៧. នន្ទមាណវបុច្ឆា

១០៨៣. ‘‘សន្តិ លោកេ មុនយោ, (ឥច្ចាយស្មា នន្ទោ)

ជនា វទន្តិ តយិទំ កថំសុ;

ញាណូបបន្នំ នោ មុនិំ [មុនិ នោ (ស្យា. ក.)] វទន្តិ, ឧទាហុ វេ ជីវិតេនូបបន្នំ’’.

១០៨៤. ‘‘ន ទិដ្ឋិយា ន សុតិយា ន ញាណេន, (ន សីលព្ពតេន) [( ) នត្ថិ សី.-បី បោត្ថកេសុ]

មុនីធ នន្ទ កុសលា វទន្តិ;

វិសេនិកត្វា អនីឃា និរាសា, ចរន្តិ យេ តេ មុនយោតិ ព្រូមិ’’.

១០៨៥. ‘‘យេ កេចិមេ សមណព្រាហ្មណាសេ, (ឥច្ចាយស្មា នន្ទោ)

ទិដ្ឋស្សុតេនាបិ [ទិដ្ឋេន សុតេនាបិ (សី.), ទិដ្ឋេ សុតេនាបិ (ស្យា. បី. ក.)] វទន្តិ សុទ្ធិំ;

សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;

កច្ចិស្សុ តេ ភគវា តត្ថ យតា ចរន្តា, អតារុ ជាតិញ្ច ជរញ្ច មារិស;

បុច្ឆាមិ តំ ភគវា ព្រូហិ មេ តំ’’.

១០៨៦. ‘‘យេ កេចិមេ សមណព្រាហ្មណាសេ, (នន្ទាតិ ភគវា)

ទិដ្ឋស្សុតេនាបិ វទន្តិ សុទ្ធិំ;

សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;

កិញ្ចាបិ តេ តត្ថ យតា ចរន្តិ, នារិំសុ ជាតិជរន្តិ ព្រូមិ’’.

១០៨៧. ‘‘យេ កេចិមេ សមណព្រាហ្មណាសេ, (ឥច្ចាយស្មា នន្ទោ)

ទិដ្ឋស្សុតេនាបិ វទន្តិ សុទ្ធិំ;

សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;

តេ ចេ មុនិ [សចេ មុនិ (សី.)] ព្រូសិ អនោឃតិណ្ណេ, អថ កោ ចរហិ ទេវមនុស្សលោកេ;

អតារិ ជាតិញ្ច ជរញ្ច មារិស, បុច្ឆាមិ តំ ភគវា ព្រូហិ មេ តំ’’.

១០៨៨. ‘‘នាហំ សព្ពេ សមណព្រាហ្មណាសេ, (នន្ទាតិ ភគវា)

ជាតិជរាយ និវុតាតិ ព្រូមិ;

យេ សីធ ទិដ្ឋំវ សុតំ មុតំ វា, សីលព្ពតំ វាបិ បហាយ សព្ពំ;

អនេករូបម្បិ បហាយ សព្ពំ, តណ្ហំ បរិញ្ញាយ អនាសវាសេ;

តេ វេ នរា ឱឃតិណ្ណាតិ ព្រូមិ’’.

១០៨៩. ‘‘ឯតាភិនន្ទាមិ វចោ មហេសិនោ, សុកិត្តិតំ គោតមនូបធីកំ;

យេ សីធ ទិដ្ឋំ វ សុតំ មុតំ វា, សីលព្ពតំ វាបិ បហាយ សព្ពំ;

អនេករូបម្បិ បហាយ សព្ពំ, តណ្ហំ បរិញ្ញាយ អនាសវាសេ;

អហម្បិ តេ ឱឃតិណ្ណាតិ ព្រូមី’’តិ.

នន្ទមាណវបុច្ឆា សត្តមា និដ្ឋិតា.