១៨. ចត្តាលីសនិបាតោ

១. មហាកស្សបត្ថេរគាថា

១០៥៤. ‘‘ន គណេន បុរក្ខតោ ចរេ, វិមនោ ហោតិ សមាធិ ទុល្លភោ;

នានាជនសង្គហោ ទុខោ, ឥតិ ទិស្វាន គណំ ន រោចយេ.

១០៥៥. ‘‘ន កុលានិ ឧបព្ពជេ មុនិ, វិមនោ ហោតិ សមាធិ ទុល្លភោ;

សោ ឧស្សុក្កោ រសានុគិទ្ធោ, អត្ថំ រិញ្ចតិ យោ សុខាវហោ.

១០៥៦. ‘‘បង្កោតិ ហិ នំ អវេទយុំ, យាយំ វន្ទនបូជនា កុលេសុ;

សុខុមំ សល្ល ទុរុព្ពហំ, សក្ការោ កាបុរិសេន ទុជ្ជហោ.

១០៥៧. ‘‘សេនាសនម្ហា ឱរុយ្ហ, នគរំ បិណ្ឌាយ បាវិសិំ;

ភុញ្ជន្តំ បុរិសំ កុដ្ឋិំ, សក្កច្ចំ តំ ឧបដ្ឋហិំ.

១០៥៨. ‘‘សោ មេ [តំ (សី. ក.)] បក្កេន ហត្ថេន, អាលោបំ ឧបនាមយិ;

អាលោបំ បក្ខិបន្តស្ស, អង្គុលិ ចេត្ថ [បេត្ថ (សី. ក.)] ឆិជ្ជថ.

១០៥៩. ‘‘កុដ្ដមូលញ្ច [កុឌ្ឌមូលញ្ច (សី. ស្យា.)] និស្សាយ, អាលោបំ តំ អភុញ្ជិសំ;

ភុញ្ជមានេ វា ភុត្តេ វា, ជេគុច្ឆំ មេ ន វិជ្ជតិ.

១០៦០. ‘‘ឧត្តិដ្ឋបិណ្ឌោ អាហារោ, បូតិមុត្តញ្ច ឱសធំ;

សេនាសនំ រុក្ខមូលំ, បំសុកូលញ្ច ចីវរំ;

យស្សេតេ អភិសម្ភុត្វា [អភិភុញ្ជតិ (?)], ស វេ ចាតុទ្ទិសោ នរោ.

១០៦១. ‘‘យត្ថ ឯកេ វិហញ្ញន្តិ, អារុហន្តា សិលុច្ចយំ;

តស្ស ពុទ្ធស្ស ទាយាទោ, សម្បជានោ បតិស្សតោ;

ឥទ្ធិពលេនុបត្ថទ្ធោ, កស្សបោ អភិរូហតិ.

១០៦២. ‘‘បិណ្ឌបាតបដិក្កន្តោ, សេលមារុយ្ហ កស្សបោ;

ឈាយតិ អនុបាទានោ, បហីនភយភេរវោ.

១០៦៣. ‘‘បិណ្ឌបាតបដិក្កន្តោ, សេលមារុយ្ហ កស្សបោ;

ឈាយតិ អនុបាទានោ, ឌយ្ហមានេសុ និព្ពុតោ.

១០៦៤. ‘‘បិណ្ឌបាតបដិក្កន្តោ, សេលមារុយ្ហ កស្សបោ;

ឈាយតិ អនុបាទានោ, កតកិច្ចោ អនាសវោ.

១០៦៥. ‘‘ករេរិមាលាវិតតា, ភូមិភាគា មនោរមា;

កុញ្ជរាភិរុទា រម្មា, តេ សេលា រមយន្តិ មំ.

១០៦៦. ‘‘នីលព្ភវណ្ណា រុចិរា, វារិសីតា សុចិន្ធរា;

ឥន្ទគោបកសញ្ឆន្នា, តេ សេលា រមយន្តិ មំ.

១០៦៧. ‘‘នីលព្ភកូដសទិសា, កូដាគារវរូបមា;

វារណាភិរុទា រម្មា, តេ សេលា រមយន្តិ មំ.

១០៦៨. ‘‘អភិវុដ្ឋា រម្មតលា, នគា ឥសិភិ សេវិតា;

អព្ភុន្នទិតា សិខីហិ, តេ សេលា រមយន្តិ មំ.

១០៦៩. ‘‘អលំ ឈាយិតុកាមស្ស, បហិតត្តស្ស មេ សតោ;

អលំ មេ អត្ថកាមស្ស [អត្តកាមស្ស (?)], បហិតត្តស្ស ភិក្ខុនោ.

១០៧០. ‘‘អលំ មេ ផាសុកាមស្ស, បហិតត្តស្ស ភិក្ខុនោ;

អលំ មេ យោគកាមស្ស, បហិតត្តស្ស តាទិនោ.

១០៧១. ‘‘ឧមាបុប្ផេន សមានា, គគនាវព្ភឆាទិតា;

នានាទិជគណាកិណ្ណា, តេ សេលា រមយន្តិ មំ.

១០៧២. ‘‘អនាកិណ្ណា គហដ្ឋេហិ, មិគសង្ឃនិសេវិតា;

នានាទិជគណាកិណ្ណា, តេ សេលា រមយន្តិ មំ.

