កថំ ជានេមុ តំ មយ’’ន្តិ.

៩៧៨. ‘‘នម្ហិ ទេវោ ន គន្ធព្ពោ, នាបិ [នាម្ហិ (ក.)] សក្កោ បុរិន្ទទោ;

សុធម្មា នាម យេ ទេវា, តេសំ អញ្ញតរោ អហ’’ន្តិ.

៩៧៩. ‘‘បុច្ឆាម ទេវំ សុធម្មំ [ទេវ សុធម្ម (ស្យា.), ទេវ សុធម្មំ (ក.)], បុថុំ កត្វាន អញ្ជលិំ;

កិំ កត្វា មានុសេ កម្មំ, សុធម្មំ ឧបបជ្ជតី’’តិ.

៩៨០. ‘‘ឧច្ឆាគារំ តិណាគារំ, វត្ថាគារញ្ច យោ ទទេ;

តិណ្ណំ អញ្ញតរំ ទត្វា, សុធម្មំ ឧបបជ្ជតី’’តិ.

តតិយនាគវិមានំ ទ្វាទសមំ.