១០. បារិច្ឆត្តកវិមានវត្ថុ

៦៨០. ‘‘បារិច្ឆត្តកេ កោវិឡារេ, រមណីយេ មនោរមេ;

ទិព្ពមាលំ គន្ថមានា, គាយន្តី សម្បមោទសិ.

៦៨១. ‘‘តស្សា តេ នច្ចមានាយ, អង្គមង្គេហិ សព្ពសោ;

ទិព្ពា សទ្ទា និច្ឆរន្តិ, សវនីយា មនោរមា.

៦៨២. ‘‘តស្សា តេ នច្ចមានាយ, អង្គមង្គេហិ សព្ពសោ;

ទិព្ពា គន្ធា បវាយន្តិ, សុចិគន្ធា មនោរមា.

៦៨៣. ‘‘វិវត្តមានា កាយេន, យា វេណីសុ បិឡន្ធនា.

តេសំ សុយ្យតិ និគ្ឃោសោ, តូរិយេ បញ្ចង្គិកេ យថា.

៦៨៤. ‘‘វដំសកា វាតធុតា [វាតធូតា (សី. ស្យា.)], វាតេន សម្បកម្បិតា;

តេសំ សុយ្យតិ និគ្ឃោសោ, តូរិយេ បញ្ចង្គិកេ យថា.

៦៨៥. ‘‘យាបិ តេ សិរស្មិំ មាលា, សុចិគន្ធា មនោរមា;

វាតិ គន្ធោ ទិសា សព្ពា, រុក្ខោ មញ្ជូសកោ យថា.

៦៨៦. ‘‘ឃាយសេ តំ សុចិគន្ធំ [សុចិំ គន្ធំ (សី.)], រូបំ បស្សសិ អមានុសំ [មានុសំ (បី.)];

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៨៧. ‘‘បភស្សរំ អច្ចិមន្តំ, វណ្ណគន្ធេន សំយុតំ;

អសោកបុប្ផមាលាហំ, ពុទ្ធស្ស ឧបនាមយិំ.

៦៨៨. ‘‘តាហំ កម្មំ ករិត្វាន, កុសលំ ពុទ្ធវណ្ណិតំ;

អបេតសោកា សុខិតា, សម្បមោទាមនាមយា’’តិ.

បារិច្ឆត្តកវិមានំ ទសមំ.

បារិច្ឆត្តកវគ្គោ តតិយោ និដ្ឋិតោ.

តស្សុទ្ទានំ –

ឧឡារោ ឧច្ឆុ បល្លង្កោ, លតា ច គុត្តិលេន ច;

ទទ្ទល្លបេសមល្លិកា, វិសាលក្ខិ បារិច្ឆត្តកោ;

វគ្គោ តេន បវុច្ចតីតិ.