៣. តតិយវគ្គោ

១. ឧត្តរត្ថេរគាថា

១៦១. ‘‘ខន្ធា មយា បរិញ្ញាតា, តណ្ហា មេ សុសមូហតា;

ភាវិតា មម ពោជ្ឈង្គា, បត្តោ មេ អាសវក្ខយោ.

១៦២. ‘‘សោហំ ខន្ធេ បរិញ្ញាយ, អព្ពហិត្វាន [អព្ពុហិត្វាន (ក.)] ជាលិនិំ;

ភាវយិត្វាន ពោជ្ឈង្គេ, និព្ពាយិស្សំ អនាសវោ’’តិ.

… ឧត្តរោ ថេរោ….

២. ភទ្ទជិត្ថេរគាថា

១៦៣. ‘‘បនាទោ នាម សោ រាជា, យស្ស យូបោ សុវណ្ណយោ;

តិរិយំ សោឡសុព្ពេធោ [សោឡសបព្ពេធោ (សី. អដ្ឋ.), សោឡសព្ពាណោ (?)], ឧព្ភមាហុ [ឧទ្ធមាហុ (សី.), ឧច្ចមាហុ (ស្យា.)] សហស្សធា.

១៦៤. ‘‘សហស្សកណ្ឌោ សតគេណ្ឌុ, ធជាលុ ហរិតាមយោ;

អនច្ចុំ តត្ថ គន្ធព្ពា, ឆសហស្សានិ សត្តធា’’តិ.

… ភទ្ទជិត្ថេរោ….

៣. សោភិតត្ថេរគាថា

១៦៥. ‘‘សតិមា បញ្ញវា ភិក្ខុ, អារទ្ធពលវីរិយោ;

បញ្ច កប្បសតានាហំ, ឯករត្តិំ អនុស្សរិំ.

១៦៦. ‘‘ចត្តារោ សតិបដ្ឋានេ, សត្ត អដ្ឋ ច ភាវយំ;

បញ្ច កប្បសតានាហំ, ឯករត្តិំ អនុស្សរិ’’ន្តិ.

… សោភិតោ ថេរោ….

៤. វល្លិយត្ថេរគាថា

១៦៧. ‘‘យំ កិច្ចំ ទឡ្ហវីរិយេន, យំ កិច្ចំ ពោទ្ធុមិច្ឆតា;

ករិស្សំ នាវរជ្ឈិស្សំ [នាវរុជ្ឈិស្សំ (ក. សី. ក.)], បស្ស វីរិយំ បរក្កម.

១៦៨. ‘‘ត្វញ្ច មេ មគ្គមក្ខាហិ, អញ្ជសំ អមតោគធំ;

អហំ មោនេន មោនិស្សំ, គង្គាសោតោវ សាគរ’’ន្តិ.

… វល្លិយោ ថេរោ….

៥. វីតសោកត្ថេរគាថា

១៦៩. ‘‘កេសេ មេ ឱលិខិស្សន្តិ, កប្បកោ ឧបសង្កមិ;

តតោ អាទាសមាទាយ, សរីរំ បច្ចវេក្ខិសំ.

១៧០. ‘‘តុច្ឆោ កាយោ អទិស្សិត្ថ, អន្ធការោ តមោ ព្យគា;

សព្ពេ ចោឡា សមុច្ឆិន្នា, នត្ថិ ទានិ បុនព្ភវោ’’តិ.

… វីតសោកោ ថេរោ….

៦. បុណ្ណមាសត្ថេរគាថា

១៧១. ‘‘បញ្ច នីវរណេ ហិត្វា, យោគក្ខេមស្ស បត្តិយា;

ធម្មាទាសំ គហេត្វាន, ញាណទស្សនមត្តនោ.

១៧២. ‘‘បច្ចវេក្ខិំ ឥមំ កាយំ, សព្ពំ សន្តរពាហិរំ;

អជ្ឈត្តញ្ច ពហិទ្ធា ច, តុច្ឆោ កាយោ អទិស្សថា’’តិ.

… បុណ្ណមាសោ ថេរោ….

៧. នន្ទកត្ថេរគាថា

១៧៣. ‘‘យថាបិ ភទ្ទោ អាជញ្ញោ, ខលិត្វា បតិតិដ្ឋតិ;

ភិយ្យោ លទ្ទាន សំវេគំ, អទីនោ វហតេ ធុរំ.

១៧៤. ‘‘ឯវំ ទស្សនសម្បន្នំ, សម្មាសម្ពុទ្ធសាវកំ;

អាជានីយំ មំ ធារេថ, បុត្តំ ពុទ្ធស្ស ឱរស’’ន្តិ.

… នន្ទកោ ថេរោ….

៨. ភរតត្ថេរគាថា

១៧៥. ‘‘ឯហិ នន្ទក គច្ឆាម, ឧបជ្ឈាយស្ស សន្តិកំ;

សីហនាទំ នទិស្សាម, ពុទ្ធសេដ្ឋស្ស សម្មុខា.

១៧៦. ‘‘យាយ នោ អនុកម្បាយ, អម្ហេ បព្ពាជយី មុនិ;

សោ នោ អត្ថោ អនុប្បត្តោ, សព្ពសំយោជនក្ខយោ’’តិ.

… ភរតោ ថេរោ….

៩. ភារទ្វាជត្ថេរគាថា

១៧៧. ‘‘នទន្តិ ឯវំ សប្បញ្ញា, សីហាវ គិរិគព្ភរេ;

វីរា វិជិតសង្គាមា, ជេត្វា មារំ សវាហនិំ [សវាហនំ (ពហូសុ)].

១៧៨. ‘‘សត្ថា ច បរិចិណ្ណោ មេ, ធម្មោ សង្ឃោ ច បូជិតោ;

អហញ្ច វិត្តោ សុមនោ, បុត្តំ ទិស្វា អនាសវ’’ន្តិ.

… ភារទ្វាជោ ថេរោ….

១០. កណ្ហទិន្នត្ថេរគាថា

១៧៩. ‘‘ឧបាសិតា សប្បុរិសា, សុតា ធម្មា អភិណ្ហសោ;

សុត្វាន បដិបជ្ជិស្សំ, អញ្ជសំ អមតោគធំ.

១៨០. ‘‘ភវរាគហតស្ស មេ សតោ, ភវរាគោ បុន មេ ន វិជ្ជតិ;

ន ចាហុ ន ច មេ ភវិស្សតិ, ន ច មេ ឯតរហិ វិជ្ជតី’’តិ.

… កណ្ហទិន្នោ ថេរោ….

វគ្គោ តតិយោ និដ្ឋិតោ.

តស្សុទ្ទានំ –

ឧត្តរោ ភទ្ទជិត្ថេរោ, សោភិតោ វល្លិយោ ឥសិ;

វីតសោកោ ច យោ ថេរោ, បុណ្ណមាសោ ច នន្ទកោ;

ភរតោ ភារទ្វាជោ ច, កណ្ហទិន្នោ មហាមុនីតិ.