នមោ តស្ស ភគវតោ អរហតោ សម្មាសម្ពុទ្ធស្ស

ខុទ្ទកនិកាយេ

ថេរីគាថាបាឡិ

១. ឯកកនិបាតោ

១. អញ្ញតរាថេរីគាថា

១. ‘‘សុខំ សុបាហិ ថេរិកេ, កត្វា ចោឡេន បារុតា;

ឧបសន្តោ ហិ តេ រាគោ, សុក្ខឌាកំ វ កុម្ភិយ’’ន្តិ.

ឥត្ថំ សុទំ អញ្ញតរា ថេរី អបញ្ញាតា ភិក្ខុនី គាថំ អភាសិត្ថាតិ.

២. មុត្តាថេរីគាថា

២. ‘‘មុត្តេ មុច្ចស្សុ យោគេហិ, ចន្ទោ រាហុគ្គហា ឥវ;

វិប្បមុត្តេន ចិត្តេន, អនណា ភុញ្ជ បិណ្ឌក’’ន្តិ.

ឥត្ថំ សុទំ ភគវា មុត្តំ សិក្ខមានំ ឥមាយ គាថាយ អភិណ្ហំ ឱវទតីតិ.

៣. បុណ្ណាថេរីគាថា

៣. ‘‘បុណ្ណេ បូរស្សុ ធម្មេហិ, ចន្ទោ បន្នរសេរិវ;

បរិបុណ្ណាយ បញ្ញាយ, តមោខន្ធំ [តមោក្ខន្ធំ (សី. ស្យា.)] បទាលយា’’តិ.

ឥត្ថំ សុទំ បុណ្ណា ថេរី គាថំ អភាសិត្ថាតិ.

៤. តិស្សាថេរីគាថា

៤. ‘‘តិស្សេ សិក្ខស្សុ សិក្ខាយ, មា តំ យោគា ឧបច្ចគុំ;

សព្ពយោគវិសំយុត្តា, ចរ លោកេ អនាសវា’’តិ.

… តិស្សា ថេរី….

៥. អញ្ញតរាតិស្សាថេរីគាថា

៥. ‘‘តិស្សេ យុញ្ជស្សុ ធម្មេហិ, ខណោ តំ មា ឧបច្ចគា;

ខណាតីតា ហិ សោចន្តិ, និរយម្ហិ សមប្បិតា’’តិ.

… អញ្ញតរា តិស្សា ថេរី….

៦. ធីរាថេរីគាថា

៦. ‘‘ធីរេ និរោធំ ផុសេហិ [ផុស្សេហិ (សី.)], សញ្ញាវូបសមំ សុខំ;

អារាធយាហិ និព្ពានំ, យោគក្ខេមមនុត្តរ’’ន្តិ [យោគក្ខេមំ អនុត្តរន្តិ (សី. ស្យា.)].

… ធីរា ថេរី….

៧. វីរាថេរីគាថា

៧. ‘‘វីរា វីរេហិ [ធីរា ធីរេហិ (ក.)] ធម្មេហិ, ភិក្ខុនី ភាវិតិន្ទ្រិយា;

ធារេហិ អន្តិមំ ទេហំ, ជេត្វា មារំ សវាហិនិ’’ន្តិ [សវាហនន្តិ (ក.)].

… វីរា ថេរី….

៨. មិត្តាថេរីគាថា

៨. ‘‘សទ្ធាយ បព្ពជិត្វាន, មិត្តេ មិត្តរតា ភវ;

ភាវេហិ កុសលេ ធម្មេ, យោគក្ខេមស្ស បត្តិយា’’តិ.

… មិត្តា ថេរី….

៩. ភទ្រាថេរីគាថា

៩. ‘‘សទ្ធាយ បព្ពជិត្វាន, ភទ្រេ ភទ្ររតា ភវ;

ភាវេហិ កុសលេ ធម្មេ, យោគក្ខេមមនុត្តរ’’ន្តិ.

… ភទ្រា ថេរី….

១០. ឧបសមាថេរីគាថា

១០. ‘‘ឧបសមេ តរេ ឱឃំ, មច្ចុធេយ្យំ សុទុត្តរំ;

ធារេហិ អន្តិមំ ទេហំ, ជេត្វា មារំ សវាហន’’ន្តិ.

… ឧបសមា ថេរី….

១១. មុត្តាថេរីគាថា

១១. ‘‘សុមុត្តា សាធុមុត្តាម្ហិ, តីហិ ខុជ្ជេហិ មុត្តិយា;

ឧទុក្ខលេន មុសលេន, បតិនា ខុជ្ជកេន ច;

មុត្តាម្ហិ ជាតិមរណា, ភវនេត្តិ សមូហតា’’តិ.

… មុត្តា ថេរី….

១២. ធម្មទិន្នាថេរីគាថា

១២. ‘‘ឆន្ទជាតា អវសាយី, មនសា ច ផុដា [ផុដ្ឋា (ស្យា.), ផុឋា (សី. អដ្ឋ.)] សិយា;

កាមេសុ អប្បដិពទ្ធចិត្តា [អប្បដិពន្ធចិត្តា (ក.)], ឧទ្ធំសោតាតិ វុច្ចតី’’តិ [ឧទ្ធំសោតា វិមុច្ចតីតិ (សី. បី.)].

