១៥. មោឃរាជមាណវបុច្ឆា

១១២២. ‘‘ទ្វាហំ សក្កំ អបុច្ឆិស្សំ, (ឥច្ចាយស្មា មោឃរាជា)

ន មេ ព្យាកាសិ ចក្ខុមា;

យាវតតិយញ្ច ទេវីសិ, ព្យាករោតីតិ មេ សុតំ.

១១២៣. ‘‘អយំ លោកោ បរោ លោកោ, ព្រហ្មលោកោ សទេវកោ;

ទិដ្ឋិំ តេ នាភិជានាតិ, គោតមស្ស យសស្សិនោ.

១១២៤. ‘‘ឯវំ អភិក្កន្តទស្សាវិំ, អត្ថិ បញ្ហេន អាគមំ;

កថំ លោកំ អវេក្ខន្តំ, មច្ចុរាជា ន បស្សតិ’’.

១១២៥. ‘‘សុញ្ញតោ លោកំ អវេក្ខស្សុ, មោឃរាជ សទា សតោ;

អត្តានុទិដ្ឋិំ ឩហច្ច, ឯវំ មច្ចុតរោ សិយា;

ឯវំ លោកំ អវេក្ខន្តំ, មច្ចុរាជា ន បស្សតី’’តិ.

មោឃរាជមាណវបុច្ឆា បន្នរសមា និដ្ឋិតា.