២. តេកិច្ឆការិត្ថេរគាថា

៣៨១. ‘‘អតិហិតា វីហិ, ខលគតា សាលី;

ន ច លភេ បិណ្ឌំ, កថមហំ កស្សំ.

៣៨២. ‘‘ពុទ្ធមប្បមេយ្យំ អនុស្សរ បសន្នោ;

បីតិយា ផុដសរីរោ ហោហិសិ សតតមុទគ្គោ.

៣៨៣. ‘‘ធម្មមប្បមេយ្យំ អនុស្សរ បសន្នោ;

បីតិយា ផុដសរីរោ ហោហិសិ សតតមុទគ្គោ.

៣៨៤. ‘‘សង្ឃមប្បមេយ្យំ អនុស្សរ បសន្នោ;

បីតិយា ផុដសរីរោ ហោហិសិ សតតមុទគ្គោ.

៣៨៥. ‘‘អព្ភោកាសេ វិហរសិ, សីតា ហេមន្តិកា ឥមា រត្យោ;

មា សីតេន បរេតោ វិហញ្ញិត្ថោ, បវិស ត្វំ វិហារំ ផុសិតគ្គឡំ.

៣៨៦. ‘‘ផុសិស្សំ ចតស្សោ អប្បមញ្ញាយោ, តាហិ ច សុខិតោ វិហរិស្សំ;

នាហំ សីតេន វិហញ្ញិស្សំ, អនិញ្ជិតោ វិហរន្តោ’’តិ.

… តេកិច្ឆការី [តេកិច្ឆកានិ (សី. ស្យា. បី.)] ថេរោ….