១២. ចន្ទាថេរីគាថា

១២២. ‘‘ទុគ្គតាហំ បុរេ អាសិំ, វិធវា ច អបុត្តិកា;

វិនា មិត្តេហិ ញាតីហិ, ភត្តចោឡស្ស នាធិគំ.

១២៣. ‘‘បត្តំ ទណ្ឌញ្ច គណ្ហិត្វា, ភិក្ខមានា កុលា កុលំ;

សីតុណ្ហេន ច ឌយ្ហន្តី, សត្ត វស្សានិ ចារិហំ.

១២៤. ‘‘ភិក្ខុនិំ បុន ទិស្វាន, អន្នបានស្ស លាភិនិំ;

ឧបសង្កម្ម អវោចំ [អវោចិំ (ក.)], ‘បព្ពជ្ជំ អនគារិយំ’.

១២៥. ‘‘សា ច មំ អនុកម្បាយ, បព្ពាជេសិ បដាចារា;

តតោ មំ ឱវទិត្វាន, បរមត្ថេ និយោជយិ.

១២៦. ‘‘តស្សាហំ វចនំ សុត្វា, អកាសិំ អនុសាសនិំ;

អមោឃោ អយ្យាយោវាទោ, តេវិជ្ជាម្ហិ អនាសវា’’តិ.

… ចន្ទា ថេរី….

បញ្ចកនិបាតោ និដ្ឋិតោ.