៧. តិស្សមេត្តេយ្យសុត្តំ

៨២០. ‘‘មេថុនមនុយុត្តស្ស, (ឥច្ចាយស្មា តិស្សោ មេត្តេយ្យោ) វិឃាតំ ព្រូហិ មារិស;

សុត្វាន តវ សាសនំ, វិវេកេ សិក្ខិស្សាមសេ.

៨២១. ‘‘មេថុនមនុយុត្តស្ស, (មេត្តេយ្យាតិ ភគវា) មុស្សតេ វាបិ សាសនំ;

មិច្ឆា ច បដិបជ្ជតិ, ឯតំ តស្មិំ អនារិយំ.

៨២២. ‘‘ឯកោ បុព្ពេ ចរិត្វាន, មេថុនំ យោ និសេវតិ;

យានំ ភន្តំ វ តំ លោកេ, ហីនមាហុ បុថុជ្ជនំ.

៨២៣. ‘‘យសោ កិត្តិ ច យា បុព្ពេ, ហាយតេ វាបិ តស្ស សា;

ឯតម្បិ ទិស្វា សិក្ខេថ, មេថុនំ វិប្បហាតវេ.

៨២៤. ‘‘សង្កប្បេហិ បរេតោ សោ, កបណោ វិយ ឈាយតិ;

សុត្វា បរេសំ និគ្ឃោសំ, មង្កុ ហោតិ តថាវិធោ.

៨២៥. ‘‘អថ សត្ថានិ កុរុតេ, បរវាទេហិ ចោទិតោ;

ឯស ខ្វស្ស មហាគេធោ, មោសវជ្ជំ បគាហតិ.

៨២៦. ‘‘បណ្ឌិតោតិ សមញ្ញាតោ, ឯកចរិយំ អធិដ្ឋិតោ;

អថាបិ [ស ចាបិ (និទ្ទេសេ)] មេថុនេ យុត្តោ, មន្ទោវ បរិកិស្សតិ [បរិកិលិស្សតិ (សី.)].

៨២៧. ‘‘ឯតមាទីនវំ ញត្វា, មុនិ បុព្ពាបរេ ឥធ;

ឯកចរិយំ ទឡ្ហំ កយិរា, ន និសេវេថ មេថុនំ.

៨២៨. ‘‘វិវេកញ្ញេវ សិក្ខេថ, ឯតទរិយានមុត្តមំ;

ន តេន សេដ្ឋោ មញ្ញេថ, ស វេ និព្ពានសន្តិកេ.

៨២៩. ‘‘រិត្តស្ស មុនិនោ ចរតោ, កាមេសុ អនបេក្ខិនោ;

ឱឃតិណ្ណស្ស បិហយន្តិ, កាមេសុ គធិតា [គថិតា (សី.)] បជា’’តិ.

តិស្សមេត្តេយ្យសុត្តំ សត្តមំ និដ្ឋិតំ.