៦. ទទ្ទល្លវិមានវត្ថុ

៦១៩. ‘‘ទទ្ទល្លមានា [ទទ្ទឡ្ហមានា (ក.)] វណ្ណេន, យសសា ច យសស្សិនី;

សព្ពេ ទេវេ តាវតិំសេ, វណ្ណេន អតិរោចសិ.

៦២០. ‘‘ទស្សនំ នាភិជានាមិ, ឥទំ បឋមទស្សនំ;

កស្មា កាយា នុ អាគម្ម, នាមេន ភាសសេ មម’’ន្តិ.

៦២១. ‘‘អហំ ភទ្ទេ សុភទ្ទាសិំ, បុព្ពេ មានុសកេ ភវេ;

សហភរិយា ច តេ អាសិំ, ភគិនី ច កនិដ្ឋិកា.

៦២២. ‘‘សា អហំ កាយស្ស ភេទា, វិប្បមុត្តា តតោ ចុតា;

និម្មានរតីនំ ទេវានំ, ឧបបន្នា សហព្យត’’ន្តិ.

៦២៣. ‘‘បហូតកតកល្យាណា, តេ ទេវេ យន្តិ បាណិនោ;

យេសំ ត្វំ កិត្តយិស្សសិ, សុភទ្ទេ ជាតិមត្តនោ.

៦២៤. ‘‘អថ [កថំ (សី. ស្យា.)] ត្វំ កេន វណ្ណេន, កេន វា អនុសាសិតា;

កីទិសេនេវ ទានេន, សុព្ពតេន យសស្សិនី.

៦២៥. ‘‘យសំ ឯតាទិសំ បត្តា, វិសេសំ វិបុលមជ្ឈគា;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦២៦. ‘‘អដ្ឋេវ បិណ្ឌបាតានិ, យំ ទានំ អទទំ បុរេ;

ទក្ខិណេយ្យស្ស សង្ឃស្ស, បសន្នា សេហិ បាណិភិ.

៦២៧. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ.

៦២៩. ‘‘អហំ តយា ពហុតរេ ភិក្ខូ, សញ្ញតេ ព្រហ្មចារយោ [ព្រហ្មចរិនោ (ស្យា.), ព្រហ្មចារិយេ (បី. ក.)];

តប្បេសិំ អន្នបានេន, បសន្នា សេហិ បាណិភិ.

៦៣០. ‘‘តយា ពហុតរំ ទត្វា, ហីនកាយូបគា អហំ [អហុំ (ក. សី.)];

កថំ ត្វំ អប្បតរំ ទត្វា, វិសេសំ វិបុលមជ្ឈគា;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៣១. ‘‘មនោភាវនីយោ ភិក្ខុ, សន្ទិដ្ឋោ មេ បុរេ អហុ;

តាហំ ភត្តេន [ភទ្ទេ (ក.)] និមន្តេសិំ, រេវតំ អត្តនដ្ឋមំ.

៦៣២. ‘‘សោ មេ អត្ថបុរេក្ខារោ, អនុកម្បាយ រេវតោ;

សង្ឃេ ទេហីតិ មំវោច, តស្សាហំ វចនំ ករិំ.

៦៣៣. ‘‘សា ទក្ខិណា សង្ឃគតា, អប្បមេយ្យេ បតិដ្ឋិតា;

បុគ្គលេសុ តយា ទិន្នំ, ន តំ តវ មហប្ផល’’ន្តិ.

៦៣៤. ‘‘ឥទានេវាហំ ជានាមិ, សង្ឃេ ទិន្នំ មហប្ផលំ;

សាហំ គន្ត្វា មនុស្សត្តំ, វទញ្ញូ វីតមច្ឆរា;

សង្ឃេ ទានានិ ទស្សាមិ [សង្ឃេ ទានំ ទស្សាមិហំ (ស្យា.)], អប្បមត្តា បុនប្បុន’’ន្តិ.