… ធម្មទិន្នា ថេរី….

១៣.វិសាខាថេរីគាថា

១៣. ‘‘ករោថ ពុទ្ធសាសនំ, យំ កត្វា នានុតប្បតិ;

ខិប្បំ បាទានិ ធោវិត្វា, ឯកមន្តេ និសីទថា’’តិ.

… វិសាខា ថេរី….

១៤.សុមនាថេរីគាថា

១៤. ‘‘ធាតុយោ ទុក្ខតោ ទិស្វា, មា ជាតិំ បុនរាគមិ;

ភវេ ឆន្ទំ វិរាជេត្វា, ឧបសន្តា ចរិស្សសី’’តិ.

… សុមនា ថេរី….

១៥. ឧត្តរាថេរីគាថា

១៥. ‘‘កាយេន សំវុតា អាសិំ, វាចាយ ឧទ ចេតសា;

សមូលំ តណ្ហមព្ពុយ្ហ, សីតិភូតាម្ហិ និព្ពុតា’’តិ.

… ឧត្តរា ថេរី….

១៦. វុឌ្ឍបព្ពជិតសុមនាថេរីគាថា

១៦. ‘‘សុខំ ត្វំ វុឌ្ឍិកេ សេហិ, កត្វា ចោឡេន បារូតា;

ឧបសន្តោ ហិ តេ រាគោ, សីតិភូតាសិ និព្ពុតា’’តិ.

… សុមនា វុឌ្ឍបព្ពជិតា ថេរី….

១៧. ធម្មាថេរីគាថា

១៧. ‘‘បិណ្ឌបាតំ ចរិត្វាន, ទណ្ឌមោលុព្ភ ទុព្ពលា;

វេធមានេហិ គត្តេហិ, តត្ថេវ និបតិំ ឆមា;

ទិស្វា អាទីនវំ កាយេ, អថ ចិត្តំ វិមុច្ចិ មេ’’តិ.

… ធម្មា ថេរី….

១៨. សង្ឃាថេរីគាថា

១៨. ‘‘ហិត្វា ឃរេ បព្ពជិត្វា [បព្ពជិតា (សី. អដ្ឋ.)], ហិត្វា បុត្តំ បសុំ បិយំ;

ហិត្វា រាគញ្ច ទោសញ្ច, អវិជ្ជញ្ច វិរាជិយ;

សមូលំ តណ្ហមព្ពុយ្ហ, ឧបសន្តាម្ហិ និព្ពុតា’’តិ.

… សង្ឃា ថេរី….

ឯកកនិបាតោ និដ្ឋិតោ.

២. ទុកនិបាតោ

១. អភិរូបនន្ទាថេរីគាថា

១៩. [អប. ថេរី ២.៤.១៥៧ អបទានេបិ] ‘‘អាតុរំ អសុចិំ បូតិំ, បស្ស នន្ទេ សមុស្សយំ;

អសុភាយ ចិត្តំ ភាវេហិ, ឯកគ្គំ សុសមាហិតំ.

២០. ‘‘អនិមិត្តញ្ច ភាវេហិ, មានានុសយមុជ្ជហ;

តតោ មានាភិសមយា, ឧបសន្តា ចរិស្សសី’’តិ.

ឥត្ថំ សុទំ ភគវា អភិរូបនន្ទំ សិក្ខមានំ ឥមាហិ គាថាហិ អភិណ្ហំ ឱវទតីតិ [ឥត្ថំ សុទំ ភគវា អភិរូបនន្ទំ សិក្ខមានំ ឥមាហិ គាថាហិ អភិណ្ហំ ឱវទតីតិ (ក.)].

២. ជេន្តាថេរីគាថា

២១. ‘‘យេ ឥមេ សត្ត ពោជ្ឈង្គា, មគ្គា និព្ពានបត្តិយា;

ភាវិតា តេ មយា សព្ពេ, យថា ពុទ្ធេន ទេសិតា.

២២. ‘‘ទិដ្ឋោ ហិ មេ សោ ភគវា, អន្តិមោយំ សមុស្សយោ;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

ឥត្ថំ សុទំ ជេន្តា ថេរី គាថាយោ អភាសិត្ថាតិ.

៣. សុមង្គលមាតាថេរីគាថា

២៣. ‘‘សុមុត្តិកា សុមុត្តិកា [សុមុត្តិកេ សុមុត្តិកេ (សី.), សុមុត្តិកេ សុមុត្តិកា (ស្យា. ក.)], សាធុមុត្តិកាម្ហិ មុសលស្ស;

អហិរិកោ មេ ឆត្តកំ វាបិ, ឧក្ខលិកា មេ ទេឌ្ឌុភំ វាតិ.

២៤. ‘‘រាគញ្ច អហំ ទោសញ្ច, ចិច្ចិដិ ចិច្ចិដីតិ វិហនាមិ;

សា រុក្ខមូលមុបគម្ម, អហោ សុខន្តិ សុខតោ ឈាយាមី’’តិ.

