៥. បញ្ចកនិបាតោ

១. អញ្ញតរាថេរីគាថា

៦៧. ‘‘បណ្ណវីសតិវស្សានិ, យតោ បព្ពជិតា អហំ;

នាច្ឆរាសង្ឃាតមត្តម្បិ, ចិត្តស្សូបសមជ្ឈគំ.

៦៨. ‘‘អលទ្ធា ចេតសោ សន្តិំ, កាមរាគេនវស្សុតា;

ពាហា បគ្គយ្ហ កន្ទន្តី, វិហារំ បាវិសិំ អហំ.

៦៩. ‘‘សា ភិក្ខុនិំ ឧបាគច្ឆិំ, យា មេ សទ្ធាយិកា អហុ;

សា មេ ធម្មមទេសេសិ, ខន្ធាយតនធាតុយោ.

៧០. ‘‘តស្សា ធម្មំ សុណិត្វាន, ឯកមន្តេ ឧបាវិសិំ;

បុព្ពេនិវាសំ ជានាមិ, ទិព្ពចក្ខុ វិសោធិតំ.

៧១. ‘‘ចេតោបរិច្ចញាណញ្ច [ចេតោបរិយញាណញ្ច (ក.)], សោតធាតុ វិសោធិតា;

ឥទ្ធីបិ មេ សច្ឆិកតា, បត្តោ មេ អាសវក្ខយោ;

ឆឡភិញ្ញា [ឆ មេភិញ្ញា (ស្យា. ក.)] សច្ឆិកតា, កតំ ពុទ្ធស្ស សាសន’’ន្តិ.

… អញ្ញតរា ថេរី ….

២. វិមលាថេរីគាថា

៧២. ‘‘មត្តា វណ្ណេន រូបេន, សោភគ្គេន យសេន ច;

យោព្ពនេន ចុបត្ថទ្ធា, អញ្ញាសមតិមញ្ញិហំ.

៧៣. ‘‘វិភូសេត្វា ឥមំ កាយំ, សុចិត្តំ ពាលលាបនំ;

អដ្ឋាសិំ វេសិទ្វារម្ហិ, លុទ្ទោ បាសមិវោឌ្ឌិយ.

៧៤. ‘‘បិលន្ធនំ វិទំសេន្តី, គុយ្ហំ បកាសិកំ ពហុំ;

អកាសិំ វិវិធំ មាយំ, ឧជ្ជគ្ឃន្តី ពហុំ ជនំ.

៧៥. ‘‘សាជ្ជ បិណ្ឌំ ចរិត្វាន, មុណ្ឌា សង្ឃាដិបារុតា;

និសិន្នា រុក្ខមូលម្ហិ, អវិតក្កស្ស លាភិនី.

៧៦. ‘‘សព្ពេ យោគា សមុច្ឆិន្នា, យេ ទិព្ពា យេ ច មានុសា;

ខេបេត្វា អាសវេ សព្ពេ, សីតិភូតាម្ហិ និព្ពុតា’’តិ.

… វិមលា បុរាណគណិកា ថេរី….

៣. សីហាថេរីគាថា

៧៧. ‘‘អយោនិសោ មនសិការា, កាមរាគេន អដ្ដិតា;

អហោសិំ ឧទ្ធតា បុព្ពេ, ចិត្តេ អវសវត្តិនី.

៧៨. ‘‘បរិយុដ្ឋិតា ក្លេសេហិ, សុភសញ្ញានុវត្តិនី;

សមំ ចិត្តស្ស ន លភិំ, រាគចិត្តវសានុគា.

៧៩. ‘‘កិសា បណ្ឌុ វិវណ្ណា ច, សត្ត វស្សានិ ចារិហំ;

នាហំ ទិវា វា រត្តិំ វា, សុខំ វិន្ទិំ សុទុក្ខិតា.

៨០. ‘‘តតោ រជ្ជុំ គហេត្វាន, បាវិសិំ វនមន្តរំ;

វរំ មេ ឥធ ឧព្ពន្ធំ, យញ្ច ហីនំ បុនាចរេ.

៨១. ‘‘ទឡ្ហបាសំ [ទឡ្ហំ បាសំ (សី.)] ករិត្វាន, រុក្ខសាខាយ ពន្ធិយ;

បក្ខិបិំ បាសំ គីវាយំ, អថ ចិត្តំ វិមុច្ចិ មេ’’តិ.

