៩. វិសាលក្ខិវិមានវត្ថុ

៦៦៦. ‘‘កា នាម ត្វំ វិសាលក្ខិ [វិសាលក្ខី (ស្យា.)], រម្មេ ចិត្តលតាវនេ;

សមន្តា អនុបរិយាសិ, នារីគណបុរក្ខតា [បុរក្ខិតា (ស្យា. ក.)].

៦៦៧. ‘‘យទា ទេវា តាវតិំសា, បវិសន្តិ ឥមំ វនំ;

សយោគ្គា សរថា សព្ពេ, ចិត្រា ហោន្តិ ឥធាគតា.

៦៦៨. ‘‘តុយ្ហញ្ច ឥធ បត្តាយ, ឧយ្យានេ វិចរន្តិយា;

កាយេ ន ទិស្សតី ចិត្តំ, កេន រូបំ តវេទិសំ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៦៩. ‘‘យេន កម្មេន ទេវិន្ទ, រូបំ មយ្ហំ គតី ច មេ;

ឥទ្ធិ ច អានុភាវោ ច, តំ សុណោហិ បុរិន្ទទ.

៦៧០. ‘‘អហំ រាជគហេ រម្មេ, សុនន្ទា នាមុបាសិកា;

សទ្ធា សីលេន សម្បន្នា, សំវិភាគរតា សទា.

៦៧១. ‘‘អច្ឆាទនញ្ច ភត្តញ្ច, សេនាសនំ បទីបិយំ;

អទាសិំ ឧជុភូតេសុ, វិប្បសន្នេន ចេតសា.

៦៧២. ‘‘ចាតុទ្ទសិំ [ចតុទ្ទសិំ (បី. ក.)] បញ្ចទសិំ, យា ច បក្ខស្ស អដ្ឋមី;

បាដិហារិយបក្ខញ្ច, អដ្ឋង្គសុសមាគតំ.

៦៧៣. ‘‘ឧបោសថំ ឧបវសិស្សំ, សទា សីលេសុ សំវុតា;

សញ្ញមា សំវិភាគា ច, វិមានំ អាវសាមហំ.

៦៧៤. ‘‘បាណាតិបាតា វិរតា, មុសាវាទា ច សញ្ញតា;

ថេយ្យា ច អតិចារា ច, មជ្ជបានា ច អារកា.

៦៧៥. ‘‘បញ្ចសិក្ខាបទេ រតា, អរិយសច្ចាន កោវិទា;

ឧបាសិកា ចក្ខុមតោ, គោតមស្ស យសស្សិនោ.

៦៧៦. ‘‘តស្សា មេ ញាតិកុលា ទាសី [ញាតិកុលំ អាសី (ស្យា. ក.)], សទា មាលាភិហារតិ;

តាហំ ភគវតោ ថូបេ, សព្ពមេវាភិរោបយិំ.

៦៧៧. ‘‘ឧបោសថេ ចហំ គន្ត្វា, មាលាគន្ធវិលេបនំ;

ថូបស្មិំ អភិរោបេសិំ, បសន្នា សេហិ បាណិភិ.

៦៧៨. ‘‘តេន កម្មេន ទេវិន្ទ, រូបំ មយ្ហំ គតី ច មេ;

ឥទ្ធី ច អានុភាវោ ច, យំ មាលំ អភិរោបយិំ.

៦៧៩. ‘‘យញ្ច សីលវតី អាសិំ, ន តំ តាវ វិបច្ចតិ;

អាសា ច បន មេ ទេវិន្ទ, សកទាគាមិនី សិយ’’ន្តិ.

វិសាលក្ខិវិមានំ នវមំ.