៣. អានន្ទត្ថេរគាថា

១០១៧. ‘‘បិសុណេន ច កោធនេន ច, មច្ឆរិនា ច វិភូតនន្ទិនា;

សខិតំ ន ករេយ្យ បណ្ឌិតោ, បាបោ កាបុរិសេន សង្គមោ.

១០១៨. ‘‘សទ្ធេន ច បេសលេន ច, បញ្ញវតា ពហុស្សុតេន ច;

សខិតំ ករេយ្យ បណ្ឌិតោ, ភទ្ទោ សប្បុរិសេន សង្គមោ.

១០១៩. ‘‘បស្ស ចិត្តកតំ ពិម្ពំ…បេ… យស្ស នត្ថិ ធុវំ ឋិតិ.

១០២០. ‘‘បស្ស ចិត្តកតំ ពិម្ពំ…បេ… វត្ថេហិ សោភតិ.

១០២១. ‘‘អលត្តកកតា …បេ… នោ ច បារគវេសិនោ.

១០២២. ‘‘អដ្ឋបទកតា…បេ… នោ ច បារគវេសិនោ.

១០២៣. ‘‘អញ្ជនីវ នវា…បេ… នោ ច បារគវេសិនោ.

១០២៤. ‘‘ពហុស្សុតោ ចិត្តកថី, ពុទ្ធស្ស បរិចារកោ;

បន្នភារោ វិសញ្ញុត្តោ, សេយ្យំ កប្បេតិ គោតមោ.

១០២៥. ‘‘ខីណាសវោ វិសញ្ញុត្តោ, សង្គាតីតោ សុនិព្ពុតោ;

ធារេតិ អន្តិមំ ទេហំ, ជាតិមរណបារគូ.

១០២៦. ‘‘យស្មិំ បតិដ្ឋិតា ធម្មា, ពុទ្ធស្សាទិច្ចពន្ធុនោ;

និព្ពានគមនេ មគ្គេ, សោយំ តិដ្ឋតិ គោតមោ.

១០២៧. ‘‘ទ្វាសីតិ ពុទ្ធតោ គណ្ហិំ, ទ្វេ សហស្សានិ ភិក្ខុតោ;

ចតុរាសីតិសហស្សានិ, យេ មេ ធម្មា បវត្តិនោ.

១០២៨. ‘‘អប្បស្សុតាយំ បុរិសោ, ពលិពទ្ទោវ ជីរតិ;

មំសានិ តស្ស វឌ្ឍន្តិ, បញ្ញា តស្ស ន វឌ្ឍតិ.

១០២៩. ‘‘ពហុស្សុតោ អប្បស្សុតំ, យោ សុតេនាតិមញ្ញតិ;

អន្ធោ បទីបធារោវ, តថេវ បដិភាតិ មំ.

១០៣០. ‘‘ពហុស្សុតំ ឧបាសេយ្យ, សុតញ្ច ន វិនាសយេ;

តំ មូលំ ព្រហ្មចរិយស្ស, តស្មា ធម្មធរោ សិយា.

១០៣១. ‘‘បុព្ពាបរញ្ញូ អត្ថញ្ញូ, និរុត្តិបទកោវិទោ;

សុគ្គហីតញ្ច គណ្ហាតិ, អត្ថញ្ចោបបរិក្ខតិ.

១០៣២. ‘‘ខន្ត្យា ឆន្ទិកតោ [ខន្តិយា ឆន្ទិតោ (?)] ហោតិ, ឧស្សហិត្វា តុលេតិ តំ;

សមយេ សោ បទហតិ, អជ្ឈត្តំ សុសមាហិតោ.

១០៣៣. ‘‘ពហុស្សុតំ ធម្មធរំ, សប្បញ្ញំ ពុទ្ធសាវកំ;

ធម្មវិញ្ញាណមាកង្ខំ, តំ ភជេថ តថាវិធំ.

១០៣៤. ‘‘ពហុស្សុតោ ធម្មធរោ, កោសារក្ខោ មហេសិនោ;

ចក្ខុ សព្ពស្ស លោកស្ស, បូជនីយោ ពហុស្សុតោ.

១០៣៥. ‘‘ធម្មារាមោ ធម្មរតោ, ធម្មំ អនុវិចិន្តយំ;

ធម្មំ អនុស្សរំ ភិក្ខុ, សទ្ធម្មា ន បរិហាយតិ.