… សីហា ថេរី….

៤. សុន្ទរីនន្ទាថេរីគាថា

៨២. ‘‘អាតុរំ អសុចិំ បូតិំ, បស្ស នន្ទេ សមុស្សយំ;

អសុភាយ ចិត្តំ ភាវេហិ, ឯកគ្គំ សុសមាហិតំ.

៨៣. ‘‘យថា ឥទំ តថា ឯតំ, យថា ឯតំ តថា ឥទំ;

ទុគ្គន្ធំ បូតិកំ វាតិ, ពាលានំ អភិនន្ទិតំ.

៨៤. ‘‘ឯវមេតំ អវេក្ខន្តី, រត្តិន្ទិវមតន្ទិតា;

តតោ សកាយ បញ្ញាយ, អភិនិព្ពិជ្ឈ [អភិនិព្ពិជ្ជ (សី. ស្យា.)] ទក្ខិសំ.

៨៥. ‘‘តស្សា មេ អប្បមត្តាយ, វិចិនន្តិយា យោនិសោ;

យថាភូតំ អយំ កាយោ, ទិដ្ឋោ សន្តរពាហិរោ.

៨៦. ‘‘អថ និព្ពិន្ទហំ កាយេ, អជ្ឈត្តញ្ច វិរជ្ជហំ;

អប្បមត្តា វិសំយុត្តា, ឧបសន្តាម្ហិ និព្ពុតា’’តិ.

… សុន្ទរីនន្ទា ថេរី….

៥. នន្ទុត្តរាថេរីគាថា

៨៧. ‘‘អគ្គិំ ចន្ទញ្ច សូរិយញ្ច, ទេវតា ច នមស្សិហំ;

នទីតិត្ថានិ គន្ត្វាន, ឧទកំ ឱរុហាមិហំ.

៨៨. ‘‘ពហូវតសមាទានា, អឌ្ឍំ សីសស្ស ឱលិខិំ;

ឆមាយ សេយ្យំ កប្បេមិ, រត្តិំ ភត្តំ ន ភុញ្ជហំ.

៨៩. ‘‘វិភូសាមណ្ឌនរតា, ន្ហាបនុច្ឆាទនេហិ ច;

ឧបកាសិំ ឥមំ កាយំ, កាមរាគេន អដ្ដិតា.

៩០. ‘‘តតោ សទ្ធំ លភិត្វាន, បព្ពជិំ អនគារិយំ;

ទិស្វា កាយំ យថាភូតំ, កាមរាគោ សមូហតោ.

៩១. ‘‘សព្ពេ ភវា សមុច្ឆិន្នា, ឥច្ឆា ច បត្ថនាបិ ច;

សព្ពយោគវិសំយុត្តា, សន្តិំ បាបុណិ ចេតសោ’’តិ.

… នន្ទុត្តរា ថេរី….

៦. មិត្តាកាឡីថេរីគាថា

៩២. ‘‘សទ្ធាយ បព្ពជិត្វាន, អគារស្មានគារិយំ;

វិចរិំហំ តេន តេន, លាភសក្ការឧស្សុកា.

៩៣. ‘‘រិញ្ចិត្វា បរមំ អត្ថំ, ហីនមត្ថំ អសេវិហំ;

កិលេសានំ វសំ គន្ត្វា, សាមញ្ញត្ថំ ន ពុជ្ឈិហំ.

៩៤. ‘‘តស្សា មេ អហុ សំវេគោ, និសិន្នាយ វិហារកេ;

ឧម្មគ្គបដិបន្នាម្ហិ, តណ្ហាយ វសមាគតា.

៩៥. ‘‘អប្បកំ ជីវិតំ មយ្ហំ, ជរា ព្យាធិ ច មទ្ទតិ;

បុរាយំ ភិជ្ជតិ [ជរាយ ភិជ្ជតេ (សី.)] កាយោ, ន មេ កាលោ បមជ្ជិតុំ.

៩៦. ‘‘យថាភូតមវេក្ខន្តី, ខន្ធានំ ឧទយព្ពយំ;

វិមុត្តចិត្តា ឧដ្ឋាសិំ, កតំ ពុទ្ធស្ស សាសន’’ន្តិ.

… មិត្តា កាឡី ថេរី….

