១៣. សិរិមណ្ឌត្ថេរគាថា

៤៤៧. [ឧទា. ៤៥; ចូឡវ. ៣៨៥; បរិ. ៣៣៩] ‘‘ឆន្នមតិវស្សតិ, វិវដំ នាតិវស្សតិ;

តស្មា ឆន្នំ វិវរេថ, ឯវំ តំ នាតិវស្សតិ.

៤៤៨. [សំ. និ. ១.៦៦; នេត្តិ. ១៨] ‘‘មច្ចុនាព្ភហតោ លោកោ, ជរាយ បរិវារិតោ;

តណ្ហាសល្លេន ឱតិណ្ណោ, ឥច្ឆាធូបាយិតោ សទា.

៤៤៩. ‘‘មច្ចុនាព្ភហតោ លោកោ, បរិក្ខិត្តោ ជរាយ ច;

ហញ្ញតិ និច្ចមត្តាណោ, បត្តទណ្ឌោវ តក្ករោ.

៤៥០. ‘‘អាគច្ឆន្តគ្គិខន្ធាវ, មច្ចុ ព្យាធិ ជរា តយោ;

បច្ចុគ្គន្តុំ ពលំ នត្ថិ, ជវោ នត្ថិ បលាយិតុំ.

៤៥១. ‘‘អមោឃំ ទិវសំ កយិរា, អប្បេន ពហុកេន វា;

យំ យំ វិជហតេ [វិរហតេ (សី. បី.), វិវហតេ (ស្យា.)] រត្តិំ, តទូនំ តស្ស ជីវិតំ.

៤៥២. ‘‘ចរតោ តិដ្ឋតោ វាបិ, អាសីនសយនស្ស វា;

ឧបេតិ ចរិមា រត្តិ, ន តេ កាលោ បមជ្ជិតុ’’ន្តិ.

… សិរិមណ្ឌោ [សិរិមន្ទោ (សី.)] ថេរោ….