១០៣៦. ‘‘កាយមច្ឆេរគរុនោ [គរុកោ (សី.)], ហិយ្យមានេ [ហិយ្យមានោ (សី.)] អនុដ្ឋហេ;

សរីរសុខគិទ្ធស្ស, កុតោ សមណផាសុតា.

១០៣៧. ‘‘ន បក្ខន្តិ ទិសា សព្ពា, ធម្មា ន បដិភន្តិ មំ;

គតេ កល្យាណមិត្តម្ហិ, អន្ធការំវ ខាយតិ.

១០៣៨. ‘‘អព្ភតីតសហាយស្ស, អតីតគតសត្ថុនោ;

នត្ថិ ឯតាទិសំ មិត្តំ, យថា កាយគតា សតិ.

១០៣៩. ‘‘យេ បុរាណា អតីតា តេ, នវេហិ ន សមេតិ មេ;

ស្វជ្ជ ឯកោវ ឈាយាមិ, វស្សុបេតោវ បក្ខិមា.

១០៤០. ‘‘ទស្សនាយ អភិក្កន្តេ, នានាវេរជ្ជកេ ពហូ;

មា វារយិត្ថ សោតារោ, បស្សន្តុ សមយោ មមំ.

១០៤១. ‘‘ទស្សនាយ អភិក្កន្តេ, នានាវេរជ្ជកេ បុថុ;

ករោតិ សត្ថា ឱកាសំ, ន និវារេតិ ចក្ខុមា.

១០៤២. ‘‘បណ្ណវីសតិវស្សានិ, សេខភូតស្ស មេ សតោ;

ន កាមសញ្ញា ឧប្បជ្ជិ, បស្ស ធម្មសុធម្មតំ.

១០៤៣. ‘‘បណ្ណវីសតិវស្សានិ, សេខភូតស្ស មេ សតោ;

ន ទោសសញ្ញា ឧប្បជ្ជិ, បស្ស ធម្មសុធម្មតំ.

១០៤៤. ‘‘បណ្ណវីសតិវស្សានិ, ភគវន្តំ ឧបដ្ឋហិំ;

មេត្តេន កាយកម្មេន, ឆាយាវ អនបាយិនី [អនុបាយិនី (ស្យា. ក.)].

១០៤៥. ‘‘បណ្ណវីសតិវស្សានិ, ភគវន្តំ ឧបដ្ឋហិំ;

មេត្តេន វចីកម្មេន, ឆាយាវ អនបាយិនី.

១០៤៦. ‘‘បណ្ណវីសតិវស្សានិ, ភគវន្តំ ឧបដ្ឋហិំ;

មេត្តេន មនោកម្មេន, ឆាយាវ អនបាយិនី.

១០៤៧. ‘‘ពុទ្ធស្ស ចង្កមន្តស្ស, បិដ្ឋិតោ អនុចង្កមិំ;

ធម្មេ ទេសិយមានម្ហិ, ញាណំ មេ ឧទបជ្ជថ.

១០៤៨. ‘‘អហំ សករណីយោម្ហិ, សេខោ អប្បត្តមានសោ;

សត្ថុ ច បរិនិព្ពានំ, យោ អម្ហំ អនុកម្បកោ.

១០៤៩. ‘‘តទាសិ យំ ភិំសនកំ, តទាសិ លោមហំសនំ;

សព្ពាការវរូបេតេ, សម្ពុទ្ធេ បរិនិព្ពុតេ.

១០៥០. ‘‘ពហុស្សុតោ ធម្មធរោ, កោសារក្ខោ មហេសិនោ;

ចក្ខុ សព្ពស្ស លោកស្ស, អានន្ទោ បរិនិព្ពុតោ.

១០៥១. ‘‘ពហុស្សុតោ ធម្មធរោ, កោសារក្ខោ មហេសិនោ;

ចក្ខុ សព្ពស្ស លោកស្ស, អន្ធការេ តមោនុទោ.

១០៥២. ‘‘គតិមន្តោ សតិមន្តោ, ធិតិមន្តោ ច យោ ឥសិ;

សទ្ធម្មធារកោ ថេរោ, អានន្ទោ រតនាករោ.

១០៥៣. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, នត្ថិ ទានិ បុនព្ភវោ’’តិ.

… អានន្ទោ ថេរោ….

តិំសនិបាតោ និដ្ឋិតោ.