… សុមង្គលមាតា ថេរី [អញ្ញតរា ថេរី ភិក្ខុនី អបញ្ញាតា (ស្យា. ក.)].

៤. អឌ្ឍកាសិថេរីគាថា

២៥. ‘‘យាវ កាសិជនបទោ, សុង្កោ មេ តត្ថកោ អហុ;

តំ កត្វា នេគមោ អគ្ឃំ, អឌ្ឍេនគ្ឃំ ឋបេសិ មំ.

២៦. ‘‘អថ និព្ពិន្ទហំ រូបេ, និព្ពិន្ទញ្ច វិរជ្ជហំ;

មា បុន ជាតិសំសារំ, សន្ធាវេយ្យំ បុនប្បុនំ;

តិស្សោ វិជ្ជា សច្ឆិកតា, កតំ ពុទ្ធស្ស សាសន’’ន្តិ.

… អឌ្ឍកាសិ ថេរី….

៥. ចិត្តាថេរីគាថា

២៧. ‘‘កិញ្ចាបិ ខោម្ហិ កិសិកា, គិលានា ពាឡ្ហទុព្ពលា;

ទណ្ឌមោលុព្ភ គច្ឆាមិ, បព្ពតំ អភិរូហិយ.

២៨. ‘‘សង្ឃាដិំ និក្ខិបិត្វាន, បត្តកញ្ច និកុជ្ជិយ;

សេលេ ខម្ភេសិមត្តានំ, តមោខន្ធំ បទាលិយា’’តិ.

… ចិត្តា ថេរី….

៦. មេត្តិកាថេរីគាថា

២៩. ‘‘កិញ្ចាបិ ខោម្ហិ ទុក្ខិតា, ទុព្ពលា គតយោព្ពនា;

ទណ្ឌមោលុព្ភ គច្ឆាមិ, បព្ពតំ អភិរូហិយ.

៣០. ‘‘និក្ខិបិត្វាន សង្ឃាដិំ, បត្តកញ្ច និកុជ្ជិយ;

និសិន្នា ចម្ហិ សេលម្ហិ, អថ ចិត្តំ វិមុច្ចិ មេ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… មេត្តិកា ថេរី….

៧. មិត្តាថេរីគាថា

៣១. ‘‘ចាតុទ្ទសិំ បញ្ចទសិំ, យា ច បក្ខស្ស អដ្ឋមី;

បាដិហារិយបក្ខញ្ច, អដ្ឋង្គសុសមាគតំ.

៣២. ‘‘ឧបោសថំ ឧបាគច្ឆិំ, ទេវកាយាភិនន្ទិនី;

សាជ្ជ ឯកេន ភត្តេន, មុណ្ឌា សង្ឃាដិបារុតា;

ទេវកាយំ ន បត្ថេហំ, វិនេយ្យ ហទយេ ទរ’’ន្តិ.

… មិត្តា ថេរី….

៨. អភយមាតុថេរីគាថា

៣៣. ‘‘ឧទ្ធំ បាទតលា អម្ម, អធោ វេ កេសមត្ថកា;

បច្ចវេក្ខស្សុមំ កាយំ, អសុចិំ បូតិគន្ធិកំ.

៣៤. ‘‘ឯវំ វិហរមានាយ, សព្ពោ រាគោ សមូហតោ;

បរិឡាហោ សមុច្ឆិន្នោ, សីតិភូតាម្ហិ និព្ពុតា’’តិ.

… អភយមាតុ ថេរី….

៩. អភយាថេរីគាថា

៣៥. ‘‘អភយេ ភិទុរោ កាយោ, យត្ថ សតា បុថុជ្ជនា;

និក្ខិបិស្សាមិមំ ទេហំ, សម្បជានា សតីមតី.

៣៦. ‘‘ពហូហិ ទុក្ខធម្មេហិ, អប្បមាទរតាយ មេ;

តណ្ហក្ខយោ អនុប្បត្តោ, កតំ ពុទ្ធស្ស សាសន’’ន្តិ.

… អភយា ថេរី….

១០. សាមាថេរីគាថា

៣៧. ‘‘ចតុក្ខត្តុំ បញ្ចក្ខត្តុំ, វិហារា ឧបនិក្ខមិំ;

អលទ្ធា ចេតសោ សន្តិំ, ចិត្តេ អវសវត្តិនី;

តស្សា មេ អដ្ឋមី រត្តិ, យតោ តណ្ហា សមូហតា.

៣៨. ‘‘ពហូហិ ទុក្ខធម្មេហិ, អប្បមាទរតាយ មេ;

តណ្ហក្ខយោ អនុប្បត្តោ, កតំ ពុទ្ធស្ស សាសន’’ន្តិ.

… សាមា ថេរី….

ទុកនិបាតោ និដ្ឋិតោ.

៣. តិកនិបាតោ

១. អបរាសាមាថេរីគាថា

៣៩. ‘‘បណ្ណវីសតិវស្សានិ, យតោ បព្ពជិតាយ មេ;

នាភិជានាមិ ចិត្តស្ស, សមំ លទ្ធំ កុទាចនំ.