១៣. មហាព្យូហសុត្តំ

៩០១. យេ កេចិមេ ទិដ្ឋិបរិព្ពសានា, ឥទមេវ សច្ចន្តិ វិវាទយន្តិ [វិវាទិយន្តិ (សី. បី.)];

សព្ពេវ តេ និន្ទមន្វានយន្តិ, អថោ បសំសម្បិ លភន្តិ តត្ថ.

៩០២. អប្បញ្ហិ ឯតំ ន អលំ សមាយ, ទុវេ វិវាទស្ស ផលានិ ព្រូមិ;

ឯតម្បិ ទិស្វា ន វិវាទយេថ, ខេមាភិបស្សំ អវិវាទភូមិំ.

៩០៣. យា កាចិមា សម្មុតិយោ បុថុជ្ជា, សព្ពាវ ឯតា ន ឧបេតិ វិទ្វា;

អនូបយោ សោ ឧបយំ កិមេយ្យ, ទិដ្ឋេ សុតេ ខន្តិមកុព្ពមានោ.

៩០៤. សីលុត្តមា សញ្ញមេនាហុ សុទ្ធិំ, វតំ សមាទាយ ឧបដ្ឋិតាសេ;

ឥធេវ សិក្ខេម អថស្ស សុទ្ធិំ, ភវូបនីតា កុសលា វទានា.

៩០៥. សចេ ចុតោ សីលវតតោ ហោតិ, បវេធតី [ស វេធតិ (សី. បី.)] កម្ម វិរាធយិត្វា;

បជប្បតី បត្ថយតី ច សុទ្ធិំ, សត្ថាវ ហីនោ បវសំ ឃរម្ហា.

៩០៦. សីលព្ពតំ វាបិ បហាយ សព្ពំ, កម្មញ្ច សាវជ្ជនវជ្ជមេតំ;

សុទ្ធិំ អសុទ្ធិន្តិ អបត្ថយានោ, វិរតោ ចរេ សន្តិមនុគ្គហាយ.

៩០៧. តមូបនិស្សាយ ជិគុច្ឆិតំ វា, អថវាបិ ទិដ្ឋំ វ សុតំ មុតំ វា;

ឧទ្ធំសរា សុទ្ធិមនុត្ថុនន្តិ, អវីតតណ្ហាសេ ភវាភវេសុ.

៩០៨. បត្ថយមានស្ស ហិ ជប្បិតានិ, បវេធិតំ វាបិ បកប្បិតេសុ;

ចុតូបបាតោ ឥធ យស្ស នត្ថិ, ស កេន វេធេយ្យ កុហិំវ ជប្បេ [កុហិញ្ចិ ជប្បេ (សី. ស្យា. ក.), កុហិំ បជប្បេ (បី.) និទ្ទេសោ បស្សិតព្ពោ].

៩០៩. យមាហុ ធម្មំ បរមន្តិ ឯកេ, តមេវ ហីនន្តិ បនាហុ អញ្ញេ;

សច្ចោ នុ វាទោ កតមោ ឥមេសំ, សព្ពេវ ហីមេ កុសលា វទានា.

៩១០. សកញ្ហិ ធម្មំ បរិបុណ្ណមាហុ, អញ្ញស្ស ធម្មំ បន ហីនមាហុ;

ឯវម្បិ វិគ្គយ្ហ វិវាទយន្តិ, សកំ សកំ សម្មុតិមាហុ សច្ចំ.

៩១១. បរស្ស ចេ វម្ភយិតេន ហីនោ, ន កោចិ ធម្មេសុ វិសេសិ អស្ស;

បុថូ ហិ អញ្ញស្ស វទន្តិ ធម្មំ, និហីនតោ សម្ហិ ទឡ្ហំ វទានា.

៩១២. សទ្ធម្មបូជាបិ នេសំ តថេវ, យថា បសំសន្តិ សកាយនានិ;

សព្ពេវ វាទា [សព្ពេ បវាទា (ស្យា.)] តថិយា [តថិវា (សព្ពត្ថ)] ភវេយ្យុំ, សុទ្ធី ហិ នេសំ បច្ចត្តមេវ.

៩១៣. ន ព្រាហ្មណស្ស បរនេយ្យមត្ថិ, ធម្មេសុ និច្ឆេយ្យ សមុគ្គហីតំ;

តស្មា វិវាទានិ ឧបាតិវត្តោ, ន ហិ សេដ្ឋតោ បស្សតិ ធម្មមញ្ញំ.

៩១៤. ជានាមិ បស្សាមិ តថេវ ឯតំ, ទិដ្ឋិយា ឯកេ បច្ចេន្តិ សុទ្ធិំ;

អទ្ទក្ខិ ចេ កិញ្ហិ តុមស្ស តេន, អតិសិត្វា អញ្ញេន វទន្តិ សុទ្ធិំ.

៩១៥. បស្សំ នរោ ទក្ខតិ [ទក្ខិតិ (សី.)] នាមរូបំ, ទិស្វាន វា ញស្សតិ តានិមេវ;

កាមំ ពហុំ បស្សតុ អប្បកំ វា, ន ហិ តេន សុទ្ធិំ កុសលា វទន្តិ.

៩១៦. និវិស្សវាទី ន ហិ សុព្ពិនាយោ, បកប្បិតំ ទិដ្ឋិ បុរេក្ខរានោ;

យំ និស្សិតោ តត្ថ សុភំ វទានោ, សុទ្ធិំវទោ តត្ថ តថទ្ទសា សោ.

៩១៧. ន ព្រាហ្មណោ កប្បមុបេតិ សង្ខា [សង្ខំ (សី. ស្យា. បី.)], ន ទិដ្ឋិសារី នបិ ញាណពន្ធុ;

ញត្វា ច សោ សម្មុតិយោ [សម្មតិយោ (ស្យា.)] បុថុជ្ជា, ឧបេក្ខតី ឧគ្គហណន្តិ មញ្ញេ.

៩១៨. វិស្សជ្ជ គន្ថានិ មុនីធ លោកេ, វិវាទជាតេសុ ន វគ្គសារី;

សន្តោ អសន្តេសុ ឧបេក្ខកោ សោ, អនុគ្គហោ ឧគ្គហណន្តិ មញ្ញេ.

៩១៩. បុព្ពាសវេ ហិត្វា នវេ អកុព្ពំ, ន ឆន្ទគូ នោបិ និវិស្សវាទី;

ស វិប្បមុត្តោ ទិដ្ឋិគតេហិ ធីរោ, ន លិម្បតិ [ន លិប្បតិ (សី. បី.)] លោកេ អនត្តគរហី.

៩២០. ស សព្ពធម្មេសុ វិសេនិភូតោ, យំ កិញ្ចិ ទិដ្ឋំ វ សុតំ មុតំ វា;

ស បន្នភារោ មុនិ វិប្បមុត្តោ, ន កប្បិយោ នូបរតោ ន បត្ថិយោតិ.

មហាព្យូហសុត្តំ តេរសមំ និដ្ឋិតំ.