៨. ហេមកមាណវបុច្ឆា

១០៩០. ‘‘យេ មេ បុព្ពេ វិយាកំសុ, (ឥច្ចាយស្មា ហេមកោ)

ហុរំ គោតមសាសនា;

ឥច្ចាសិ ឥតិ ភវិស្សតិ, សព្ពំ តំ ឥតិហីតិហំ;

សព្ពំ តំ តក្កវឌ្ឍនំ, នាហំ តត្ថ អភិរមិំ.

១០៩១. ‘‘ត្វញ្ច មេ ធម្មមក្ខាហិ, តណ្ហានិគ្ឃាតនំ មុនិ;

យំ វិទិត្វា សតោ ចរំ, តរេ លោកេ វិសត្តិកំ’’.

១០៩២. ‘‘ឥធ ទិដ្ឋសុតមុតវិញ្ញាតេសុ, បិយរូបេសុ ហេមក;

ឆន្ទរាគវិនោទនំ, និព្ពានបទមច្ចុតំ.

១០៩៣. ‘‘ឯតទញ្ញាយ យេ សតា, ទិដ្ឋធម្មាភិនិព្ពុតា;

ឧបសន្តា ច តេ សទា, តិណ្ណា លោកេ វិសត្តិក’’ន្តិ.

ហេមកមាណវបុច្ឆា អដ្ឋមា និដ្ឋិតា.