១៤. សព្ពកាមិត្ថេរគាថា

៤៥៣. ‘‘ទ្វិបាទកោយំ អសុចិ, ទុគ្គន្ធោ បរិហីរតិ [បរិហរតិ (ក.)];

នានាកុណបបរិបូរោ, វិស្សវន្តោ តតោ តតោ.

៤៥៤. ‘‘មិគំ និលីនំ កូដេន, ពឡិសេនេវ អម្ពុជំ;

វានរំ វិយ លេបេន, ពាធយន្តិ បុថុជ្ជនំ.

៤៥៥. ‘‘រូបា សទ្ទា រសា គន្ធា, ផោដ្ឋព្ពា ច មនោរមា;

បញ្ច កាមគុណា ឯតេ, ឥត្ថិរូបស្មិ ទិស្សរេ.

៤៥៦. ‘‘យេ ឯតា ឧបសេវន្តិ, រត្តចិត្តា បុថុជ្ជនា;

វឌ្ឍេន្តិ កដសិំ ឃោរំ, អាចិនន្តិ បុនព្ភវំ.

៤៥៧. ‘‘យោ ចេតា បរិវជ្ជេតិ, សប្បស្សេវ បទា សិរោ;

សោមំ វិសត្តិកំ លោកេ, សតោ សមតិវត្តតិ.

៤៥៨. ‘‘កាមេស្វាទីនវំ ទិស្វា, នេក្ខម្មំ ទដ្ឋុ ខេមតោ;

និស្សដោ សព្ពកាមេហិ, បត្តោ មេ អាសវក្ខយោ’’តិ.

… សព្ពកាមិត្ថេរោ….

ឆក្កនិបាតោ និដ្ឋិតោ.