៨. មល្លិកាវិមានវត្ថុ

៦៥៨. ‘‘បីតវត្ថេ បីតធជេ, បីតាលង្ការភូសិតេ;

បីតន្តរាហិ វគ្គូហិ, អបិឡន្ធាវ សោភសិ.

៦៥៩. ‘‘កា កម្ពុកាយូរធរេ [កកម្ពុកាយុរធរេ (ស្យា.)], កញ្ចនាវេឡភូសិតេ;

ហេមជាលកសញ្ឆន្នេ [បច្ឆន្នេ (សី.)], នានារតនមាលិនី.

៦៦០. ‘‘សោវណ្ណមយា លោហិតង្គមយា [លោហិតង្កមយា (សី. ស្យា.)] ច, មុត្តាមយា វេឡុរិយមយា ច;

មសារគល្លា សហលោហិតង្គា [សហលោហិតង្កា (សី.), សហលោហិតកា (ស្យា.)], បារេវតក្ខីហិ មណីហិ ចិត្តតា.

៦៦១. ‘‘កោចិ កោចិ ឯត្ថ មយូរសុស្សរោ, ហំសស្ស រញ្ញោ ករវីកសុស្សរោ;

តេសំ សរោ សុយ្យតិ វគ្គុរូបោ, បញ្ចង្គិកំ តូរិយមិវប្បវាទិតំ.

៦៦២. ‘‘រថោ ច តេ សុភោ វគ្គុ [វគ្គូ (ស្យា.)], នានារតនចិត្តិតោ [នានារតនចិត្តង្គោ (ស្យា.)];

នានាវណ្ណាហិ ធាតូហិ, សុវិភត្តោវ សោភតិ.

៦៦៣. ‘‘តស្មិំ រថេ កញ្ចនពិម្ពវណ្ណេ, យា ត្វំ [យត្ថ (ក. សី. ស្យា. ក.)] ឋិតា ភាសសិ មំ បទេសំ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៦៤. ‘‘សោវណ្ណជាលំ មណិសោណ្ណចិត្តិតំ [វិចិត្តំ (ក.), ចិត្តំ (សី. ស្យា.)], មុត្តាចិតំ ហេមជាលេន ឆន្នំ [សញ្ឆន្នំ (ក.)];

បរិនិព្ពុតេ គោតមេ អប្បមេយ្យេ, បសន្នចិត្តា អហមាភិរោបយិំ.

៦៦៥. ‘‘តាហំ កម្មំ ករិត្វាន, កុសលំ ពុទ្ធវណ្ណិតំ;

អបេតសោកា សុខិតា, សម្បមោទាមនាមយា’’តិ.

មល្លិកាវិមានំ អដ្ឋមំ.