១៥. អត្តទណ្ឌសុត្តំ

៩៤១. ‘‘អត្តទណ្ឌា ភយំ ជាតំ, ជនំ បស្សថ មេធគំ;

សំវេគំ កិត្តយិស្សាមិ, យថា សំវិជិតំ មយា.

៩៤២. ‘‘ផន្ទមានំ បជំ ទិស្វា, មច្ឆេ អប្បោទកេ យថា;

អញ្ញមញ្ញេហិ ព្យារុទ្ធេ, ទិស្វា មំ ភយមាវិសិ.

៩៤៣. ‘‘សមន្តមសារោ លោកោ, ទិសា សព្ពា សមេរិតា;

ឥច្ឆំ ភវនមត្តនោ, នាទ្ទសាសិំ អនោសិតំ.

៩៤៤. ‘‘ឱសានេត្វេវ ព្យារុទ្ធេ, ទិស្វា មេ អរតី អហុ;

អថេត្ថ សល្លមទ្ទក្ខិំ, ទុទ្ទសំ ហទយនិស្សិតំ.

៩៤៥. ‘‘យេន សល្លេន ឱតិណ្ណោ, ទិសា សព្ពា វិធាវតិ;

តមេវ សល្លមព្ពុយ្ហ, ន ធាវតិ ន សីទតិ.

៩៤៦. ‘‘តត្ថ សិក្ខានុគីយន្តិ [សិក្ខានុកិរិយន្តិ (ក.)], យានិ លោកេ គធិតានិ;

ន តេសុ បសុតោ សិយា, និព្ពិជ្ឈ សព្ពសោ កាមេ;

សិក្ខេ និព្ពានមត្តនោ.

៩៤៧. ‘‘សច្ចោ សិយា អប្បគព្ភោ, អមាយោ រិត្តបេសុណោ;

អក្កោធនោ លោភបាបំ, វេវិច្ឆំ វិតរេ មុនិ.

៩៤៨. ‘‘និទ្ទំ តន្ទិំ សហេ ថីនំ, បមាទេន ន សំវសេ;

អតិមានេ ន តិដ្ឋេយ្យ, និព្ពានមនសោ នរោ.

៩៤៩. ‘‘មោសវជ្ជេ ន នីយេថ, រូបេ ស្នេហំ ន កុព្ពយេ;

មានញ្ច បរិជានេយ្យ, សាហសា វិរតោ ចរេ.

៩៥០. ‘‘បុរាណំ នាភិនន្ទេយ្យ, នវេ ខន្តិំ ន កុព្ពយេ;

ហិយ្យមានេ ន សោចេយ្យ, អាកាសំ ន សិតោ សិយា.

៩៥១. ‘‘គេធំ ព្រូមិ មហោឃោតិ, អាជវំ ព្រូមិ ជប្បនំ;

អារម្មណំ បកប្បនំ, កាមបង្កោ ទុរច្ចយោ.

៩៥២. ‘‘សច្ចា អវោក្កម្ម [អវោក្កមំ (និទ្ទេស)] មុនិ, ថលេ តិដ្ឋតិ ព្រាហ្មណោ;

សព្ពំ សោ [សព្ពសោ (ស្យា. ក.)] បដិនិស្សជ្ជ, ស វេ សន្តោតិ វុច្ចតិ.

៩៥៣. ‘‘ស វេ វិទ្វា ស វេទគូ, ញត្វា ធម្មំ អនិស្សិតោ;

សម្មា សោ លោកេ ឥរិយានោ, ន បិហេតីធ កស្សចិ.

៩៥៤. ‘‘យោធ កាមេ អច្ចតរិ, សង្គំ លោកេ ទុរច្ចយំ;

ន សោ សោចតិ នាជ្ឈេតិ, ឆិន្នសោតោ អពន្ធនោ.

៩៥៥. ‘‘យំ បុព្ពេ តំ វិសោសេហិ, បច្ឆា តេ មាហុ កិញ្ចនំ;

មជ្ឈេ ចេ នោ គហេស្សសិ, ឧបសន្តោ ចរិស្សសិ.

៩៥៦. ‘‘សព្ពសោ នាមរូបស្មិំ, យស្ស នត្ថិ មមាយិតំ;

អសតា ច ន សោចតិ, ស វេ លោកេ ន ជីយតិ.

៩៥៧. ‘‘យស្ស នត្ថិ ឥទំ មេតិ, បរេសំ វាបិ កិញ្ចនំ;

មមត្តំ សោ អសំវិន្ទំ, នត្ថិ មេតិ ន សោចតិ.

៩៥៨. ‘‘អនិដ្ឋុរី អននុគិទ្ធោ, អនេជោ សព្ពធី សមោ;

តមានិសំសំ បព្រូមិ, បុច្ឆិតោ អវិកម្បិនំ.

៩៥៩. ‘‘អនេជស្ស វិជានតោ, នត្ថិ កាចិ និសង្ខតិ [និសង្ខិតិ (សី. បី.)].

វិរតោ សោ វិយារព្ភា, ខេមំ បស្សតិ សព្ពធិ.

៩៦០. ‘‘ន សមេសុ ន ឱមេសុ, ន ឧស្សេសុ វទតេ មុនិ;

សន្តោ សោ វីតមច្ឆរោ, នាទេតិ ន និរស្សតី’’តិ.

អត្តទណ្ឌសុត្តំ បន្នរសមំ និដ្ឋិតំ.