៧. សកុលាថេរីគាថា

៩៧. ‘‘អគារស្មិំ វសន្តីហំ, ធម្មំ សុត្វាន ភិក្ខុនោ;

អទ្ទសំ វិរជំ ធម្មំ, និព្ពានំ បទមច្ចុតំ.

៩៨. ‘‘សាហំ បុត្តំ ធីតរញ្ច, ធនធញ្ញញ្ច ឆឌ្ឌិយ;

កេសេ ឆេទាបយិត្វាន, បព្ពជិំ អនគារិយំ.

៩៩. ‘‘សិក្ខមានា អហំ សន្តី, ភាវេន្តី មគ្គមញ្ជសំ;

បហាសិំ រាគទោសញ្ច, តទេកដ្ឋេ ច អាសវេ.

១០០. ‘‘ភិក្ខុនី ឧបសម្បជ្ជ, បុព្ពជាតិមនុស្សរិំ;

ទិព្ពចក្ខុ វិសោធិតំ [វិសោធិតំ ទិព្ពចក្ខុ (សី.)], វិមលំ សាធុភាវិតំ.

១០១. ‘‘សង្ខារេ បរតោ ទិស្វា, ហេតុជាតេ បលោកិតេ [បលោកិនេ (ក.)];

បហាសិំ អាសវេ សព្ពេ, សីតិភូតាម្ហិ និព្ពុតា’’តិ.

… សកុលា ថេរី….

៨. សោណាថេរីគាថា

១០២. ‘‘ទស បុត្តេ វិជាយិត្វា, អស្មិំ រូបសមុស្សយេ;

តតោហំ ទុព្ពលា ជិណ្ណា, ភិក្ខុនិំ ឧបសង្កមិំ.

១០៣. ‘‘សា មេ ធម្មមទេសេសិ, ខន្ធាយតនធាតុយោ;

តស្សា ធម្មំ សុណិត្វាន, កេសេ ឆេត្វាន បព្ពជិំ.

១០៤. ‘‘តស្សា មេ សិក្ខមានាយ, ទិព្ពចក្ខុ វិសោធិតំ;

បុព្ពេនិវាសំ ជានាមិ, យត្ថ មេ វុសិតំ បុរេ.

១០៥. ‘‘អនិមិត្តញ្ច ភាវេមិ, ឯកគ្គា សុសមាហិតា;

អនន្តរាវិមោក្ខាសិំ, អនុបាទាយ និព្ពុតា.

១០៦. ‘‘បញ្ចក្ខន្ធា បរិញ្ញាតា, តិដ្ឋន្តិ ឆិន្នមូលកា;

ធិ តវត្ថុ ជរេ ជម្មេ, នត្ថិ ទានិ បុនព្ភវោ’’តិ.

… សោណា ថេរី….

៩. ភទ្ទាកុណ្ឌលកេសាថេរីគាថា

១០៧. ‘‘លូនកេសី បង្កធរី, ឯកសាដី បុរេ ចរិំ;

អវជ្ជេ វជ្ជមតិនី, វជ្ជេ ចាវជ្ជទស្សិនី.

១០៨. ‘‘ទិវាវិហារា និក្ខម្ម, គិជ្ឈកូដម្ហិ បព្ពតេ;

អទ្ទសំ វិរជំ ពុទ្ធំ, ភិក្ខុសង្ឃបុរក្ខតំ.

១០៩. ‘‘និហច្ច ជាណុំ វន្ទិត្វា, សម្មុខា អញ្ជលិំ អកំ;

‘ឯហិ ភទ្ទេ’តិ មំ អវច, សា មេ អាសូបសម្បទា.

១១០. ‘‘ចិណ្ណា អង្គា ច មគធា, វជ្ជី កាសី ច កោសលា;

អនណា បណ្ណាសវស្សានិ, រដ្ឋបិណ្ឌំ អភុញ្ជហំ.

១១១. ‘‘បុញ្ញំ វត បសវិ ពហុំ, សប្បញ្ញោ វតាយំ ឧបាសកោ;

យោ ភទ្ទាយ ចីវរំ អទាសិ, វិប្បមុត្តាយ សព្ពគន្ថេហី’’តិ.

… ភទ្ទា កុណ្ឌលកេសា ថេរី….

១០. បដាចារាថេរីគាថា

១១២. ‘‘នង្គលេហិ កសំ ខេត្តំ, ពីជានិ បវបំ ឆមា;

បុត្តទារានិ បោសេន្តា, ធនំ វិន្ទន្តិ មាណវា.

