៣. ទុដ្ឋដ្ឋកសុត្តំ

៧៨៦. វទន្តិ វេ ទុដ្ឋមនាបិ ឯកេ, អថោបិ វេ សច្ចមនា វទន្តិ;

វាទញ្ច ជាតំ មុនិ នោ ឧបេតិ, តស្មា មុនី នត្ថិ ខិលោ កុហិញ្ចិ.

៧៨៧. សកញ្ហិ ទិដ្ឋិំ កថមច្ចយេយ្យ, ឆន្ទានុនីតោ រុចិយា និវិដ្ឋោ;

សយំ សមត្តានិ បកុព្ពមានោ, យថា ហិ ជានេយ្យ តថា វទេយ្យ.

៧៨៨. យោ អត្តនោ សីលវតានិ ជន្តុ, អនានុបុដ្ឋោវ បរេស [បរស្ស (ក.)] បាវ [បាវា (សី. ស្យា. បី.)];

អនរិយធម្មំ កុសលា តមាហុ, យោ អាតុមានំ សយមេវ បាវ.

៧៨៩. សន្តោ ច ភិក្ខុ អភិនិព្ពុតត្តោ, ឥតិហន្តិ សីលេសុ អកត្ថមានោ;

តមរិយធម្មំ កុសលា វទន្តិ, យស្សុស្សទា នត្ថិ កុហិញ្ចិ លោកេ.

៧៩០. បកប្បិតា សង្ខតា យស្ស ធម្មា, បុរក្ខតា [បុរេក្ខតា (សី.)] សន្តិ អវីវទាតា;

យទត្តនិ បស្សតិ អានិសំសំ, តំ និស្សិតោ កុប្បបដិច្ច សន្តិំ.

៧៩១. ទិដ្ឋីនិវេសា ន ហិ ស្វាតិវត្តា, ធម្មេសុ និច្ឆេយ្យ សមុគ្គហីតំ;

តស្មា នរោ តេសុ និវេសនេសុ, និរស្សតី អាទិយតី ច ធម្មំ.

៧៩២. ធោនស្ស ហិ នត្ថិ កុហិញ្ចិ លោកេ, បកប្បិតា ទិដ្ឋិ ភវាភវេសុ;

មាយញ្ច មានញ្ច បហាយ ធោនោ, ស កេន គច្ឆេយ្យ អនូបយោ សោ.

៧៩៣. ឧបយោ ហិ ធម្មេសុ ឧបេតិ វាទំ, អនូបយំ កេន កថំ វទេយ្យ;

អត្តា និរត្តា [អត្តំ និរត្តំ (ពហូសុ)] ន ហិ តស្ស អត្ថិ, អធោសិ សោ ទិដ្ឋិមិធេវ សព្ពន្តិ.

ទុដ្ឋដ្ឋកសុត្តំ តតិយំ និដ្ឋិតំ.