១០. បារាបរិយត្ថេរគាថា

៩២០. សមណស្ស អហុ ចិន្តា, បុប្ផិតម្ហិ មហាវនេ;

ឯកគ្គស្ស និសិន្នស្ស, បវិវិត្តស្ស ឈាយិនោ.

៩២១. ‘‘អញ្ញថា លោកនាថម្ហិ, តិដ្ឋន្តេ បុរិសុត្តមេ;

ឥរិយំ អាសិ ភិក្ខូនំ, អញ្ញថា ទានិ ទិស្សតិ.

៩២២. ‘‘សីតវាតបរិត្តានំ, ហិរិកោបីនឆាទនំ;

មត្តដ្ឋិយំ អភុញ្ជិំសុ, សន្តុដ្ឋា ឥតរីតរេ.

៩២៣. ‘‘បណីតំ យទិ វា លូខំ, អប្បំ វា យទិ វា ពហុំ;

យាបនត្ថំ អភុញ្ជិំសុ, អគិទ្ធា នាធិមុច្ឆិតា.

៩២៤. ‘‘ជីវិតានំ បរិក្ខារេ, ភេសជ្ជេ អថ បច្ចយេ;

ន ពាឡ្ហំ ឧស្សុកា អាសុំ, យថា តេ អាសវក្ខយេ.

៩២៥. ‘‘អរញ្ញេ រុក្ខមូលេសុ, កន្ទរាសុ គុហាសុ ច;

វិវេកមនុព្រូហន្តា, វិហំសុ តប្បរាយនា.

៩២៦. ‘‘នីចា និវិដ្ឋា សុភរា, មុទូ អត្ថទ្ធមានសា;

អព្យាសេកា អមុខរា, អត្ថចិន្តា វសានុគា.

៩២៧. ‘‘តតោ បាសាទិកំ អាសិ, គតំ ភុត្តំ និសេវិតំ;

សិនិទ្ធា តេលធារាវ, អហោសិ ឥរិយាបថោ.

៩២៨. ‘‘សព្ពាសវបរិក្ខីណា, មហាឈាយី មហាហិតា;

និព្ពុតា ទានិ តេ ថេរា, បរិត្តា ទានិ តាទិសា.

៩២៩. ‘‘កុសលានញ្ច ធម្មានំ, បញ្ញាយ ច បរិក្ខយា;

សព្ពាការវរូបេតំ, លុជ្ជតេ ជិនសាសនំ.

៩៣០. ‘‘បាបកានញ្ច ធម្មានំ, កិលេសានញ្ច យោ ឧតុ;

ឧបដ្ឋិតា វិវេកាយ, យេ ច សទ្ធម្មសេសកា.

៩៣១. ‘‘តេ កិលេសា បវឌ្ឍន្តា, អាវិសន្តិ ពហុំ ជនំ;

កីឡន្តិ មញ្ញេ ពាលេហិ, ឧម្មត្តេហិវ រក្ខសា.

៩៣២. ‘‘កិលេសេហាភិភូតា តេ, តេន តេន វិធាវិតា;

នរា កិលេសវត្ថូសុ, សសង្គាមេវ ឃោសិតេ.

៩៣៣. ‘‘បរិច្ចជិត្វា សទ្ធម្មំ, អញ្ញមញ្ញេហិ ភណ្ឌរេ;

ទិដ្ឋិគតានិ អន្វេន្តា, ឥទំ សេយ្យោតិ មញ្ញរេ.

៩៣៤. ‘‘ធនញ្ច បុត្តំ ភរិយញ្ច, ឆឌ្ឌយិត្វាន និគ្គតា;

កដច្ឆុភិក្ខហេតូបិ, អកិច្ឆានិ និសេវរេ.

៩៣៥. ‘‘ឧទរាវទេហកំ ភុត្វា, សយន្តុត្តានសេយ្យកា;

កថំ វត្តេន្តិ [កថា វឌ្ឍេន្តិ (សី. ក.)] បដិពុទ្ធា, យា កថា សត្ថុគរហិតា.

៩៣៦. ‘‘សព្ពការុកសិប្បានិ, ចិត្តិំ កត្វាន [ចិត្តីកត្វាន (សី.), ចិត្តំ កត្វាន (ស្យា.)] សិក្ខរេ;

អវូបសន្តា អជ្ឈត្តំ, សាមញ្ញត្ថោតិ អច្ឆតិ [តិរិញ្ចតិ (?)].

៩៣៧. ‘‘មត្តិកំ តេលចុណ្ណញ្ច, ឧទកាសនភោជនំ;

គិហីនំ ឧបនាមេន្តិ, អាកង្ខន្តា ពហុត្តរំ.

៩៣៨. ‘‘ទន្តបោនំ កបិត្ថញ្ច, បុប្ផំ ខាទនិយានិ ច;

បិណ្ឌបាតេ ច សម្បន្នេ, អម្ពេ អាមលកានិ ច.

៩៣៩. ‘‘ភេសជ្ជេសុ យថា វេជ្ជា, កិច្ចាកិច្ចេ យថា គិហី;

គណិកាវ វិភូសាយំ, ឥស្សរេ ខត្តិយា យថា.

៩៤០. ‘‘នេកតិកា វញ្ចនិកា, កូដសក្ខី អបាដុកា;

ពហូហិ បរិកប្បេហិ, អាមិសំ បរិភុញ្ជរេ.

៩៤១. ‘‘លេសកប្បេ បរិយាយេ, បរិកប្បេនុធាវិតា;

ជីវិកត្ថា ឧបាយេន, សង្កឌ្ឍន្តិ ពហុំ ធនំ.

៩៤២. ‘‘ឧបដ្ឋាបេន្តិ បរិសំ, កម្មតោ នោ ច ធម្មតោ;

ធម្មំ បរេសំ ទេសេន្តិ, លាភតោ នោ ច អត្ថតោ.

៩៤៣. ‘‘សង្ឃលាភស្ស ភណ្ឌន្តិ, សង្ឃតោ បរិពាហិរា;

បរលាភោបជីវន្តា, អហិរីកា ន លជ្ជរេ.

៩៤៤. ‘‘នានុយុត្តា តថា ឯកេ, មុណ្ឌា សង្ឃាដិបារុតា;

សម្ភាវនំយេវិច្ឆន្តិ, លាភសក្ការមុច្ឆិតា.

៩៤៥. ‘‘ឯវំ នានប្បយាតម្ហិ, ន ទានិ សុករំ តថា;

អផុសិតំ វា ផុសិតុំ, ផុសិតំ វានុរក្ខិតុំ.

៩៤៦. ‘‘យថា កណ្ដកដ្ឋានម្ហិ, ចរេយ្យ អនុបាហនោ;

សតិំ ឧបដ្ឋបេត្វាន, ឯវំ គាមេ មុនី ចរេ.

៩៤៧. ‘‘សរិត្វា បុព្ពកេ យោគី, តេសំ វត្តមនុស្សរំ;

កិញ្ចាបិ បច្ឆិមោ កាលោ, ផុសេយ្យ អមតំ បទំ.

៩៤៨. ‘‘ឥទំ វត្វា សាលវនេ, សមណោ ភាវិតិន្ទ្រិយោ;

ព្រាហ្មណោ បរិនិព្ពាយី, ឥសិ ខីណបុនព្ភវោ’’តិ.

… បារាបរិយោ [បារាសរិយោ (ស្យា.)] ថេរោ….

វីសតិនិបាតោ និដ្ឋិតោ.