៦. ជរាសុត្តំ

៨១០. អប្បំ វត ជីវិតំ ឥទំ, ឱរំ វស្សសតាបិ មិយ្យតិ [មីយតិ (សី. អដ្ឋ.)];

យោ ចេបិ អតិច្ច ជីវតិ, អថ ខោ សោ ជរសាបិ មិយ្យតិ.

៨១១. សោចន្តិ ជនា មមាយិតេ, ន ហិ សន្តិ [ន ហិ សន្តា (សី.), ន ហី សន្តិ (កត្ថចិ)] និច្ចា បរិគ្គហា;

វិនាភាវសន្តមេវិទំ, ឥតិ ទិស្វា នាគារមាវសេ.

៨១២. មរណេនបិ តំ បហីយតិ [បហិយ្យតិ (សី. ស្យា. ក.)], យំ បុរិសោ មមិទន្តិ [មមយិទន្តិ (សី. ស្យា. ក.), មមាយន្តិ (ក.)] មញ្ញតិ;

ឯតម្បិ វិទិត្វា [ឯតំ ទិស្វាន (និទ្ទេសេ), ឯតម្បិ វិទិត្វ (?)] បណ្ឌិតោ, ន មមត្តាយ នមេថ មាមកោ.

៨១៣. សុបិនេន យថាបិ សង្គតំ, បដិពុទ្ធោ បុរិសោ ន បស្សតិ;

ឯវម្បិ បិយាយិតំ ជនំ, បេតំ កាលកតំ ន បស្សតិ.

៨១៤. ទិដ្ឋាបិ សុតាបិ តេ ជនា, យេសំ នាមមិទំ បវុច្ចតិ [នាមមេវា វសិស្សតិ (សី. ស្យា. បី.)];

នាមំយេវាវសិស្សតិ, អក្ខេយ្យំ បេតស្ស ជន្តុនោ.

៨១៥. សោកប្បរិទេវមច្ឆរំ [សោកបរិទេវមច្ឆរំ (សី. ស្យា. បី.), សោកំ បរិទេវមច្ឆរំ (?)], ន ជហន្តិ គិទ្ធា មមាយិតេ;

តស្មា មុនយោ បរិគ្គហំ, ហិត្វា អចរិំសុ ខេមទស្សិនោ.

៨១៦. បតិលីនចរស្ស ភិក្ខុនោ, ភជមានស្ស វិវិត្តមាសនំ;

សាមគ្គិយមាហុ តស្ស តំ, យោ អត្តានំ ភវនេ ន ទស្សយេ.

៨១៧. សព្ពត្ថ មុនី អនិស្សិតោ, ន បិយំ កុព្ពតិ នោបិ អប្បិយំ;

តស្មិំ បរិទេវមច្ឆរំ, បណ្ណេ វារិ យថា ន លិម្បតិ [លិប្បតិ (សី. បី.)].

៨១៨. ឧទពិន្ទុ យថាបិ បោក្ខរេ, បទុមេ វារិ យថា ន លិម្បតិ;

ឯវំ មុនិ នោបលិម្បតិ, យទិទំ ទិដ្ឋសុតំ មុតេសុ វា.

៨១៩. ធោនោ ន ហិ តេន មញ្ញតិ, យទិទំ ទិដ្ឋសុតំ មុតេសុ វា;

នាញ្ញេន វិសុទ្ធិមិច្ឆតិ, ន ហិ សោ រជ្ជតិ នោ វិរជ្ជតីតិ.

ជរាសុត្តំ ឆដ្ឋំ និដ្ឋិតំ.