នមោ តស្ស ភគវតោ អរហតោ សម្មាសម្ពុទ្ធស្ស

ខុទ្ទកនិកាយេ

សុត្តនិបាតបាឡិ

១. ឧរគវគ្គោ

១. ឧរគសុត្តំ

១. យោ [យោ វេ (ស្យា.)] ឧប្បតិតំ វិនេតិ កោធំ, វិសដំ សប្បវិសំវ ឱសធេហិ [ឱសធេភិ (ក.)];

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ [ជិណ្ណមិវ តចំ (សី. ស្យា. កំ. បី.), ជិណ្ណមិវា តចំ (?)] បុរាណំ.

២. យោ រាគមុទច្ឆិទា អសេសំ, ភិសបុប្ផំវ សរោរុហំ [សរេរុហំ (ក.)] វិគយ្ហ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ, បុរាណំ.

៣. យោ តណ្ហមុទច្ឆិទា អសេសំ, សរិតំ សីឃសរំ វិសោសយិត្វា;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៤. យោ មានមុទព្ពធី អសេសំ, នឡសេតុំវ សុទុព្ពលំ មហោឃោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៥. យោ នាជ្ឈគមា ភវេសុ សារំ, វិចិនំ បុប្ផមិវ [បុប្ផមិវ (ពហូសុ)] ឧទុម្ពរេសុ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៦. យស្សន្តរតោ ន សន្តិ កោបា, ឥតិភវាភវតញ្ច [ឥតិព្ភវាភវតញ្ច (ក.)] វីតិវត្តោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៧. យស្ស វិតក្កា វិធូបិតា, អជ្ឈត្តំ សុវិកប្បិតា អសេសា;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៨. យោ នាច្ចសារី ន បច្ចសារី, សព្ពំ អច្ចគមា ឥមំ បបញ្ចំ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

៩. យោ នាច្ចសារី ន បច្ចសារី, សព្ពំ វិតថមិទន្តិ ញត្វា [ឧត្វា (ស្យា. បី. ក.)] លោកេ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១០. យោ នាច្ចសារី ន បច្ចសារី, សព្ពំ វិតថមិទន្តិ វីតលោភោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១១. យោ នាច្ចសារី ន បច្ចសារី, សព្ពំ វិតថមិទន្តិ វីតរាគោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១២. យោ នាច្ចសារី ន បច្ចសារី, សព្ពំ វិតថមិទន្តិ វីតទោសោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១៣. យោ នាច្ចសារី ន បច្ចសារី, សព្ពំ វិតថមិទន្តិ វីតមោហោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១៤. យស្សានុសយា ន សន្តិ កេចិ, មូលា ច អកុសលា សមូហតាសេ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១៥. យស្ស ទរថជា ន សន្តិ កេចិ, ឱរំ អាគមនាយ បច្ចយាសេ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១៦. យស្ស វនថជា ន សន្តិ កេចិ, វិនិពន្ធាយ ភវាយ ហេតុកប្បា;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

១៧. យោ នីវរណេ បហាយ បញ្ច, អនិឃោ តិណ្ណកថំកថោ វិសល្លោ;

សោ ភិក្ខុ ជហាតិ ឱរបារំ, ឧរគោ ជិណ្ណមិវត្តចំ បុរាណំ.

ឧរគសុត្តំ បឋមំ និដ្ឋិតំ.

២. ធនិយសុត្តំ

១៨. ‘‘បក្កោទនោ ទុទ្ធខីរោហមស្មិ, (ឥតិ ធនិយោ គោបោ)

អនុតីរេ មហិយា សមានវាសោ;

ឆន្នា កុដិ អាហិតោ គិនិ, អថ ចេ បត្ថយសី បវស្ស ទេវ’’.

១៩. ‘‘អក្កោធនោ វិគតខិលោហមស្មិ [វិគតខីលោហមស្មិ (សី. បី.)], (ឥតិ ភគវា)

អនុតីរេ មហិយេករត្តិវាសោ;

វិវដា កុដិ និព្ពុតោ គិនិ, អថ ចេ បត្ថយសី បវស្ស ទេវ’’.

