៧. បេសវតីវិមានវត្ថុ

៦៤៦. ‘‘ផលិករជតហេមជាលឆន្នំ, វិវិធចិត្រតលមទ្ទសំ សុរម្មំ;

ព្យម្ហំ សុនិម្មិតំ តោរណូបបន្នំ, រុចកុបកិណ្ណមិទំ សុភំ វិមានំ.

៦៤៧. ‘‘ភាតិ ច ទស ទិសា នភេវ សុរិយោ, សរទេ តមោនុទោ សហស្សរំសី;

តថា តបតិមិទំ តវ វិមានំ, ជលមិវ ធូមសិខោ និសេ នភគ្គេ.

៦៤៨. ‘‘មុសតីវ នយនំ សតេរតាវ [សតេរិតាវ (ស្យា. ក.)], អាកាសេ ឋបិតមិទំ មនុញ្ញំ;

វីណាមុរជសម្មតាឡឃុដ្ឋំ, ឥទ្ធំ ឥន្ទបុរំ យថា តវេទំ.

៦៤៩. ‘‘បទុមកុមុទុប្បលកុវលយំ, យោធិក [យូធិក (សី.)] ពន្ធុកនោជកា [យោថិកា ភណ្ឌិកា នោជកា (ស្យា.)] ច សន្តិ;

សាលកុសុមិតបុប្ផិតា អសោកា, វិវិធទុមគ្គសុគន្ធសេវិតមិទំ.

៦៥០. ‘‘សឡលលពុជភុជក [សុជក (សី. ស្យា.)] សំយុត្តា [សញ្ញតា (សី.)], កុសកសុផុល្លិតលតាវលម្ពិនីហិ;

មណិជាលសទិសា យសស្សិនី, រម្មា បោក្ខរណី ឧបដ្ឋិតា តេ.

៦៥១. ‘‘ឧទករុហា ច យេត្ថិ បុប្ផជាតា, ថលជា យេ ច សន្តិ រុក្ខជាតា;

មានុសកាមានុស្សកា ច ទិព្ពា, សព្ពេ តុយ្ហំ និវេសនម្ហិ ជាតា.

៦៥២. ‘‘កិស្ស សំយមទមស្សយំ វិបាកោ, កេនាសិ កម្មផលេនិធូបបន្នា;

យថា ច តេ អធិគតមិទំ វិមានំ, តទនុបទំ អវចាសិឡារបម្ហេ’’តិ [បខុមេតិ (សី.)].

៦៥៣. ‘‘យថា ច មេ អធិគតមិទំ វិមានំ, កោញ្ចមយូរចកោរ [ចង្កោរ (ក.)] សង្ឃចរិតំ;

ទិព្យ [ទិព្ព (សី. បី.)] បិលវហំសរាជចិណ្ណំ, ទិជការណ្ឌវកោកិលាភិនទិតំ.

៦៥៤. ‘‘នានាសន្តានកបុប្ផរុក្ខវិវិធា, បាដលិជម្ពុអសោករុក្ខវន្តំ;

យថា ច មេ អធិគតមិទំ វិមានំ, តំ តេ បវេទយាមិ [បវទិស្សាមិ (សី.), បវេទិស្សាមិ (បី.)] សុណោហិ ភន្តេ.

៦៥៥. ‘‘មគធវរបុរត្ថិមេន, នាឡកគាមោ នាម អត្ថិ ភន្តេ;

តត្ថ អហោសិំ បុរេ សុណិសា, បេសវតីតិ [សេសវតីតិ (សី. ស្យា.)] តត្ថ ជានិំសុ មមំ.

៦៥៦. ‘‘សាហមបចិតត្ថធម្មកុសលំ, ទេវមនុស្សបូជិតំ មហន្តំ;

ឧបតិស្សំ និព្ពុតមប្បមេយ្យំ, មុទិតមនា កុសុមេហិ អព្ភុកិរិំ [អព្ភោកិរិំ (សី. ស្យា. បី. ក.)].

៦៥៧. ‘‘បរមគតិគតញ្ច បូជយិត្វា, អន្តិមទេហធរំ ឥសិំ ឧឡារំ;

បហាយ មានុសកំ សមុស្សយំ, តិទសគតា ឥធ មាវសាមិ ឋាន’’ន្តិ.

បេសវតីវិមានំ សត្តមំ.