៦៣៥. ‘‘កា ឯសា ទេវតា ភទ្ទេ, តយា មន្តយតេ សហ;

សព្ពេ ទេវេ តាវតិំសេ, វណ្ណេន អតិរោចតី’’តិ.

៦៣៦. ‘‘មនុស្សភូតា ទេវិន្ទ, បុព្ពេ មានុសកេ ភវេ;

សហភរិយា ច មេ អាសិ, ភគិនី ច កនិដ្ឋិកា;

សង្ឃេ ទានានិ ទត្វាន, កតបុញ្ញា វិរោចតី’’តិ.

៦៣៧. ‘‘ធម្មេន បុព្ពេ ភគិនី, តយា ភទ្ទេ វិរោចតិ;

យំ សង្ឃម្ហិ អប្បមេយ្យេ, បតិដ្ឋាបេសិ ទក្ខិណំ.

៦៣៨. ‘‘បុច្ឆិតោ ហិ មយា ពុទ្ធោ, គិជ្ឈកូដម្ហិ បព្ពតេ;

វិបាកំ សំវិភាគស្ស, យត្ថ ទិន្នំ មហប្ផលំ.

៦៣៩. ‘‘យជមានានំ មនុស្សានំ, បុញ្ញបេក្ខាន បាណិនំ;

ករោតំ ឱបធិកំ បុញ្ញំ, យត្ថ ទិន្នំ មហប្ផលំ.

៦៤០. ‘‘តំ មេ ពុទ្ធោ វិយាកាសិ, ជានំ កម្មផលំ សកំ;

វិបាកំ សំវិភាគស្ស, យត្ថ ទិន្នំ មហប្ផលំ.

៦៤១. [វិ. វ. ៧៥០; កថា. ៧៩៨] ‘‘ចត្តារោ ច បដិបន្នា, ចត្តារោ ច ផលេ ឋិតា;

ឯស សង្ឃោ ឧជុភូតោ, បញ្ញាសីលសមាហិតោ.

៦៤២. [វិ. វ. ៧៥១; កថា. ៧៩៨] ‘‘យជមានានំ មនុស្សានំ, បុញ្ញបេក្ខាន បាណិនំ;

ករោតំ ឱបធិកំ បុញ្ញំ, សង្ឃេ ទិន្នំ មហប្ផលំ.

៦៤៣. [វិ. វ. ៧៥២; កថា. ៧៩៨] ‘‘ឯសោ ហិ សង្ឃោ វិបុលោ មហគ្គតោ, ឯសប្បមេយ្យោ ឧទធីវ សាគរោ;

ឯតេ ហិ សេដ្ឋា នរវីរសាវកា, បភង្ករា ធម្មមុទីរយន្តិ [ធម្មកថំ ឧទីរយន្តិ (ស្យា.)].

៦៤៤. [វិ. វ. ៧៥៣; កថា. ៧៩៨] ‘‘តេសំ សុទិន្នំ សុហុតំ សុយិដ្ឋំ, យេ សង្ឃមុទ្ទិស្ស ទទន្តិ ទានំ;

សា ទក្ខិណា សង្ឃគតា បតិដ្ឋិតា, មហប្ផលា លោកវិទូន [លោកវិទូហិ (ស្យា. ក.)] វណ្ណិតា.

៦៤៥. [វិ. វ. ៧៥៤; កថា. ៧៩៨] ‘‘ឯតាទិសំ យញ្ញមនុស្សរន្តា [បុញ្ញមនុស្សរន្តា (ស្យា. ក.)], យេ វេទជាតា វិចរន្តិ លោកេ;

វិនេយ្យ មច្ឆេរមលំ សមូលំ, អនិន្ទិតា សគ្គមុបេន្តិ ឋាន’’ន្តិ.

ទទ្ទល្លវិមានំ [ទទ្ទឡ្ហវិមានំ (ក.)] ឆដ្ឋំ.