៤. ចតុត្ថវគ្គោ

១. មិគសិរត្ថេរគាថា

១៨១. ‘‘យតោ អហំ បព្ពជិតោ, សម្មាសម្ពុទ្ធសាសនេ;

វិមុច្ចមានោ ឧគ្គច្ឆិំ, កាមធាតុំ ឧបច្ចគំ.

១៨២. ‘‘ព្រហ្មុនោ បេក្ខមានស្ស, តតោ ចិត្តំ វិមុច្ចិ មេ;

អកុប្បា មេ វិមុត្តីតិ, សព្ពសំយោជនក្ខយា’’តិ.

… មិគសិរោ ថេរោ….

២. សិវកត្ថេរគាថា

១៨៣. ‘‘អនិច្ចានិ គហកានិ, តត្ថ តត្ថ បុនប្បុនំ;

គហការំ [គហការកំ (សី. បី.)] គវេសន្តោ, ទុក្ខា ជាតិ បុនប្បុនំ.

១៨៤. ‘‘គហការក ទិដ្ឋោសិ, បុន គេហំ ន កាហសិ;

សព្ពា តេ ផាសុកា ភគ្គា, ថូណិកា [ថូណិរា (បី. ក.), ធុណិរា (ស្យា.)] ច វិទាលិតា [បទាលិតា (សី. ស្យា.)];

វិមរិយាទិកតំ ចិត្តំ, ឥធេវ វិធមិស្សតី’’តិ.

… សិវកោ [សីវកោ (សី.)] ថេរោ….

៣. ឧបវាណត្ថេរគាថា

១៨៥. ‘‘អរហំ សុគតោ លោកេ, វាតេហាពាធិតោ [… ពាធិតោ (ក.)] មុនិ;

សចេ ឧណ្ហោទកំ អត្ថិ, មុនិនោ ទេហិ ព្រាហ្មណ.

១៨៦. ‘‘បូជិតោ បូជនេយ្យានំ [បូជនីយានំ (សី.)], សក្ករេយ្យាន សក្កតោ;

អបចិតោបចេយ្យានំ [អបចនីយានំ (សី.), អបចិនេយ្យានំ (ស្យា.)], តស្ស ឥច្ឆាមិ ហាតវេ’’តិ.

… ឧបវាណោ ថេរោ….

៤. ឥសិទិន្នត្ថេរគាថា

១៨៧. ‘‘ទិដ្ឋា មយា ធម្មធរា ឧបាសកា, កាមា អនិច្ចា ឥតិ ភាសមានា;

សារត្តរត្តា មណិកុណ្ឌលេសុ, បុត្តេសុ ទារេសុ ច តេ អបេក្ខា.

១៨៨. ‘‘អទ្ធា ន ជានន្តិ យតោធ ធម្មំ, កាមា អនិច្ចា ឥតិ ចាបិ អាហុ;

រាគញ្ច តេសំ ន ពលត្ថិ ឆេត្តុំ, តស្មា សិតា បុត្តទារំ ធនញ្ចា’’តិ.

… ឥសិទិន្នោ ថេរោ….

៥. សម្ពុលកច្ចានត្ថេរគាថា

១៨៩. ‘‘ទេវោ ច វស្សតិ ទេវោ ច គឡគឡាយតិ,

ឯកកោ ចាហំ ភេរវេ ពិលេ វិហរាមិ;

តស្ស មយ្ហំ ឯកកស្ស ភេរវេ ពិលេ វិហរតោ,

នត្ថិ ភយំ វា ឆម្ភិតត្តំ វា លោមហំសោ វា.

១៩០. ‘‘ធម្មតា មមសា យស្ស មេ, ឯកកស្ស ភេរវេ ពិលេ;

វិហរតោ នត្ថិ ភយំ វា, ឆម្ភិតត្តំ វា លោមហំសោ វា’’តិ.

… សម្ពុលកច្ចានោ [សម្ពហុលកច្ចានោ (ក.)] ថេរោ….