២០. ‘‘អន្ធកមកសា ន វិជ្ជរេ, (ឥតិ ធនិយោ គោបោ)

កច្ឆេ រូឡ្ហតិណេ ចរន្តិ គាវោ;

វុដ្ឋិម្បិ សហេយ្យុមាគតំ, អថ ចេ បត្ថយសី បវស្ស ទេវ’’.

២១. ‘‘ពទ្ធាសិ ភិសី សុសង្ខតា, (ឥតិ ភគវា)

តិណ្ណោ បារគតោ វិនេយ្យ ឱឃំ;

អត្ថោ ភិសិយា ន វិជ្ជតិ, អថ ចេ បត្ថយសី បវស្ស ទេវ’’.

២២. ‘‘គោបី មម អស្សវា អលោលា, (ឥតិ ធនិយោ គោបោ)

ទីឃរត្តំ [ទីឃរត្ត (ក.)] សំវាសិយា មនាបា;

តស្សា ន សុណាមិ កិញ្ចិ បាបំ, អថ ចេ បត្ថយសី បវស្ស ទេវ’’.

២៣. ‘‘ចិត្តំ មម អស្សវំ វិមុត្តំ, (ឥតិ ភគវា)

ទីឃរត្តំ បរិភាវិតំ សុទន្តំ;

បាបំ បន មេ ន វិជ្ជតិ, អថ ចេ បត្ថយសី បវស្ស ទេវ’’.

២៤. ‘‘អត្តវេតនភតោហមស្មិ, (ឥតិ ធនិយោ គោបោ)

បុត្តា ច មេ សមានិយា អរោគា;

តេសំ ន សុណាមិ កិញ្ចិ បាបំ, អថ ចេ បត្ថយសី បវស្ស ទេវ’’.

២៥. ‘‘នាហំ ភតកោស្មិ កស្សចិ, (ឥតិ ភគវា)

និព្ពិដ្ឋេន ចរាមិ សព្ពលោកេ;

អត្ថោ ភតិយា ន វិជ្ជតិ, អថ ចេ បត្ថយសី បវស្ស ទេវ’’.

២៦. ‘‘អត្ថិ វសា អត្ថិ ធេនុបា, (ឥតិ ធនិយោ គោបោ)

គោធរណិយោ បវេណិយោបិ អត្ថិ;

ឧសភោបិ គវម្បតីធ អត្ថិ, អថ ចេ បត្ថយសី បវស្ស ទេវ’’.

២៧. ‘‘នត្ថិ វសា នត្ថិ ធេនុបា, (ឥតិ ភគវា)

គោធរណិយោ បវេណិយោបិ នត្ថិ;

ឧសភោបិ គវម្បតីធ នត្ថិ, អថ ចេ បត្ថយសី បវស្ស ទេវ’’.

២៨. ‘‘ខិលា និខាតា អសម្បវេធី, (ឥតិ ធនិយោ គោបោ)

ទាមា មុញ្ជមយា នវា សុសណ្ឋានា;

ន ហិ សក្ខិន្តិ ធេនុបាបិ ឆេត្តុំ [ឆេតុំ (ក.)], អថ ចេ បត្ថយសី បវស្ស ទេវ’’.

២៩. ‘‘ឧសភោរិវ ឆេត្វ [ឆេត្វា (ស្យា. ក.)] ពន្ធនានិ, (ឥតិ ភគវា)

នាគោ បូតិលតំវ ទាលយិត្វា [បូតិលតំ បទាលយិត្វា (ស្យា. ក.)];

នាហំ បុនុបេស្សំ [បុន ឧបេស្សំ (សី. ស្យា. កំ. បី.), បុនុបេយ្យ (ក.)] គព្ភសេយ្យំ, អថ ចេ បត្ថយសី បវស្ស ទេវ’’.

