៦. ឆក្កនិបាតោ

១. បញ្ចសតមត្តាថេរីគាថា

១២៧. ‘‘យស្ស មគ្គំ ន ជានាសិ, អាគតស្ស គតស្ស វា;

តំ កុតោ ចាគតំ សត្តំ [សន្តំ (សី.), បុត្តំ (ស្យា.)], ‘មម បុត្តោ’តិ រោទសិ.

១២៨. ‘‘មគ្គញ្ច ខោស្ស [ខោ’ថ (ស្យា. ក.)] ជានាសិ, អាគតស្ស គតស្ស វា;

ន នំ សមនុសោចេសិ, ឯវំធម្មា ហិ បាណិនោ.

១២៩. ‘‘អយាចិតោ តតាគច្ឆិ, នានុញ្ញាតោ [អននុញ្ញាតោ (សី. ស្យា.)] ឥតោ គតោ;

កុតោចិ នូន អាគន្ត្វា, វសិត្វា កតិបាហកំ;

ឥតោបិ អញ្ញេន គតោ, តតោបញ្ញេន គច្ឆតិ.

១៣០. ‘‘បេតោ មនុស្សរូបេន, សំសរន្តោ គមិស្សតិ;

យថាគតោ តថា គតោ, កា តត្ថ បរិទេវនា’’.

១៣១. ‘‘អព្ពហី [អព្ពុយ្ហំ (ស្យា.)] វត មេ សល្លំ, ទុទ្ទសំ ហទយស្សិតំ;

យា មេ សោកបរេតាយ, បុត្តសោកំ ព្យបានុទិ.

១៣២. ‘‘សាជ្ជ អព្ពូឡ្ហសល្លាហំ, និច្ឆាតា បរិនិព្ពុតា;

ពុទ្ធំ ធម្មញ្ច សង្ឃញ្ច, ឧបេមិ សរណំ មុនិំ’’.

ឥត្ថំ សុទំ បញ្ចសតមត្តា ថេរី ភិក្ខុនិយោ…បេ….

២. វាសេដ្ឋីថេរីគាថា

១៣៣. ‘‘បុត្តសោកេនហំ អដ្ដា, ខិត្តចិត្តា វិសញ្ញិនី;

នគ្គា បកិណ្ណកេសី ច, តេន តេន វិចារិហំ.

១៣៤. ‘‘វីថិ [វសិំ (សី.)] សង្ការកូដេសុ, សុសានេ រថិយាសុ ច;

អចរិំ តីណិ វស្សានិ, ខុប្បិបាសាសមប្បិតា.

១៣៥. ‘‘អថទ្ទសាសិំ សុគតំ, នគរំ មិថិលំ បតិ [គតំ (ក.)];

អទន្តានំ ទមេតារំ, សម្ពុទ្ធមកុតោភយំ.

១៣៦. ‘‘សចិត្តំ បដិលទ្ធាន, វន្ទិត្វាន ឧបាវិសិំ;

សោ មេ ធម្មមទេសេសិ, អនុកម្បាយ គោតមោ.

១៣៧. ‘‘តស្ស ធម្មំ សុណិត្វាន, បព្ពជិំ អនគារិយំ;

យុញ្ជន្តី សត្ថុវចនេ, សច្ឆាកាសិំ បទំ សិវំ.

១៣៨. ‘‘សព្ពេ សោកា សមុច្ឆិន្នា, បហីនា ឯតទន្តិកា;

បរិញ្ញាតា ហិ មេ វត្ថូ, យតោ សោកាន សម្ភវោ’’តិ.

… វាសេដ្ឋី ថេរី….

៣. ខេមាថេរីគាថា

១៣៩. ‘‘ទហរា ត្វំ រូបវតី, អហម្បិ ទហរោ យុវា;

បញ្ចង្គិកេន តុរិយេន [តូរេន (ក.)], ឯហិ ខេមេ រមាមសេ’’.

១៤០. ‘‘ឥមិនា បូតិកាយេន, អាតុរេន បភង្គុនា;

អដ្ដិយាមិ ហរាយាមិ, កាមតណ្ហា សមូហតា.

១៤១. ‘‘សត្តិសូលូបមា កាមា, ខន្ធាសំ អធិកុដ្ដនា;

យំ ‘ត្វំ កាមរតិំ’ ព្រូសិ, ‘អរតី’ ទានិ សា មម.

១៤២. ‘‘សព្ពត្ថ វិហតា នន្ទី, តមោខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តក.