១១៣. ‘‘កិមហំ សីលសម្បន្នា, សត្ថុសាសនការិកា;

និព្ពានំ នាធិគច្ឆាមិ, អកុសីតា អនុទ្ធតា.

១១៤. ‘‘បាទេ បក្ខាលយិត្វាន, ឧទកេសុ ករោមហំ;

បាទោទកញ្ច ទិស្វាន, ថលតោ និន្នមាគតំ.

១១៥. ‘‘តតោ ចិត្តំ សមាធេសិំ, អស្សំ ភទ្រំវជានិយំ;

តតោ ទីបំ គហេត្វាន, វិហារំ បាវិសិំ អហំ;

សេយ្យំ ឱលោកយិត្វាន, មញ្ចកម្ហិ ឧបាវិសិំ.

១១៦. ‘‘តតោ សូចិំ គហេត្វាន, វដ្ដិំ ឱកស្សយាមហំ;

បទីបស្សេវ និព្ពានំ, វិមោក្ខោ អហុ ចេតសោ’’តិ.

… បដាចារា ថេរី….

១១. តិំសមត្តាថេរីគាថា

១១៧. ‘‘‘មុសលានិ គហេត្វាន, ធញ្ញំ កោដ្ដេន្តិ មាណវា [មានវា (សី.)];

បុត្តទារានិ បោសេន្តា, ធនំ វិន្ទន្តិ មាណវា.

១១៨. ‘‘‘ករោថ ពុទ្ធសាសនំ, យំ កត្វា នានុតប្បតិ;

ខិប្បំ បាទានិ ធោវិត្វា, ឯកមន្តេ និសីទថ;

ចេតោសមថមនុយុត្តា, ករោថ ពុទ្ធសាសនំ’.

១១៩. ‘‘តស្សា តា [តំ (សី.)] វចនំ សុត្វា, បដាចារាយ សាសនំ;

បាទេ បក្ខាលយិត្វាន, ឯកមន្តំ ឧបាវិសុំ;

ចេតោសមថមនុយុត្តា, អកំសុ ពុទ្ធសាសនំ.

១២០. ‘‘រត្តិយា បុរិមេ យាមេ, បុព្ពជាតិមនុស្សរុំ;

រត្តិយា មជ្ឈិមេ យាមេ, ទិព្ពចក្ខុំ វិសោធយុំ;

រត្តិយា បច្ឆិមេ យាមេ, តមោខន្ធំ បទាលយុំ.

១២១. ‘‘ឧដ្ឋាយ បាទេ វន្ទិំសុ, ‘កតា តេ អនុសាសនី;

ឥន្ទំវ ទេវា តិទសា, សង្គាមេ អបរាជិតំ;

បុរក្ខត្វា វិហស្សាម [វិហរាម (សី.), វិហរិស្សាម (ស្យា.)], តេវិជ្ជាម្ហ អនាសវា’’’តិ.

ឥត្ថំ សុទំ តិំសមត្តា ថេរី ភិក្ខុនិយោ បដាចារាយ សន្តិកេ អញ្ញំ ព្យាករិំសូតិ.

១២. ចន្ទាថេរីគាថា

១២២. ‘‘ទុគ្គតាហំ បុរេ អាសិំ, វិធវា ច អបុត្តិកា;

វិនា មិត្តេហិ ញាតីហិ, ភត្តចោឡស្ស នាធិគំ.

១២៣. ‘‘បត្តំ ទណ្ឌញ្ច គណ្ហិត្វា, ភិក្ខមានា កុលា កុលំ;

សីតុណ្ហេន ច ឌយ្ហន្តី, សត្ត វស្សានិ ចារិហំ.

១២៤. ‘‘ភិក្ខុនិំ បុន ទិស្វាន, អន្នបានស្ស លាភិនិំ;

ឧបសង្កម្ម អវោចំ [អវោចិំ (ក.)], ‘បព្ពជ្ជំ អនគារិយំ’.

១២៥. ‘‘សា ច មំ អនុកម្បាយ, បព្ពាជេសិ បដាចារា;

តតោ មំ ឱវទិត្វាន, បរមត្ថេ និយោជយិ.

១២៦. ‘‘តស្សាហំ វចនំ សុត្វា, អកាសិំ អនុសាសនិំ;

អមោឃោ អយ្យាយោវាទោ, តេវិជ្ជាម្ហិ អនាសវា’’តិ.