៣. មហានាគត្ថេរគាថា

៣៨៧. ‘‘យស្ស សព្រហ្មចារីសុ, គារវោ នូបលព្ភតិ;

បរិហាយតិ សទ្ធម្មា, មច្ឆោ អប្បោទកេ យថា.

៣៨៨. ‘‘យស្ស សព្រហ្មចារីសុ, គារវោ នូបលព្ភតិ;

ន វិរូហតិ សទ្ធម្មេ, ខេត្តេ ពីជំវ បូតិកំ.

៣៨៩. ‘‘យស្ស សព្រហ្មចារីសុ, គារវោ នូបលព្ភតិ;

អារកា ហោតិ និព្ពានា [និព្ពាណា (សី.)], ធម្មរាជស្ស សាសនេ.

៣៩០. ‘‘យស្ស សព្រហ្មចារីសុ, គារវោ ឧបលព្ភតិ;

ន វិហាយតិ សទ្ធម្មា, មច្ឆោ ពវ្ហោទកេ [ពហ្វោទកេ (សី.), ពហោទកេ (ស្យា.)] យថា.

៣៩១. ‘‘យស្ស សព្រហ្មចារីសុ, គារវោ ឧបលព្ភតិ;

សោ វិរូហតិ សទ្ធម្មេ, ខេត្តេ ពីជំវ ភទ្ទកំ.

៣៩២. ‘‘យស្ស សព្រហ្មចារីសុ, គារវោ ឧបលព្ភតិ;

សន្តិកេ ហោតិ និព្ពានំ [និព្ពាណំ (សី.)], ធម្មរាជស្ស សាសនេ’’តិ.

… មហានាគោ ថេរោ….