១៤៣. ‘‘នក្ខត្តានិ នមស្សន្តា, អគ្គិំ បរិចរំ វនេ;

យថាភុច្ចមជានន្តា, ពាលា សុទ្ធិមមញ្ញថ.

១៤៤. ‘‘អហញ្ច ខោ នមស្សន្តី, សម្ពុទ្ធំ បុរិសុត្តមំ;

បមុត្តា [បរិមុត្តា (សី. ស្យា.)] សព្ពទុក្ខេហិ, សត្ថុសាសនការិកា’’តិ.

… ខេមា ថេរី….

៤. សុជាតាថេរីគាថា

១៤៥. ‘‘អលង្កតា សុវសនា, មាលិនី ចន្ទនោក្ខិតា;

សព្ពាភរណសញ្ឆន្នា, ទាសីគណបុរក្ខតា.

១៤៦. ‘‘អន្នំ បានញ្ច អាទាយ, ខជ្ជំ ភោជ្ជំ អនប្បកំ;

គេហតោ និក្ខមិត្វាន, ឧយ្យានមភិហារយិំ.

១៤៧. ‘‘តត្ថ រមិត្វា កីឡិត្វា, អាគច្ឆន្តី សកំ ឃរំ;

វិហារំ ទដ្ឋុំ បាវិសិំ, សាកេតេ អញ្ជនំ វនំ.

១៤៨. ‘‘ទិស្វាន លោកបជ្ជោតំ, វន្ទិត្វាន ឧបាវិសិំ;

សោ មេ ធម្មមទេសេសិ, អនុកម្បាយ ចក្ខុមា.

១៤៩. ‘‘សុត្វា ច ខោ មហេសិស្ស, សច្ចំ សម្បដិវិជ្ឈហំ;

តត្ថេវ វិរជំ ធម្មំ, ផុសយិំ អមតំ បទំ.

១៥០. ‘‘តតោ វិញ្ញាតសទ្ធម្មា, បព្ពជិំ អនគារិយំ;

តិស្សោ វិជ្ជា អនុប្បត្តា, អមោឃំ ពុទ្ធសាសន’’ន្តិ.

… សុជាតា ថេរី….

៥. អនោបមាថេរីគាថា

១៥១. ‘‘ឧច្ចេ កុលេ អហំ ជាតា, ពហុវិត្តេ មហទ្ធនេ;

វណ្ណរូបេន សម្បន្នា, ធីតា មជ្ឈស្ស [មេឃស្ស (សី.), មេឃិស្ស (ស្យា.)] អត្រជា.

១៥២. ‘‘បត្ថិតា រាជបុត្តេហិ, សេដ្ឋិបុត្តេហិ គិជ្ឈិតា [សេដ្ឋិបុត្តេហិ ភិជ្ឈិតា (សី.)];

បិតុ មេ បេសយី ទូតំ, ទេថ មយ្ហំ អនោបមំ.

១៥៣. ‘‘យត្តកំ តុលិតា ឯសា, តុយ្ហំ ធីតា អនោបមា;

តតោ អដ្ឋគុណំ ទស្សំ, ហិរញ្ញំ រតនានិ ច.

១៥៤. ‘‘សាហំ ទិស្វាន សម្ពុទ្ធំ, លោកជេដ្ឋំ អនុត្តរំ;

តស្ស បាទានិ វន្ទិត្វា, ឯកមន្តំ ឧបាវិសិំ.

១៥៥. ‘‘សោ មេ ធម្មមទេសេសិ, អនុកម្បាយ គោតមោ;

និសិន្នា អាសនេ តស្មិំ, ផុសយិំ តតិយំ ផលំ.

១៥៦. ‘‘តតោ កេសានិ ឆេត្វាន, បព្ពជិំ អនគារិយំ;

អជ្ជ មេ សត្តមី រត្តិ, យតោ តណ្ហា វិសោសិតា’’តិ.

… អនោបមា ថេរី….

៦. មហាបជាបតិគោតមីថេរីគាថា

១៥៧. ‘‘ពុទ្ធ វីរ នមោ ត្យត្ថុ, សព្ពសត្តានមុត្តម;

យោ មំ ទុក្ខា បមោចេសិ, អញ្ញញ្ច ពហុកំ ជនំ.

១៥៨. ‘‘សព្ពទុក្ខំ បរិញ្ញាតំ, ហេតុតណ្ហា វិសោសិតា;

ភាវិតោ អដ្ឋង្គិកោ [អរិយដ្ឋង្គិកោ (សី. ក.), ភាវិតដ្ឋង្គិកោ (ស្យា.)] មគ្គោ, និរោធោ ផុសិតោ មយា.