១០៧៣. ‘‘អច្ឆោទិកា បុថុសិលា, គោនង្គុលមិគាយុតា;

អម្ពុសេវាលសញ្ឆន្នា, តេ សេលា រមយន្តិ មំ.

១០៧៤. ‘‘ន បញ្ចង្គិកេន តុរិយេន, រតិ មេ ហោតិ តាទិសី;

យថា ឯកគ្គចិត្តស្ស, សម្មា ធម្មំ វិបស្សតោ.

១០៧៥. ‘‘កម្មំ ពហុកំ ន ការយេ, បរិវជ្ជេយ្យ ជនំ ន ឧយ្យមេ;

ឧស្សុក្កោ សោ រសានុគិទ្ធោ, អត្ថំ រិញ្ចតិ យោ សុខាវហោ.

១០៧៦. ‘‘កម្មំ ពហុកំ ន ការយេ, បរិវជ្ជេយ្យ អនត្តនេយ្យមេតំ;

កិច្ឆតិ កាយោ កិលមតិ, ទុក្ខិតោ សោ សមថំ ន វិន្ទតិ.

១០៧៧. ‘‘ឱដ្ឋប្បហតមត្តេន, អត្តានម្បិ ន បស្សតិ;

បត្ថទ្ធគីវោ ចរតិ, អហំ សេយ្យោតិ មញ្ញតិ.

១០៧៨. ‘‘អសេយ្យោ សេយ្យសមានំ, ពាលោ មញ្ញតិ អត្តានំ;

ន តំ វិញ្ញូ បសំសន្តិ, បត្ថទ្ធមានសំ នរំ.

១០៧៩. ‘‘យោ ច សេយ្យោហមស្មីតិ, នាហំ សេយ្យោតិ វា បន;

ហីនោ តំសទិសោ [តីនោហំ សទិសោ (ស្យា.)] វាតិ, វិធាសុ ន វិកម្បតិ.

១០៨០. ‘‘បញ្ញវន្តំ តថា តាទិំ, សីលេសុ សុសមាហិតំ;

ចេតោសមថមនុត្តំ, តញ្ចេ វិញ្ញូ បសំសរេ.

១០៨១. ‘‘យស្ស សព្រហ្មចារីសុ, គារវោ នូបលព្ភតិ;

អារកា ហោតិ សទ្ធម្មា, នភតោ បុថវី យថា.

១០៨២. ‘‘យេសញ្ច ហិរិ ឱត្តប្បំ, សទា សម្មា ឧបដ្ឋិតំ;

វិរូឡ្ហព្រហ្មចរិយា តេ, តេសំ ខីណា បុនព្ភវា.

១០៨៣. ‘‘ឧទ្ធតោ ចបលោ ភិក្ខុ, បំសុកូលេន បារុតោ;

កបីវ សីហចម្មេន, ន សោ តេនុបសោភតិ.

១០៨៤. ‘‘អនុទ្ធតោ អចបលោ, និបកោ សំវុតិន្ទ្រិយោ;

សោភតិ បំសុកូលេន, សីហោវ គិរិគព្ភរេ.

១០៨៥. ‘‘ឯតេ សម្ពហុលា ទេវា, ឥទ្ធិមន្តោ យសស្សិនោ;

ទសទេវសហស្សានិ, សព្ពេ តេ ព្រហ្មកាយិកា.

១០៨៦. ‘‘ធម្មសេនាបតិំ វីរំ, មហាឈាយិំ សមាហិតំ;

សារិបុត្តំ នមស្សន្តា, តិដ្ឋន្តិ បញ្ជលីកតា.

១០៨៧. ‘‘‘នមោ តេ បុរិសាជញ្ញ, នមោ តេ បុរិសុត្តម;

យស្ស តេ នាភិជានាម, យម្បិ និស្សាយ ឈាយតិ [ឈាយសិ (ក. អដ្ឋ.)].

១០៨៨. ‘‘‘អច្ឆេរំ វត ពុទ្ធានំ, គម្ភីរោ គោចរោ សកោ;

យេ មយំ នាភិជានាម, វាលវេធិសមាគតា’.

១០៨៩. ‘‘តំ តថា ទេវកាយេហិ, បូជិតំ បូជនារហំ;

សារិបុត្តំ តទា ទិស្វា, កប្បិនស្ស សិតំ អហុ.

១០៩០. ‘‘យាវតា ពុទ្ធខេត្តម្ហិ, ឋបយិត្វា មហាមុនិំ;

ធុតគុណេ វិសិដ្ឋោហំ, សទិសោ មេ ន វិជ្ជតិ.

១០៩១. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, នត្ថិ ទានិ បុនព្ភវោ.

១០៩២. ‘‘ន ចីវរេ ន សយនេ, ភោជនេ នុបលិម្បតិ;

គោតមោ អនប្បមេយ្យោ, មុឡាលបុប្ផំ វិមលំវ;

អម្ពុនា នេក្ខម្មនិន្នោ, តិភវាភិនិស្សដោ.

១០៩៣. ‘‘សតិបដ្ឋានគីវោ សោ, សទ្ធាហត្ថោ មហាមុនិ;

បញ្ញាសីសោ មហាញាណី, សទា ចរតិ និព្ពុតោ’’តិ.

… មហាកស្សបោ ថេរោ….

ចត្តាលីសនិបាតោ និដ្ឋិតោ.