៩. បីតវិមានវត្ថុ

៧៩៥. ‘‘បីតវត្ថេ បីតធជេ, បីតាលង្ការភូសិតេ;

បីតចន្ទនលិត្តង្គេ, បីតឧប្បលមាលិនី [បីតុប្បលមធារិនី (ស្យា. ក.), បីតុប្បលមាលិនី (បី.)].

៧៩៦. ‘‘បីតបាសាទសយនេ, បីតាសនេ បីតភាជនេ;

បីតឆត្តេ បីតរថេ, បីតស្សេ បីតពីជនេ.

៧៩៧. ‘‘កិំ កម្មមករី ភទ្ទេ, បុព្ពេ មានុសកេ ភវេ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៧៩៨. ‘‘កោសាតកី នាម លតត្ថិ ភន្តេ, តិត្តិកា អនភិច្ឆិតា;

តស្សា ចត្តារិ បុប្ផានិ, ថូបំ អភិហរិំ អហំ.

៧៩៩. ‘‘សត្ថុ សរីរមុទ្ទិស្ស, វិប្បសន្នេន ចេតសា;

នាស្ស មគ្គំ អវេក្ខិស្សំ, ន តគ្គមនសា [តទគ្គមនសា (សី.), តទង្គមនសា (ស្យា.)] សតី.

៨០០. ‘‘តតោ មំ អវធី គាវី, ថូបំ អបត្តមានសំ;

តញ្ចាហំ អភិសញ្ចេយ្យំ, ភិយ្យោ [ភីយោ (សី. អដ្ឋ.)] នូន ឥតោ សិយា.

៨០១. ‘‘តេន កម្មេន ទេវិន្ទ, មឃវា ទេវកុញ្ជរោ;

បហាយ មានុសំ ទេហំ, តវ សហព្យ [សហព្យត (សី. ស្យា.)] មាគតា’’តិ.

៨០២. ឥទំ សុត្វា តិទសាធិបតិ, មឃវា ទេវកុញ្ជរោ;

តាវតិំសេ បសាទេន្តោ, មាតលិំ ឯតទព្រវិ [ឯតទព្រូវីតិ (សី.)].

៨០៣. ‘‘បស្ស មាតលិ អច្ឆេរំ, ចិត្តំ កម្មផលំ ឥទំ;

អប្បកម្បិ កតំ ទេយ្យំ, បុញ្ញំ ហោតិ មហប្ផលំ.

៨០៤. ‘‘នត្ថិ ចិត្តេ បសន្នម្ហិ, អប្បកា នាម ទក្ខិណា;

តថាគតេ វា សម្ពុទ្ធេ, អថ វា តស្ស សាវកេ.

៨០៥. ‘‘ឯហិ មាតលិ អម្ហេបិ, ភិយ្យោ ភិយ្យោ មហេមសេ;

តថាគតស្ស ធាតុយោ, សុខោ បុញ្ញាន មុច្ចយោ.

៨០៦. ‘‘តិដ្ឋន្តេ និព្ពុតេ ចាបិ, សមេ ចិត្តេ សមំ ផលំ;

ចេតោបណិធិហេតុ ហិ, សត្តា គច្ឆន្តិ សុគ្គតិំ.

៨០៧. ‘‘ពហូនំ [ពហុន្នំ (សី. ស្យា.)] វត អត្ថាយ, ឧប្បជ្ជន្តិ តថាគតា;

យត្ថ ការំ ករិត្វាន, សគ្គំ គច្ឆន្តិ ទាយកា’’តិ.

បីតវិមានំ នវមំ.