១៥៩. ‘‘មាតា បុត្តោ បិតា ភាតា, អយ្យកា ច បុរេ អហុំ;

យថាភុច្ចមជានន្តី, សំសរិំហំ អនិព្ពិសំ.

១៦០. ‘‘ទិដ្ឋោ ហិ មេ សោ ភគវា, អន្តិមោយំ សមុស្សយោ;

វិក្ខីណោ ជាតិសំសារោ, នត្ថិ ទានិ បុនព្ភវោ.

១៦១. ‘‘អារទ្ធវីរិយេ បហិតត្តេ, និច្ចំ ទឡ្ហបរក្កមេ;

សមគ្គេ សាវកេ បស្សេ, ឯសា ពុទ្ធាន វន្ទនា.

១៦២. ‘‘ពហូនំ [ពហុន្នំ (សី. ស្យា.)] វត អត្ថាយ, មាយា ជនយិ គោតមំ;

ព្យាធិមរណតុន្នានំ, ទុក្ខក្ខន្ធំ ព្យបានុទី’’តិ.

… មហាបជាបតិគោតមី ថេរី….

៧. គុត្តាថេរីគាថា

១៦៣. ‘‘គុត្តេ យទត្ថំ បព្ពជ្ជា, ហិត្វា បុត្តំ វសុំ បិយំ;

តមេវ អនុព្រូហេហិ, មា ចិត្តស្ស វសំ គមិ.

១៦៤. ‘‘ចិត្តេន វញ្ចិតា សត្តា, មារស្ស វិសយេ រតា;

អនេកជាតិសំសារំ, សន្ធាវន្តិ អវិទ្ទសូ.

១៦៥. ‘‘កាមច្ឆន្ទញ្ច ព្យាបាទំ, សក្កាយទិដ្ឋិមេវ ច;

សីលព្ពតបរាមាសំ, វិចិកិច្ឆញ្ច បញ្ចមំ.

១៦៦. ‘‘សំយោជនានិ ឯតានិ, បជហិត្វាន ភិក្ខុនី;

ឱរម្ភាគមនីយានិ, នយិទំ បុនរេហិសិ.

១៦៧. ‘‘រាគំ មានំ អវិជ្ជញ្ច, ឧទ្ធច្ចញ្ច វិវជ្ជិយ;

សំយោជនានិ ឆេត្វាន, ទុក្ខស្សន្តំ ករិស្សសិ.

១៦៨. ‘‘ខេបេត្វា ជាតិសំសារំ, បរិញ្ញាយ បុនព្ភវំ;

ទិដ្ឋេវ ធម្មេ និច្ឆាតា, ឧបសន្តា ចរិស្សតី’’តិ.

… គុត្តា ថេរី….

៨. វិជយាថេរីគាថា

១៦៩. ‘‘ចតុក្ខត្តុំ បញ្ចក្ខត្តុំ, វិហារា ឧបនិក្ខមិំ;

អលទ្ធា ចេតសោ សន្តិំ, ចិត្តេ អវសវត្តិនី.

១៧០. ‘‘ភិក្ខុនិំ ឧបសង្កម្ម, សក្កច្ចំ បរិបុច្ឆហំ;

សា មេ ធម្មមទេសេសិ, ធាតុអាយតនានិ ច.

១៧១. ‘‘ចត្តារិ អរិយសច្ចានិ, ឥន្ទ្រិយានិ ពលានិ ច;

ពោជ្ឈង្គដ្ឋង្គិកំ មគ្គំ, ឧត្តមត្ថស្ស បត្តិយា.

១៧២. ‘‘តស្សាហំ វចនំ សុត្វា, ករោន្តី អនុសាសនិំ;

រត្តិយា បុរិមេ យាមេ, បុព្ពជាតិមនុស្សរិំ.

១៧៣. ‘‘រត្តិយា មជ្ឈិមេ យាមេ, ទិព្ពចក្ខុំ វិសោធយិំ;

រត្តិយា បច្ឆិមេ យាមេ, តមោខន្ធំ បទាលយិំ.

១៧៤. ‘‘បីតិសុខេន ច កាយំ, ផរិត្វា វិហរិំ តទា;

សត្តមិយា បាទេ បសារេសិំ, តមោខន្ធំ បទាលិយា’’តិ.

… វិជយា ថេរី….

ឆក្កនិបាតោ និដ្ឋិតោ.