៣០. ‘‘និន្នញ្ច ថលញ្ច បូរយន្តោ, មហាមេឃោ បវស្សិ តាវទេវ;

សុត្វា ទេវស្ស វស្សតោ, ឥមមត្ថំ ធនិយោ អភាសថ.

៣១. ‘‘លាភា វត នោ អនប្បកា, យេ មយំ ភគវន្តំ អទ្ទសាម;

សរណំ តំ ឧបេម ចក្ខុម, សត្ថា នោ ហោហិ តុវំ មហាមុនិ.

៣២. ‘‘គោបី ច អហញ្ច អស្សវា, ព្រហ្មចរិយំ [ព្រហ្មចរិយ (ក.)] សុគតេ ចរាមសេ;

ជាតិមរណស្ស បារគូ [បារគា (សី. ស្យា. កំ. បី.)], ទុក្ខស្សន្តករា ភវាមសេ’’.

៣៣. ‘‘នន្ទតិ បុត្តេហិ បុត្តិមា, (ឥតិ មារោ បាបិមា)

គោមា [គោមិកោ (សី. បី.), គោបិកោ (ស្យា. កំ.), គោបិយោ (ក.)] គោហិ តថេវ នន្ទតិ;

ឧបធី ហិ នរស្ស នន្ទនា, ន ហិ សោ នន្ទតិ យោ និរូបធិ’’.

៣៤. ‘‘សោចតិ បុត្តេហិ បុត្តិមា, (ឥតិ ភគវា)

គោបិយោ គោហិ តថេវ សោចតិ;

ឧបធី ហិ នរស្ស សោចនា, ន ហិ សោ សោចតិ យោ និរូបធី’’តិ.

ធនិយសុត្តំ ទុតិយំ និដ្ឋិតំ.

៣. ខគ្គវិសាណសុត្តំ

៣៥. សព្ពេសុ ភូតេសុ និធាយ ទណ្ឌំ, អវិហេឋយំ អញ្ញតរម្បិ តេសំ;

ន បុត្តមិច្ឆេយ្យ កុតោ សហាយំ, ឯកោ ចរេ ខគ្គវិសាណកប្បោ.

៣៦. សំសគ្គជាតស្ស ភវន្តិ ស្នេហា, ស្នេហន្វយំ ទុក្ខមិទំ បហោតិ;

អាទីនវំ ស្នេហជំ បេក្ខមានោ, ឯកោ ចរេ ខគ្គវិសាណកប្បោ.

៣៧. មិត្តេ សុហជ្ជេ អនុកម្បមានោ, ហាបេតិ អត្ថំ បដិពទ្ធចិត្តោ;

ឯតំ ភយំ សន្ថវេ [សន្ធវេ (ក.)] បេក្ខមានោ, ឯកោ ចរេ ខគ្គវិសាណកប្បោ.

៣៨. វំសោ វិសាលោវ យថា វិសត្តោ, បុត្តេសុ ទារេសុ ច យា អបេក្ខា;

វំសក្កឡីរោវ [វំសកឡីរោវ (សី.), វំសាកឡីរោវ (ស្យា. កំ. បី.), វំសេកឡីរោវ (និទ្ទេស)] អសជ្ជមានោ, ឯកោ ចរេ ខគ្គវិសាណកប្បោ.

៣៩. មិគោ អរញ្ញម្ហិ យថា អពទ្ធោ [អពន្ធោ (ស្យា. កំ.)], យេនិច្ឆកំ គច្ឆតិ គោចរាយ;

វិញ្ញូ នរោ សេរិតំ បេក្ខមានោ, ឯកោ ចរេ ខគ្គវិសាណកប្បោ.

៤០. អាមន្តនា ហោតិ សហាយមជ្ឈេ, វាសេ ឋានេ គមនេ ចារិកាយ;

អនភិជ្ឈិតំ សេរិតំ បេក្ខមានោ, ឯកោ ចរេ ខគ្គវិសាណកប្បោ.

