៨. អម្ពវិមានវត្ថុ

៧៨៣. ‘‘ទិព្ពំ តេ អម្ពវនំ រម្មំ, បាសាទេត្ថ មហល្លកោ;

នានាតុរិយសង្ឃុដ្ឋោ, អច្ឆរាគណឃោសិតោ.

៧៨៤. ‘‘បទីបោ ចេត្ថ ជលតិ, និច្ចំ សោវណ្ណយោ មហា;

ទុស្សផលេហិ រុក្ខេហិ, សមន្តា បរិវារិតោ.

៧៨៥. ‘‘កេន តេតាទិសោ វណ្ណោ…បេ…វណ្ណោ ច តេ សព្ពទិសា បភាសតី’’តិ;

៧៨៧. សា ទេវតា អត្តមនា…បេ… យស្ស កម្មស្សិទំ ផលំ.

៧៨៨. ‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;

វិហារំ សង្ឃស្ស ការេសិំ, អម្ពេហិ បរិវារិតំ.

៧៨៩. ‘‘បរិយោសិតេ វិហារេ, ការេន្តេ និដ្ឋិតេ មហេ;

អម្ពេហិ ឆាទយិត្វាន [អម្ពេ អច្ឆាទយិត្វាន (សី. ស្យា.), អម្ពេហច្ឆាទយិត្វាន (បី. ក.)], កត្វា ទុស្សមយេ ផលេ.

៧៩០. ‘‘បទីបំ តត្ថ ជាលេត្វា, ភោជយិត្វា គណុត្តមំ;

និយ្យាទេសិំ តំ សង្ឃស្ស, បសន្នា សេហិ បាណិភិ.

៧៩១. ‘‘តេន មេ អម្ពវនំ រម្មំ, បាសាទេត្ថ មហល្លកោ;

នានាតុរិយសង្ឃុដ្ឋោ, អច្ឆរាគណឃោសិតោ.

៧៩២. ‘‘បទីបោ ចេត្ថ ជលតិ, និច្ចំ សោវណ្ណយោ មហា;

ទុស្សផលេហិ រុក្ខេហិ, សមន្តា បរិវារិតោ.

៧៩៣. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ.

អម្ពវិមានំ អដ្ឋមំ.