១៤. តុវដកសុត្តំ

៩២១. ‘‘បុច្ឆាមិ តំ អាទិច្ចពន្ធុ [អាទិច្ចពន្ធុំ (សី. ស្យា.)], វិវេកំ សន្តិបទញ្ច មហេសិ;

កថំ ទិស្វា និព្ពាតិ ភិក្ខុ, អនុបាទិយានោ លោកស្មិំ កិញ្ចិ’’.

៩២២. ‘‘មូលំ បបញ្ចសង្ខាយ, (ឥតិ ភគវា)

មន្តា អស្មីតិ សព្ពមុបរុន្ធេ [សព្ពមុបរុទ្ធេ (ស្យា. បី. ក.)];

យា កាចិ តណ្ហា អជ្ឈត្តំ,

តាសំ វិនយា [វិនយាយ (?)] សទា សតោ សិក្ខេ.

៩២៣. ‘‘យំ កិញ្ចិ ធម្មមភិជញ្ញា, អជ្ឈត្តំ អថវាបិ ពហិទ្ធា;

ន តេន ថាមំ [មានំ (សី. ក.)] កុព្ពេថ, ន ហិ សា និព្ពុតិ សតំ វុត្តា.

៩២៤. ‘‘សេយ្យោ ន តេន មញ្ញេយ្យ, នីចេយ្យោ អថវាបិ សរិក្ខោ;

ផុដ្ឋោ [បុដ្ឋោ (សី. ស្យា. ក.)] អនេករូបេហិ, នាតុមានំ វិកប្បយំ តិដ្ឋេ.

៩២៥. ‘‘អជ្ឈត្តមេវុបសមេ, ន អញ្ញតោ ភិក្ខុ សន្តិមេសេយ្យ;

អជ្ឈត្តំ ឧបសន្តស្ស, នត្ថិ អត្តា កុតោ និរត្តា វា.

៩២៦. ‘‘មជ្ឈេ យថា សមុទ្ទស្ស, ឩមិ នោ ជាយតី ឋិតោ ហោតិ;

ឯវំ ឋិតោ អនេជស្ស, ឧស្សទំ ភិក្ខុ ន ករេយ្យ កុហិញ្ចិ’’.

៩២៧. ‘‘អកិត្តយី វិវដចក្ខុ, សក្ខិធម្មំ បរិស្សយវិនយំ;

បដិបទំ វទេហិ ភទ្ទន្តេ, បាតិមោក្ខំ អថវាបិ សមាធិំ’’.

៩២៨. ‘‘ចក្ខូហិ នេវ លោលស្ស, គាមកថាយ អាវរយេ សោតំ;

រសេ ច នានុគិជ្ឈេយ្យ, ន ច មមាយេថ កិញ្ចិ លោកស្មិំ.

៩២៩. ‘‘ផស្សេន យទា ផុដ្ឋស្ស, បរិទេវំ ភិក្ខុ ន ករេយ្យ កុហិញ្ចិ;

ភវញ្ច នាភិជប្បេយ្យ, ភេរវេសុ ច ន សម្បវេធេយ្យ.

៩៣០. ‘‘អន្នានមថោ បានានំ, ខាទនីយានំ អថោបិ វត្ថានំ;

លទ្ធា ន សន្និធិំ កយិរា, ន ច បរិត្តសេ តានិ អលភមានោ.

៩៣១. ‘‘ឈាយី ន បាទលោលស្ស, វិរមេ កុក្កុច្ចា នប្បមជ្ជេយ្យ;

អថាសនេសុ សយនេសុ, អប្បសទ្ទេសុ ភិក្ខុ វិហរេយ្យ.

៩៣២. ‘‘និទ្ទំ ន ពហុលីករេយ្យ, ជាគរិយំ ភជេយ្យ អាតាបី;

តន្ទិំ មាយំ ហស្សំ ខិឌ្ឌំ, មេថុនំ វិប្បជហេ សវិភូសំ.

៩៣៣. ‘‘អាថព្ពណំ សុបិនំ លក្ខណំ, នោ វិទហេ អថោបិ នក្ខត្តំ;

វិរុតញ្ច គព្ភករណំ, តិកិច្ឆំ មាមកោ ន សេវេយ្យ.

៩៣៤. ‘‘និន្ទាយ នប្បវេធេយ្យ, ន ឧណ្ណមេយ្យ បសំសិតោ ភិក្ខុ;

លោភំ សហ មច្ឆរិយេន, កោធំ បេសុណិយញ្ច បនុទេយ្យ.

៩៣៥. ‘‘កយវិក្កយេ ន តិដ្ឋេយ្យ, ឧបវាទំ ភិក្ខុ ន ករេយ្យ កុហិញ្ចិ;

គាមេ ច នាភិសជ្ជេយ្យ, លាភកម្យា ជនំ ន លបយេយ្យ.

៩៣៦. ‘‘ន ច កត្ថិតា សិយា ភិក្ខុ, ន ច វាចំ បយុត្តំ ភាសេយ្យ;

បាគព្ភិយំ ន សិក្ខេយ្យ, កថំ វិគ្គាហិកំ ន កថយេយ្យ.

៩៣៧. ‘‘មោសវជ្ជេ ន នីយេថ, សម្បជានោ សឋានិ ន កយិរា;

អថ ជីវិតេន បញ្ញាយ, សីលព្ពតេន នាញ្ញមតិមញ្ញេ.

៩៣៨. ‘‘សុត្វា រុសិតោ ពហុំ វាចំ, សមណានំ វា បុថុជនានំ [បុថុវចនានំ (សី. ស្យា. បី.)];

ផរុសេន នេ ន បដិវជ្ជា, ន ហិ សន្តោ បដិសេនិករោន្តិ.

៩៣៩. ‘‘ឯតញ្ច ធម្មមញ្ញាយ, វិចិនំ ភិក្ខុ សទា សតោ សិក្ខេ;

សន្តីតិ និព្ពុតិំ ញត្វា, សាសនេ គោតមស្ស ន បមជ្ជេយ្យ.

៩៤០. ‘‘អភិភូ ហិ សោ អនភិភូតោ, សក្ខិធម្មមនីតិហមទស្សី;

តស្មា ហិ តស្ស ភគវតោ សាសនេ, អប្បមត្តោ សទា នមស្សមនុសិក្ខេ’’តិ.

តុវដកសុត្តំ ចុទ្ទសមំ និដ្ឋិតំ.