៤១. ខិឌ្ឌា រតី ហោតិ សហាយមជ្ឈេ, បុត្តេសុ ច វិបុលំ ហោតិ បេមំ;

បិយវិប្បយោគំ វិជិគុច្ឆមានោ, ឯកោ ចរេ ខគ្គវិសាណកប្បោ.

៤២. ចាតុទ្ទិសោ អប្បដិឃោ ច ហោតិ, សន្តុស្សមានោ ឥតរីតរេន;

បរិស្សយានំ សហិតា អឆម្ភី, ឯកោ ចរេ ខគ្គវិសាណកប្បោ.

៤៣. ទុស្សង្គហា បព្ពជិតាបិ ឯកេ, អថោ គហដ្ឋា ឃរមាវសន្តា;

អប្បោស្សុក្កោ បរបុត្តេសុ ហុត្វា, ឯកោ ចរេ ខគ្គវិសាណកប្បោ.

៤៤. ឱរោបយិត្វា គិហិព្យញ្ជនានិ [គិហិវ្យញ្ជនានិ (ស្យា. កំ. បី.)], សញ្ឆិន្នបត្តោ [សំសីនបត្តោ (សី.)] យថា កោវិឡារោ;

ឆេត្វាន វីរោ គិហិពន្ធនានិ, ឯកោ ចរេ ខគ្គវិសាណកប្បោ.

៤៥. សចេ លភេថ និបកំ សហាយំ, សទ្ធិំ ចរំ សាធុវិហារិធីរំ;

អភិភុយ្យ សព្ពានិ បរិស្សយានិ, ចរេយ្យ តេនត្តមនោ សតីមា.

៤៦. នោ ចេ លភេថ និបកំ សហាយំ, សទ្ធិំ ចរំ សាធុវិហារិធីរំ;

រាជាវ រដ្ឋំ វិជិតំ បហាយ, ឯកោ ចរេ មាតង្គរញ្ញេវ នាគោ.

៤៧. អទ្ធា បសំសាម សហាយសម្បទំ, សេដ្ឋា សមា សេវិតព្ពា សហាយា;

ឯតេ អលទ្ធា អនវជ្ជភោជី, ឯកោ ចរេ ខគ្គវិសាណកប្បោ.

៤៨. ទិស្វា សុវណ្ណស្ស បភស្សរានិ, កម្មារបុត្តេន សុនិដ្ឋិតានិ;

សង្ឃដ្ដមានានិ ទុវេ ភុជស្មិំ, ឯកោ ចរេ ខគ្គវិសាណកប្បោ.

៤៩. ឯវំ ទុតិយេន [ទុតិយេន (សព្ពត្ថ)] សហា មមស្ស, វាចាភិលាបោ អភិសជ្ជនា វា;

ឯតំ ភយំ អាយតិំ បេក្ខមានោ, ឯកោ ចរេ ខគ្គវិសាណកប្បោ.

៥០. កាមា ហិ ចិត្រា មធុរា មនោរមា, វិរូបរូបេន មថេន្តិ ចិត្តំ;

អាទីនវំ កាមគុណេសុ ទិស្វា, ឯកោ ចរេ ខគ្គវិសាណកប្បោ.

៥១. ឦតី ច គណ្ឌោ ច ឧបទ្ទវោ ច, រោគោ ច សល្លញ្ច ភយញ្ច មេតំ;

ឯតំ ភយំ កាមគុណេសុ ទិស្វា, ឯកោ ចរេ ខគ្គវិសាណកប្បោ.

៥២. សីតញ្ច ឧណ្ហញ្ច ខុទំ បិបាសំ, វាតាតបេ ឌំសសរីសបេ [ឌំសសិរិំសបេ (សី. ស្យា. កំ. បី.)] ច;

សព្ពានិបេតានិ អភិសម្ភវិត្វា, ឯកោ ចរេ ខគ្គវិសាណកប្បោ.

