៥. បញ្ចមវគ្គោ

១. កុមារកស្សបត្ថេរគាថា

២០១. ‘‘អហោ ពុទ្ធា អហោ ធម្មា, អហោ នោ សត្ថុ សម្បទា;

យត្ថ ឯតាទិសំ ធម្មំ, សាវកោ សច្ឆិកាហិ’’តិ.

២០២. ‘‘អសង្ខេយ្យេសុ កប្បេសុ, សក្កាយាធិគតា អហូ;

តេសមយំ បច្ឆិមកោ, ចរិមោយំ សមុស្សយោ;

ជាតិមរណសំសារោ, នត្ថិ ទានិ បុនព្ភវោ’’តិ.

… កុមារកស្សបោ ថេរោ….

២. ធម្មបាលត្ថេរគាថា

២០៣. ‘‘យោ ហវេ ទហរោ ភិក្ខុ, យុញ្ជតិ ពុទ្ធសាសនេ;

ជាគរោ ស ហិ សុត្តេសុ [បតិសុត្តេសុ (សី. ក.)], អមោឃំ តស្ស ជីវិតំ.

២០៤. ‘‘តស្មា សទ្ធញ្ច សីលញ្ច, បសាទំ ធម្មទស្សនំ;

អនុយុញ្ជេថ មេធាវី, សរំ ពុទ្ធាន សាសន’’ន្តិ.

… ធម្មបាលោ ថេរោ….

៣. ព្រហ្មាលិត្ថេរគាថា

២០៥. ‘‘កស្សិន្ទ្រិយានិ សមថង្គតានិ, អស្សា យថា សារថិនា សុទន្តា;

បហីនមានស្ស អនាសវស្ស, ទេវាបិ កស្ស [តស្ស (ពហូសុ)] បិហយន្តិ តាទិនោ’’តិ.

២០៦. [ធ. ប. ៩៤ ធម្មបទេបិ] ‘‘មយ្ហិន្ទ្រិយានិ សមថង្គតានិ, អស្សា យថា សារថិនា សុទន្តា;

បហីនមានស្ស អនាសវស្ស, ទេវាបិ មយ្ហំ បិហយន្តិ តាទិនោ’’តិ.

… ព្រហ្មាលិ ថេរោ….

៤. មោឃរាជត្ថេរគាថា

២០៧. ‘‘ឆវិបាបក ចិត្តភទ្ទក, មោឃរាជ សតតំ សមាហិតោ;

ហេមន្តិកសីតកាលរត្តិយោ [ហេមន្តិកកាលរត្តិយោ (ក.)], ភិក្ខុ ត្វំសិ កថំ ករិស្សសិ’’.

២០៨. ‘‘សម្បន្នសស្សា មគធា, កេវលា ឥតិ មេ សុតំ;

បលាលច្ឆន្នកោ សេយ្យំ, យថញ្ញេ សុខជីវិនោ’’តិ.

… មោឃរាជា ថេរោ….

៥. វិសាខបញ្ចាលបុត្តត្ថេរគាថា

២០៩. ‘‘ន ឧក្ខិបេ នោ ច បរិក្ខិបេ បរេ, ឱក្ខិបេ បារគតំ ន ឯរយេ;

ន ចត្តវណ្ណំ បរិសាសុ ព្យាហរេ, អនុទ្ធតោ សម្មិតភាណិ សុព្ពតោ.

២១០. ‘‘សុសុខុមនិបុណត្ថទស្សិនា, មតិកុសលេន និវាតវុត្តិនា;

សំសេវិតវុទ្ធសីលិនា, និព្ពានំ ន ហិ តេន ទុល្លភ’’ន្តិ.

… វិសាខោ បញ្ចាលបុត្តោ ថេរោ ….

៦. ចូឡកត្ថេរគាថា

២១១. ‘‘នទន្តិ មោរា សុសិខា សុបេខុណា, សុនីលគីវា សុមុខា សុគជ្ជិនោ;

សុសទ្ទលា ចាបិ មហាមហី អយំ, សុព្យាបិតម្ពុ សុវលាហកំ នភំ.

២១២. ‘‘សុកល្លរូបោ សុមនស្ស ឈាយតំ [ឈាយិតំ (ស្យា. ក.)], សុនិក្កមោ សាធុ សុពុទ្ធសាសនេ;

សុសុក្កសុក្កំ និបុណំ សុទុទ្ទសំ, ផុសាហិ តំ ឧត្តមមច្ចុតំ បទ’’ន្តិ.

… ចូឡកោ [ចូលកោ (សី. អដ្ឋ.)] ថេរោ….

៧. អនូបមត្ថេរគាថា

២១៣. ‘‘នន្ទមានាគតំ ចិត្តំ, សូលមារោបមានកំ;

តេន តេនេវ វជសិ, យេន សូលំ កលិង្គរំ.

២១៤. ‘‘តាហំ ចិត្តកលិំ ព្រូមិ, តំ ព្រូមិ ចិត្តទុព្ភកំ;

សត្ថា តេ ទុល្លភោ លទ្ធោ, មានត្ថេ មំ និយោជយី’’តិ.

… អនូបមោ ថេរោ….

៨. វជ្ជិតត្ថេរគាថា

២១៥. ‘‘សំសរំ ទីឃមទ្ធានំ, គតីសុ បរិវត្តិសំ;

អបស្សំ អរិយសច្ចានិ, អន្ធភូតោ [អន្ធីភូតោ (ក.)] បុថុជ្ជនោ.

២១៦. ‘‘តស្ស មេ អប្បមត្តស្ស, សំសារា វិនឡីកតា;

សព្ពា គតី សមុច្ឆិន្នា, នត្ថិ ទានិ បុនព្ភវោ’’តិ.

… វជ្ជិតោ ថេរោ….

៩. សន្ធិតត្ថេរគាថា

២១៧. ‘‘អស្សត្ថេ ហរិតោភាសេ, សំវិរូឡ្ហម្ហិ បាទបេ;

ឯកំ ពុទ្ធគតំ សញ្ញំ, អលភិត្ថំ [អលភិំ ហំ (ក.)] បតិស្សតោ.

២១៨. ‘‘ឯកតិំសេ ឥតោ កប្បេ, យំ សញ្ញមលភិំ តទា;

តស្សា សញ្ញាយ វាហសា, បត្តោ មេ អាសវក្ខយោ’’តិ.

… សន្ធិតោ ថេរោ….

វគ្គោ បញ្ចមោ និដ្ឋិតោ.

តស្សុទ្ទានំ –

កុមារកស្សបោ ថេរោ, ធម្មបាលោ ច ព្រហ្មាលិ;

មោឃរាជា វិសាខោ ច, ចូឡកោ ច អនូបមោ;

វជ្ជិតោ សន្ធិតោ ថេរោ, កិលេសរជវាហនោតិ.

ទុកនិបាតោ និដ្ឋិតោ.