៤. សុទ្ធដ្ឋកសុត្តំ

៧៩៤. បស្សាមិ សុទ្ធំ បរមំ អរោគំ, ទិដ្ឋេន សំសុទ្ធិ នរស្ស ហោតិ;

ឯវាភិជានំ [ឯតាភិជានំ (សី. បី.)] បរមន្តិ ញត្វា, សុទ្ធានុបស្សីតិ បច្ចេតិ ញាណំ.

៧៩៥. ទិដ្ឋេន ចេ សុទ្ធិ នរស្ស ហោតិ, ញាណេន វា សោ បជហាតិ ទុក្ខំ;

អញ្ញេន សោ សុជ្ឈតិ សោបធីកោ, ទិដ្ឋី ហិ នំ បាវ តថា វទានំ.

៧៩៦. ន ព្រាហ្មណោ អញ្ញតោ សុទ្ធិមាហ, ទិដ្ឋេ សុតេ សីលវតេ មុតេ វា;

បុញ្ញេ ច បាបេ ច អនូបលិត្តោ, អត្តញ្ជហោ នយិធ បកុព្ពមានោ.

៧៩៧. បុរិមំ បហាយ អបរំ សិតាសេ, ឯជានុគា តេ ន តរន្តិ សង្គំ;

តេ ឧគ្គហាយន្តិ និរស្សជន្តិ, កបីវ សាខំ បមុញ្ចំ គហាយំ [បមុខំ គហាយ (ស្យា.), បមុញ្ច គហាយ (ក.)].

៧៩៨. សយំ សមាទាយ វតានិ ជន្តុ, ឧច្ចាវចំ គច្ឆតិ សញ្ញសត្តោ;

វិទ្វា ច វេទេហិ សមេច្ច ធម្មំ, ន ឧច្ចាវចំ គច្ឆតិ ភូរិបញ្ញោ.

៧៩៩. ស សព្ពធម្មេសុ វិសេនិភូតោ, យំ កិញ្ចិ ទិដ្ឋំ វ សុតំ មុតំ វា;

តមេវ ទស្សិំ វិវដំ ចរន្តំ, កេនីធ លោកស្មិ វិកប្បយេយ្យ.

៨០០. ន កប្បយន្តិ ន បុរេក្ខរោន្តិ, អច្ចន្តសុទ្ធីតិ ន តេ វទន្តិ;

អាទានគន្ថំ គថិតំ វិសជ្ជ, អាសំ ន កុព្ពន្តិ កុហិញ្ចិ លោកេ.

៨០១. សីមាតិគោ ព្រាហ្មណោ តស្ស នត្ថិ, ញត្វា វ ទិស្វា វ [ញត្វា ច ទិស្វា ច (ក. សី. ក.)] សមុគ្គហីតំ;

ន រាគរាគី ន វិរាគរត្តោ, តស្សីធ នត្ថី បរមុគ្គហីតន្តិ.

សុទ្ធដ្ឋកសុត្តំ ចតុត្ថំ និដ្ឋិតំ.