៥៣. នាគោវ យូថានិ វិវជ្ជយិត្វា, សញ្ជាតខន្ធោ បទុមី ឧឡារោ;

យថាភិរន្តំ វិហរំ [វិហរេ (សី. បី. និទ្ទេស)] អរញ្ញេ, ឯកោ ចរេ ខគ្គវិសាណកប្បោ.

៥៤. អដ្ឋានតំ សង្គណិការតស្ស, យំ ផស្សយេ [ផុស្សយេ (ស្យា.)] សាមយិកំ វិមុត្តិំ;

អាទិច្ចពន្ធុស្ស វចោ និសម្ម, ឯកោ ចរេ ខគ្គវិសាណកប្បោ.

៥៥. ទិដ្ឋីវិសូកានិ ឧបាតិវត្តោ, បត្តោ និយាមំ បដិលទ្ធមគ្គោ;

ឧប្បន្នញាណោម្ហិ អនញ្ញនេយ្យោ, ឯកោ ចរេ ខគ្គវិសាណកប្បោ.

៥៦. និល្លោលុបោ និក្កុហោ និប្បិបាសោ, និម្មក្ខោ និទ្ធន្តកសាវមោហោ;

និរាសយោ [និរាសាសោ (ក.)] សព្ពលោកេ ភវិត្វា, ឯកោ ចរេ ខគ្គវិសាណកប្បោ.

៥៧. បាបំ សហាយំ បរិវជ្ជយេថ, អនត្ថទស្សិំ វិសមេ និវិដ្ឋំ;

សយំ ន សេវេ បសុតំ បមត្តំ, ឯកោ ចរេ ខគ្គវិសាណកប្បោ.

៥៨. ពហុស្សុតំ ធម្មធរំ ភជេថ, មិត្តំ ឧឡារំ បដិភានវន្តំ;

អញ្ញាយ អត្ថានិ វិនេយ្យ កង្ខំ, ឯកោ ចរេ ខគ្គវិសាណកប្បោ.

៥៩. ខិឌ្ឌំ រតិំ កាមសុខញ្ច លោកេ, អនលង្ករិត្វា អនបេក្ខមានោ;

វិភូសនដ្ឋានា វិរតោ សច្ចវាទី, ឯកោ ចរេ ខគ្គវិសាណកប្បោ.

៦០. បុត្តញ្ច ទារំ បិតរញ្ច មាតរំ, ធនានិ ធញ្ញានិ ច ពន្ធវានិ [ពន្ធវានិ ច (បី.)];

ហិត្វាន កាមានិ យថោធិកានិ, ឯកោ ចរេ ខគ្គវិសាណកប្បោ.

៦១. សង្គោ ឯសោ បរិត្តមេត្ថ សោខ្យំ, អប្បស្សាទោ ទុក្ខមេត្ថ ភិយ្យោ;

គឡោ ឯសោ ឥតិ ញត្វា មុតីមា [មតីមា (ស្យា. ក.)], ឯកោ ចរេ ខគ្គវិសាណកប្បោ.

៦២. សន្ទាលយិត្វាន [បទាលយិត្វាន (ក.)] សំយោជនានិ, ជាលំវ ភេត្វា សលិលម្ពុចារី;

អគ្គីវ ទឌ្ឍំ អនិវត្តមានោ, ឯកោ ចរេ ខគ្គវិសាណកប្បោ.

៦៣. ឱក្ខិត្តចក្ខូ ន ច បាទលោលោ, គុត្តិន្ទ្រិយោ រក្ខិតមានសានោ;

អនវស្សុតោ អបរិឌយ្ហមានោ, ឯកោ ចរេ ខគ្គវិសាណកប្បោ.

៦៤. ឱហារយិត្វា គិហិព្យញ្ជនានិ, សញ្ឆន្នបត្តោ [សញ្ឆិន្នបត្តោ (ស្យា. បី.), បច្ឆិន្នបត្តោ (ក.)] យថា បារិឆត្តោ;