៦. និតកត្ថេរគាថា

១៩១. [ឧទា. ៣៤ ឧទានេបិ] ‘‘កស្ស សេលូបមំ ចិត្តំ, ឋិតំ នានុបកម្បតិ;

វិរត្តំ រជនីយេសុ, កុប្បនីយេ ន កុប្បតិ;

យស្សេវំ ភាវិតំ ចិត្តំ, កុតោ តំ ទុក្ខមេស្សតិ.

១៩២. ‘‘មម សេលូបមំ ចិត្តំ, ឋិតំ នានុបកម្បតិ;

វិរត្តំ រជនីយេសុ, កុប្បនីយេ ន កុប្បតិ;

មមេវំ ភាវិតំ ចិត្តំ, កុតោ មំ ទុក្ខមេស្សតី’’តិ.

… និតកោ [ខិតកោ (សី. ស្យា.)] ថេរោ….

៧. សោណបោដិរិយត្ថេរគាថា

១៩៣. ‘‘ន តាវ សុបិតុំ ហោតិ, រត្តិ នក្ខត្តមាលិនី;

បដិជគ្គិតុមេវេសា, រត្តិ ហោតិ វិជានតា.

១៩៤. ‘‘ហត្ថិក្ខន្ធាវបតិតំ, កុញ្ជរោ ចេ អនុក្កមេ;

សង្គាមេ មេ មតំ សេយ្យោ, យញ្ចេ ជីវេ បរាជិតោ’’តិ.

… សោណោ បោដិរិយោ [សេលិស្សរិយោ (សី.), បោដ្ដិរិយបុត្តោ (ស្យា.)] ថេរោ ….

៨. និសភត្ថេរគាថា

១៩៥. ‘‘បញ្ច កាមគុណេ ហិត្វា, បិយរូបេ មនោរមេ;

សទ្ធាយ ឃរា និក្ខម្ម, ទុក្ខស្សន្តករោ ភវេ.

១៩៦. ‘‘នាភិនន្ទាមិ មរណំ, នាភិនន្ទាមិ ជីវិតំ;

កាលញ្ច បដិកង្ខាមិ, សម្បជានោ បតិស្សតោ’’តិ.

… និសភោ ថេរោ….

៩. ឧសភត្ថេរគាថា

១៩៧. ‘‘អម្ពបល្លវសង្កាសំ, អំសេ កត្វាន ចីវរំ;

និសិន្នោ ហត្ថិគីវាយំ, គាមំ បិណ្ឌាយ បាវិសិំ.

១៩៨. ‘‘ហត្ថិក្ខន្ធតោ ឱរុយ្ហ, សំវេគំ អលភិំ តទា;

សោហំ ទិត្តោ តទា សន្តោ, បត្តោ មេ អាសវក្ខយោ’’តិ.

… ឧសភោ ថេរោ….

១០. កប្បដកុរត្ថេរគាថា

១៩៩. ‘‘អយមិតិ កប្បដោ កប្បដកុរោ, អច្ឆាយ អតិភរិតាយ [អតិភរិយាយ (សី. ក.), អច្ចំ ភរាយ (ស្យា.)];

អមតឃដិកាយំ ធម្មកដមត្តោ [ធម្មកដបត្តោ (ស្យា. ក. អដ្ឋ.), ធម្មកដមគ្គោ (សី. អដ្ឋ.)], កតបទំ ឈានានិ ឱចេតុំ.

២០០. ‘‘មា ខោ ត្វំ កប្បដ បចាលេសិ, មា ត្វំ ឧបកណ្ណម្ហិ តាឡេស្សំ;

ន ហិ [ន វា (ក.)] ត្វំ កប្បដ មត្តមញ្ញាសិ, សង្ឃមជ្ឈម្ហិ បចលាយមានោតិ.

… កប្បដកុរោ ថេរោ….

វគ្គោ ចតុត្ថោ និដ្ឋិតោ.

តស្សុទ្ទានំ –

មិគសិរោ សិវកោ ច, ឧបវានោ ច បណ្ឌិតោ;

ឥសិទិន្នោ ច កច្ចានោ, និតកោ ច មហាវសី;

បោដិរិយបុត្តោ និសភោ, ឧសភោ កប្បដកុរោតិ.